التوافق والتفاهم في الحياة الزوجية مش من الأمور اللي نقدر نضمنها بنسبة 100%.
أثناء الخطوبة بنكون مفتحين قدر الإمكان، وبنحاول نختار الشخص اللي بينا وبينه توافق، ورغم دا مفيش شيء مضمون.
عشان كدا هنتكلم عن مواصفات الحب الحقيقي اللي بيؤدي للارتباط الصحيح.
واللي ممكن يساعدك على اختبار نفسك، واختبار شريك حياتك؛ لمعرفة مدى تناسبكم وتوافق توجهاتكم مع بعض.
1. في الحب الحقيقي يجب أن يمتلك الشخص الرغبة الصادقة والحقيقية في العطاء للآخر.
بمعنى الرغبة في العطاء بكل ما تستطيع وكل ما تمتلك من فكر وقدرات وعمل ومال.
ويجب أن تكون الرغبة دي موجودة طول الوقت، وتتسم بالشفافية والاستقرار، ومبتتعرضش لأي نوبة من نوبات الصعود والهبوط وعدم الاستقرار.
2. في الحب الحقيقي يجب أن يمتلك الشخص رغبة حقيقية وصادقة في منح الإشباع والسعادة للطرف الآخر.
إنه يلبي احتياجاته، وميعلقش التلبية دي على شروط أو ظروف معينة.
3. الحب الحقيقي محرر ومطلق للطاقات.
بيساعدك على الشعور بالقوة لما الطرف التاني يكون جنبك.
وبيساعد الطرف التاني على اكتشاف ذاته، واكتشاف مناطق قوته وضعفه.
قوة لا تنبع من الاعتمادية، وتقوقعكم على بعض وانغلاقكم.
لكن بتنبع من وجود الحب ذاته، ورغبتكم في نموه.
وأن بكرا يكون أفضل.
4. الحب الحقيقي لا يجعلك خائفًا.
ودي من أهم السمات.
إنك متخفش من الأذى المعنوي أو المادي.
متخفش من الإهمال.
أو من التعري والانكشاف أمام الطرف التاني.
إنك تظهر بحقيقتك، ومتحسش بالخزي أو الخوف لأي سبب كان!
إنك تحط دماغك على المخدة وأنت مطمن، ومبتسألش هل أنا كفاية، ولا لأ؟
5. الحب الحقيقي يساعد الطرف الآخر على قبول نفسه وحبها، وفي ذات الوقت يدفعه بشدة نحو تغيير نفسه.
ودي من أصعب المعادلات في الحب الحقيقي؛ لأننا غالبًا بنكون عاوزين الطرف التاني يكون متفصل زي ما أحنا عاوزين، وبندفعه بشدة للتغيير.
ومبنهتمش بإيصال شعور القبول له.
طبعًا دا لا يتعارض مع رغبتنا في تغيير بعض الصفات أو الكلام عنها (وخصوصًا لو كانت مركزية زي البخل مثلًا).
لكن الكلام هنا عن توفير جو من الحب والقبول يدفع الشخص للتغيير.
6. الحب الحقيقي يساعد على الاستماع المستمر للطرف التاني.
يعني الرغبة الحقيقية في الإنصات للآخر وهو بيعبر عن نفسه بشغف واستمتاع.
وطبعًا دا يعني وضع الاستماع في أولويات الطرفين، وتوفير وقت لدا.
7. الحب الحقيقي عكس فكرة السيطرة، والتسلط.
الحب خضوع متبادل من الطرفين، مش خضوع طرف واحد للتاني، والسيطرة عليه.
خضوع لا يتنافى مع كون واحد من الطرفين مسؤول عن الطرف التاني، وقيم عليه.
ولا يعني السيطرة والتجبر وسد منافذ المايه والهوا على الطرف التاني.
ودا طبعًا معناه الاعتذار لما تكون غلطان، وإصلاح خطأك، والتعويض كمان لو كان الأمر يستدعي دا.
8. الحب الحقيقي بيعبر عن نفسه في وجود انجذاب عاطفي وجسدي بين الطرفين.
دا مش معناه إن حياتكم لازم تكون رومانسية وخالية من المنغصات، زي ما الأفلام وقصص الحب الخيالية بتصور لينا.
لكن يكون فيه قبول وانجذاب من الطرفين، ورغبة في بناء حياة مشتركة.
وبس كدا.
سلام.
الموضوع التالي
