فيه شوية معايير أساسية بترشدنا لاختيار الزوج، أو الزوجة.
1. السواء النفسي.
متصالح مع العالم ومع نفسه ولا متشاءم ونظرته سوداوية؟
متقبل إنه إنسان وبيغلط وعادي حد يرشده أو يوجهه للصح؟
ولا شايف نفسه هو الصح بس؟
فاهم إن الاعتذار ميعيبوش في شيء ولا يقلل منه؟ ولا مينفعش يعتذر حتى لو مقتنع إنه على خطأ؟
بيعتقد إن من حقه يشكي ويبوح، بس لما حد يشكي له ميسمعش، أو ميبادرش أصلا بالاهتمام والسؤال.
2. تحمل المسؤولية.
شايف مثلًا الإنجاب مسؤولية، وإن تربية الأولاد محتاجة مجهود وعنده استعداد يشارك فيها؟
ولا دا دور الأم بس؟
أو شايف إن الأفضل عدم الإنجاب مطلقًا؟
هيتحمل مسؤولية بيته وينفق عليه ولا وقت الغضب يقول اتصرفوا أنتم، أنا مش مسؤول عن حاجة؟
3. معاملة الأهل.
بيقدم لوالديه الاهتمام والمساعدة، لو محتاجين ماديًا مثلًا بيساعدهم، أو بيقدم لهم الاهتمام المعنوي، ويقف جنبهم علشان يعدوا أزماتهم؟
ولا بيعلي صوته عليهم، أو بيعاملهم بشكل غير لائق؟
بيشكرهم ويمتن لوجودهم ويسمعهم ويشاركهم ولا مش عاوز يقرب منهم مطلقًا؟
4. الالتزام بالعبادات المفروضة ومدى المحافظة عليها.
زي الصلوات، والصيام، واجتنابه للكبائر.
5. الأخلاق.
زي الوفاء بالوعد وحفظ الأمانة وكتم السر.
6. تقديم الدعم للمحتاج.
لو أخته محتاجة حد يساعدها ويقف جنبها، بيساعدها؟ ولا بيتهرب من المسؤولية؟ بيساعد المحتاج من أصدقائه، ولا اللي بينهم مصالح بس؟
7. العمل.
عنده شغل ثابت، أو قادر يوفر مصدر دخل في فترة مناسبة؟
8. الاهتمام بالنظافة.
ودي بتبان بسهولة جدًا، بس الواحد بيتعمد إنه مينتبهش ولا يركز مع الشخص اللي قدامه.
دي معايير عامة، هدفها المساعدة بس.
ممكن تزود عليها براحتك.
لو أنت بتحب الكلام العاطفي وشايفه شيء أساسي في الشخص الل هترتبط بيه، ممكن تضيفه لمعاييرك، ومتتنازلش عنه.
أحنا بنساعدك بس تشوف الحاجات الأساسية، وأنت كمل بقى، وفكر، وركز مع الشخص.
ومتخليش بوادر الحب والاهتمام تعميك.
الموضوع التالي
