فيه 5 احتياجات نفسية للطفل في طفولته المبكرة علشان يقدر ينمو بشكل سوي.
أول احتياج: احتياجه للنمو والتعلق.
ودا الطفل بيحتاج فيه للقرب والحنان
واللي بيشكلو احتياج أعمق وهو الاحتياج إلى تكوين (الانتماء)
أو (التعلق/الارتباط الآمن) لدى الطفل واللي هو الإحساس بالحب.
الاحتياج دا علشان يلبى بشكل صحيح محتاج حاجتين:
1-القرب والتواجد:
القرب والتواجد المادي المستمر
والاتصال البدني (خاصة في الساعات والأيام الأولى بعد الولادة) لأحد الوالدين على الأقل (غالبًا الأم)،
ودا بيوفر للطفل الإحساس بالاتصال والدفء والأمان.
2-الحنان:
الحنان او الحب والاهتمام بطريقة ملموسة، عن طريق الهدهدة والتربيت والاحتضان والقبلات … والتواصل المتدفق بتعبيرات الوجه والعينين والتعبيرات الصوتية (المناغاة)،
بالإضافة لسماع كلمات محددة بتعبر عن العطف والحنان مرات متعددة أثناء اليوم، بحيث توصل للطفل الإحساس بأنه شخص مهم جدًا لوالديه. والأمر المهم هنا أن الطفل يشعر بالحب دا، مش إن الوالدين يقرروا أنهم منحوه الحب دا خلاص..
أبسط مثال على الفرق بين الحالتين..
لما الطفل يكبر والأهل يعتقدوا إن مجرد تأمين الغذاء أو مسكن كويس أو الحياة الاجتماعية الملائمة فدا وفر للطفل الحب. بس دا غلط.
الحب ليه أشكال واضحة ومعروفة… زي الكلام الجميل والحضن والفسحة وزرع الأمل جوا الطفل والهديا، والتعبير عن الحب دا.
لذلك ميكفيش إنك تاخد الولد في فسحة علشان يحس بالحب. بالإضافة للفسحة فأنت محتاج تعبرله عن حبك واهتمامك بشكل مستمر بالألفاظ والأفعال مع بعض والإحساس كمان.
محتاج ينتمي ليك ويحس إن دا بيته ودول أهله اللي بيخافوا عليه، لذلك الضرب والتخويف والتهديد (بأي شكل وأي درجة) بينسفوا المعنى دا تمامًا عند الطفل، وبيخليه عايش في تهديد مستمر، مهما كانت أشكال الحب اللي بتقدمهوله.
تاني احتياج: الاحتياج لتكوين الذات والاستقلال:
ودا بيتحقق لما نشبع احتياج الطفل لقضاء أوقات خاصة مع الوالدين… بالإضافة لقدرته على التعبير عن رأيه الخاص.
1-قضاء أوقات خاصة مع الوالدين:
أوقات خاصة ومحددة وهادفة مع الطفل وشبه يومية، يكون هو فيها محور ومركز الاهتمام مش حاجة تانية
(وبالتالي دا معناه إن الوقت الخاص دا.. مينفعش تقضوه وانتو بتتفرجوا على التلفزيون مثلًا، أو بتذاكروا).
في الوقت دا الوالدين بيتواصلوا مع الطفل على مستوى التواصل البصري والفكري والعاطفي.
وخلينا نقول نقطة مهمة.. إن فيه 3 أنواع من الأمهات مش هيقدروا يسددوا احتياج أطفالهم للتعلق الآمن بيهم والانتماء ليهم، ولا احتياج الطفل لتكوين الذات والاستقلال، وهما:
الأم اللي عندها مشاكل شخصية غير منتهية من فترة طفولتها.
الأم اللي مبتحصلش على دعم خاص في بيتها الحالي (بيت الزوجية).
والأم المضطربة نفسيًا أو عقليًا بشدة.
2-تعبير الطفل عن رأيه:
الطفل بيحتاج لفرص يعبر فيها عن رأيه الخاص بأسلوب يتناسب مع سنه، في جوٍ من الارتياح والطمأنينة من غير الشعور بأي خوفٍ أو تهديدٍ أو تعجلٍ أو فقدان صبرٍ.
ومناقشة الآراء دي بطريقة تبادلية متعادلة (متكافئة) وحيادية بحيث يشعر الطفل بالاحترام والتقدير لشخصه، ويقدر يتعلم التعبير والتواصل الصحي، وازاي يصيغ أفكاره ووجهات نظره. ودا بالتأكيد معناه عدم وجود تسلط أو سيطرة أو هيمنة من جهة الوالدين.
تالت احتياج: وجود النظام الروتيني:
جايز أحنا مش معتبرين حاجة زي دي مهمة في ثقافتنا، بس هي فعلًا مهمة للطفل. يكون فيه برنامج يومي روتيني متوقع مبيحملش أي مفاجآت لحياة الطفل، بما في ذلك مواعيد الأكل والنوم،
الأمر دا هيرسخ جواه الشعور بالهدوء والأمان والاستقرار. ودا لإن الإنسان كائن نمطي، بيحتاج من لحظاته الأولى في الحياة لروتينٍ ثابت يمشي عليه، علشان يقدر يحس بالثقة والأمان اللازمين للنمو والابتكار. الروتين الثابت مش عكس الابتكار، بل عكس العشوائية والعفوية المفرطة.
رابع احتياج: احتياج الطفل للإحساس بالدفء والحب والتفاهم الناجح في العلاقة بين والديه:
الحب والتفاهم دول مهمين من فترة الحمل، ودا معناه إن ميكنش فيه خلافات أو توترات أو برودة في العلاقة بين الوالدين، أو ضعف شخصية أحدهما أمام الآخر. تسديد الاحتياج دا بيلعب دور مهم في تكوين الارتباط الصحي الآمن مع الطفل، وكمان بيساعده على التعامل مع العالم.
لو شاف والده مثلًا بيعامل والدته بطريقة سيئة.. فيهتعلم إن دي الطريقة اللي الستات بتٌعامل بيها. ولو هي شافت والدها بيعامل والدتها بطريقة هتفهم إن دي الطريقة اللي الستات بٌتعامل بيها؛ وبالتالي مش هتدافع عن حقوقها ولا هتحمي نفسها.
الاحتياج الأخير: الاحتياج للتهذيب:
احتياج مهم جدًا، وعلى عكس اعتقاد سائد جدًا ، متقدرش تهذب ابنك ولا تربيه طالما مسددتش الاحتياجات اللي قبل كدا.
وهنا روس كامبل بيقول: (يستحيل أن ندرب الأطفال على الطاعة وانضباط السلوك بصورة صحيحة ما لم تكن علاقتنا المبدئية معهم قائمة على الحب غير المشروط (والذي يظهر في توفير الاحتياجات السابقة للطفل).
الموضوع التالي
