حان الوقت لإعادة التفكير في مواهبك، ممكن تكون شخص انطوائي ولكن موهوب أو متفتح وموهوب، ومش بالضرورة الموهبة دي يكون هدفها الربح أو تكون شيء تقليدي.
الموهبة تعريفها بيختلف من شخص لآخر وممكن تكون بكل بساطة جزء من شخصيتك.
المواهب تتنوع ما بين مواهب فنية وتقنية وعقلية وبدنية وشخصية واجتماعية، وعلى الأساس دا ممكن تستكشف مواهبك بشكل صحيح وتشتغل على بنائها وتطويرها هي وقدراتك، وتفكر بيهم بشكل إبداعي يساعدك على التواصل مع مواهبك وقدراتك الطبيعية.
خلينا نقول الأول إن المواهب 3 أنواع:
1. موهبة ظاهرة: أنت عارفها، وغيرك عارف إنها موجودة فيك = بسهولة ومن غير تعب.
زي حسن الصوت، والرسم مثلًا، أو الحفظ.
2. موهبة ذات قوة: تشبه الموهبة الأولى، بس بتحتاج لشيء من الاكتساب زي الملكة اللي بتكون عند الشعراء، لو متعلمتش الشعر والعروض؛ فالموهبة مش هيكون ليها لزمة.
3. موهبة نائمة: بتحتاج لإيقاظ وسقي، ودي اللي بتموت لو أهملت وتُرِكَت، وكثير من أصحابها بتدفن في صدورهم وهم أحياء، وما قتلت إلا بذنب الإهمال.
ازاي بقى تقدر تستكشف مواهبك؟
1. تبحث عنها.
أحنا للأسف اتعودنا إننا نقعد مكانا، وكل حاجة تظهر لوحدها.
تقعد وتعرف اهتماماتك وواجباتك وبتحب ايه وتكره ايه = من غير ما تبذل أي مجهود، ولا تجرب حتى.
ابدأ التجريب، والتعلم.
طب لو أنا مش عارف أنا بحب ايه؛ علشان أجرب فيه؟
والإجابة سهلة: جرب حاجات كتير.
ممكن تعمل لنفسك هدف أسبوعي، إنك تتعلم حاجة جديدة.
أسبوع مثلًا تتعلم فيه الكتابة، وتجرب تكتب.
أسبوع تتعلم فيه رياضة معينة، وهكذا.
2. الملاحظة.
وأنت بتجرب، لاحظ نفسك واسألها: هل دا أنا بحبه فعلًا ولا لأ؟
مش شرط إن الحاجة تعملها بسهولة، وبدون عقبات.
الكلام عن الشغف وإن الحاجة اللي بتحبها مش هتحس بتعب وأنت بتعملها= مش واقعي.
طبيعي تتعب، وتبذل مجهود، وتحس بملل.
بس أحنا هنا عاوزين نعرف المهارات والمواهب اللي بتتعلمها دي، وتجربها؛ مناسبة ليكم ولقدراتك وميولك، ولا لأ؟
لو لأ؛ جرب غيرها واتعلم حاجات كتير.
كل حاجة بتتعلمها هتستفيد منها بعدين، متفكرش إن فيه حاجة بتقع على الأرض.
الملاحظة دي مش شرط تكون مقصورة علينا بس، ممكن نلاحظ الصفات اللي الناس حوالينا واخدين بالهم منها فينا.
الحاجات اللي بيثنوا عليها، ويشجعونا نكمل فيها.
3. سجل نجاحاتك وإنجازاتك الصغيرة.
الشعور بعدم الموهبة ممكن ينتج بسبب الشعور بأنك شخص غير ناجح، ودا ممكن يحصل بسبب عدم تركيزك على النجاحات في حياتك، سواء البسيطة أو الكبيرة.
علشان كدا يجب عليك إعادة النظر في النجاحات دي وكيفية ربطها بما قد تكون تملكه من مواهب وقدرات.
بالإضافة لتسجيل النجاحات والإنجازات الصغيرة اللي بتعملها أثناء استكشاف مواهبك وقدراتك؛ علشان تعرف أنجزت قد ايه، وتتحمس تكمل.
4. تجاهل المقارنات.
فلان الإنفلونسر اللي عندي مليون متابع، ودخله قد كدا في الشهر = مجرد مدعي، وفارغ من الموهبة.
متبصش له وتعمله مقياس للنجاح، ولا تقارن نفسك بيه.
كمان العالم اللي بدأ التعلم من وهو صغير، وعمل إنجازات كتير = دي كانت رحلة حياته اللي تعب وأنجز فيها على قدر جهده.
لكن أنت ليك حياتك ورحلتك.
لو هتقارن: يبقى تقارن نفسك انهارده بامبارح.
وحجم التقدم اللي بتحرزه، أو التأخير اللي بتتراجعه؛ لو كنت مقصر.
لكن متقارنش شخصين بظروف ومواهب ورحلات مختلفة.
5. استكشف نقاط قوتك وضعفك.
أكيد فيه نقطة مميزة جدًا، حاجة أنت بتعرف تعملها أفضل من أي حاجة تانية، وأفضل من أي حد تاني بيعمل النقطة دي.
ممكن تكون حاجة صغيرة جدًا، زي قدرتك على الإحساس بمشاعر الناس، أو قدرتك على التعامل مع الأطفال، أو القراءة بتركيز.
بس أنت بتعرف تعملها كويس جدًا.
استكشاف نقاط قوتك وضعفك، مش هيخليك بس تعرف ايه هي نقاط قوتك، ويخليك تركز عليها.
هو يمكن هيعرفك النقطة اللي أنت فيها قوي جدًا دي ايه، وازاي تقدر تسلط عليها الضوء وتنميها.
6. حدد يعني ايه موهبة.
هل هي القيام بشيء خارق محدش عمله قبل كدا؟ ولا إنك تتفوق على كل الناس في نقطة ما؟ ولا معرفة الشغف؟ ولا ايه بالظبط؟
أنت ممكن تكون حاطط تعريف معين بتدور عليه في دماغك، وأنت مقتنع إنه هو الموهبة أو المهارة، وهو مش كدا.
اظبط البوصلة قبل ما تبدأ.
وبس كدا.
سلام.
الموضوع التالي
