الشخصية، هي: مجموعة من الخصائص اللي بتحدد هوية الشخص وتميزه عن غيره من الناس.
خضائص زي:
الخصائص الجسمانية: اللي منها الطول والقصر.
أو الخصائص الوجدانية: زي الانفعالات والمشاعر والمزاج.
وهكذا.
فيه خصائص متعرفش تغيرها.
زي الطول مثلًا، أو لون البشرة.
لكن فيه حاجات ممكن تغييرها في الشخصية، من خلال تغيير خصائصها، أو عناصرها.
حلقة انهارده عن امتلاك شخصية قوية، واللي مش زي ما أنت معتقد إن معناه القيام بأمور صعبة، أو إنك تكون غير قابل للكسر.
الموضوع أبسط من كدا. تعالوا نشوف مع بعض.
* الأول، ايه هي عناصر الشخصية؛ علشان نعرف نتعامل مع كل جزء منها ازاي؟
1. الاستعداد الفطري، أو السجية.
ودا لو موجود بيسهل حاجات كتير.
يعني لو حد مستعد فطريًا للتحمل أو الصبر هيكون تعلم الصبر سهل بالنسبة له.
2. المزاج.
إن الإنسان يختار كبح جماح مشاعره اللي بتشكل مزاجه، وميسيبهاش تسوقه.
3. الطبع.
ودا اللي الإنسان اتعود عليه واكتسبه على مدار سنين حياته.
وزي ما ورد في الأثر: (إنَّما العِلْمُ بالتَّعلُّمِ وإنَّما الحِلْمُ بالتَّحلُّمِ).
يعني بالاعتياد والمحاولة المتكررة تقدر تتطبع بما تريد.
4. الخُلق.
واللي بيضفي على الإنسان صفات الاستقامة، وضبط النفس، والاستقلال الذاتي.
5. الفكر.
ودا اختياري، ناتج عن ما يتعلمه الإنسان، وعن ملكاته الذهنية.
* طب بالنسبة للشخصية القوية ايه هي ملامحها الأساسية؟
1. التكامل.
فالشخصية القوية زي النبتة اللي نموها بيكون متكامل.
فيكون فيه جذع رئيسي بتتشعب منه جميع الفروع المختلفة.
2. الاستمرارية في النمو.
فصاحب الشخصية القوية كيانه مش جامد، ولا واقف عند نقطة محددة.
بل بيتحرك، وبيتطور.
3. تحقيق التوازن بين الأنانية والغيرية.
يعني صاحب الشخصية القوية بيجمع بين إشباع احتياجاته الشخصية، وإشباع احتياجات المجتمع المحيط بيه.
4. تحقيق التوافق النفسي.
بحيث يتحقق الانسجام بين المطامع والإمكانات.
5. الانتماء للمستويات المجتمعية ذات المفاهيم الأفضل.
يعني تكون متواجد بين ناس مفاهيمهم الأخلاقية كويسة، بدل ما تحيط نفسك بناس تشدك لتحت.
باختصار، الشخصية القوية هي اللي بتثبت، ولا ترضخ للضغوط اللي بتنافي الأخلاق.
* ايه هي بقى الخطوات اللي ممكن تساعدك على امتلاك شخصية قوية؟
1. اللباقة.
ومعناها الظُرف والرفق.
والتي تقدر تضيفها لمهاراتك من خلال عدة أمور، زي:
* إنك تتكلم مع الآخرين فيما يهمهم من أمور، ولا تهمل المجاملات العابرة.
إنك تمدحهم مدح مخلص وصادق، مش إنك تكون منافق.
* إنك تجتهد في تذكر الأسماء والوجوه، وتجعل كل شخص يشعر أنه مميز عندك.
ودا ممكن تعمله بردوا عن طريق عدم السخرية من الآخرين أو الاستهزاء بيهم.
* بالإضافة للاستماع أكثر من التكلم، والتبسم أكثر من التجهم.
والضحك مع الآخرين أكثر من الضحك عليهم.
وكل دا بحيث لا يخرج عن حدود اللباقة.
* وأخيرًا اكتساب المقدرة على القول المناسب في الموقف المربك.
2. عدم الإكثار من الشكوى.
تخيل صديق ليك، كل ما يقابلك يحكي ليك عن مشاكله وهمومه، والمصاعب اللي بيمر بيها.
لأ، مش مجرد مرة أو اتنين بينفث عن اللي جواه، أو بيطلب مساعدتك.
لأ، دي عادته.
هل هتحب تقابله وتتتكلم معاه؟
هل دي الطبيعة اللي تحب شخصيتك تكون عليها؟
صاحب الشخصية الضعيفة مهزوز وكثير الشكوى وبيظهر الحسرة والمرارة علطول.
لذلك لو حابب شخصيتك تكون قوية قلل من الشكوى.
3. الحزم والإصرار.
واللي من معانيهم، التعبير عن الآراء والدفاع عن الاحتياجات، لكن بلباقة.
من غير ما تكون عدواني أو عنيف.
ودا ممكن يكون في حاجات كتير، زي:
التعبير عن المشاعر السلبية أو الطلب من الآخرين، أو بدء ومواصلة المحادثات مع الآخرين بثقة.
علشان تفعل الصفة دي في حياتك، شوف ايه المناطق في حياتك اللي عاوز تكون فيها أكثر حزمًا.
العمل مثلًا، ولا المنزل ولا مكان تاني.
وخد وقتك في التفكير في أي جزء من حياتك هيستفيد من مناصرتك القوية لنفسك، وقوة شخصيتك.
ومن أسهل الطرق لعمل دا التفكير في جوانب حياتك اللي بتسبب لك معاناة.
ممكن تكون عاوز تقول لمديرك يخفف ضغط الشغل عنك، أو تقول لزوجتك تقلل من طلباتها اللي بتحاصرك بيها.
وابدأ وصل الرسايل اللي حابب توصلها للشخص التاني.
بس بوضوح وبدقة، خليك محدد يعني في عملية نقل وجهة نظرك.
وقلل من استخدام كلمة (أنت)؛ لأن نبرتها هجومية.
واستخدم كلمة (أنا).
وخليك منطقي وواقعي في طلباتك، وحط في اعتبارك الاحتياجات والقيود المفروضة على الطرف التاني.
4. ضبط النفس.
هو القدرة على التحكم في الاستجابات وتغييرها من أجل تجنب ردود الفعل غير المرغوب فيها، وزيادة الردود المرغوبة، وتحقيق الأهداف طويلة المدى.
ضبط النفس يعتبر أمر لا بد منه. لما نتكلم مثلًا عن إنقاص الوزن أو الإقلاع عن عادة سيئة، كتير منا بيكتشف مدى ضعف إحساسه بضبط النفس. واللي بيأثر على شخصيته وعلاقاته باللي حواليه.
ضبط النفس قد يكون صعب في البداية، أو صعب من الخارج.
لكن من خلال تقسيم المهمة إلى أهداف أصغر وتحقيق الأهداف دي واحد ورا التاني، أي شخص يقدر يتعلم ضبط النفس، وإنه ميسلمش مفاتيح نفسه لرغباته.
وبس كدا.
سلام.
الموضوع التالي
