فيه بعض المبادئ اللي ممكن تساعدك على الاحتفاظ بما لديك من صحة نفسية، وعلى وقاية نفسك من متاعب كتير ملهاش داعي.
1. اعرف نفسك.
ويمكن دا آخر شيء أي إنسان يحب يعمله؛ ودا لأنه طول عمره بيحاول يخفيها؛ علشان لو شاف نفسه هيشوف حاجات متعجبوش.
هيشوف أخطاءه وعيوبه ونقاط ضعفه.
وكمان هيشوف نقاط قوته، والإمكانيات اللي أهملها أو أخفاها.
هيشوف الرحلة اللي مر بيها، وهيشوف اللي ساعدوه واللي وقفوا جنبه واللي تخلوا عنه.
هيعرف الأعراض والدوافع ورا سلوكياته، ومش بعيد يعرف الحيل النفسية اللي بيمارسها؛ علشان يعرف يكمل ضحك عل نفسه وتبرير لسلوكياته.
المشكلة إن أغلب الناس بيروقوا دماغهم من تعب معرفة نفسهم!
بس للأسف مش هتعرف تحافظ على صحتك النفسية ولا توصل ليها حتى إلا إذا عرفت نفسك.
إلا لو عرفت نقاط الجهل عندك، وحللت أسباب خوفك وكسلك.
وعرفت أنت ليه بتفضل ظلام الجهل والكسل على نور المعرفة والعمل.
ولو عرفت نفسك، وعرفت أنت عاوز ايه، هتبقى حر، وهتعرف تتحكم فيها.
2.المبدأ التاني هو: تعلم حل المشكلات بالطرق الصحيحة.
واللي بيتم من خلال نظرة موضوعية.
واللي بتقتضي التمهل، والتفكير، والنظر إلى المشكلة من جميع نواحيها السارة وغير السارة ووزنها وتحليلها.
والاسترشاد بالوقائع والمشاهدات الموضوعية.
مش بالحالة الذاتية، ولا المخاوف والشكوك.
أما الطرق غير الصحيحة لحل المشكلات..
هي إخفاءها أو تجاهلها.
واللي بيخليها تتضخم أكتر مما كانت عليه.
حاول تحسم مشكلاتك فور ظهورها، بدون تسويف.
وخد قرارات حاسمة؛ لأن تعليق القرارات بيبعث في النفس القلق، ويثير الصراعات القديمة. بل وبيخلق صراعات جديدة.
ولو معرفتش تحل المشكلة.. استشر.
3.تالت مبدأ هو: اتخذ لنفسك هدف في الحياة.
بلاش تعيش حياة بلا غاية تسعى لها.
إن يكون ليك هدف فدا من شروط تكامل الشخصية، وهيخليك حريص على كل ثانية في عمرك، وكل فرصة.
لأنه بيوفق بين دوافعك المختلفة، وبيخليك متوزعش كل طاقتك على أنشطة عشوائية عقيمة لا تثمر.
وبينظم تصريف طاقتك.
بالإضافة إلى أنه بيقيك من الانطواء والإسراف في التأمل الذاتي، وبيخليك تعيش حياة أكثر فاعلية.
وبيحول بينك وبين الكسل.
4. المبدأ الرابع معانا هو: اتخذ لنفسك صديق.
الصديق شخص بيسمع ويفهم ويحنو وينصح.
مش مجرد شخص تتبادل معاه السلامات العابرة، أو العبارات المختصرة.
الصديق هو شخص تقدر تعبر له عن متاعبك ومشاكلك بوضوح.
وتبوح له بكل ما في صدرك، بدون خوف أو خجل.
وجوده هيعفيك من إنك تحكي مشاكلك لكل من هب ودب، واللي بيخليك تفقد الثقة في الناس، وتكون تحت رحمتهم وابتزازهم.
5. خامس مبدأ هو: خليك صريح في معاملاتك.
ابتعد عن التكلف واللف والمواربة والكذب.
ولو أصابك سوء من حد خد حقك، ورد الإهانة.
دا أفضل من إنك تكتم في نفسك لحد ما يتراكم عليك أمثالها من الاهانات.
6. ركز انتباهك في الحاضر.
ولا تكثر التحسر على ما فات، أو التوجس مما هو آت.
بل درب نفسك على التركيز على الحاضر.
وكما يقال: ركز في (هنا والآن).
7. اتقن عملك.
متحاولش تنجز أشياء كثيرة في وقت واحد.
ومتخليش غياب مراقب عليك أو محاسب يدفعك لعدم الإتقان.
العمل أمانة.
حاول تكتشف الأسباب اللي بتدفعك للتسويف، أو عدم الإتقان واتغلب عليها.
بس برضوا متحملش نفسك فوق طاقتها.
زي ما أنت محاسب عن العمل، فأنت محاسب عن نفسك.
وبس كدا.
سلام.
الموضوع التالي
