كتير من كتب التنمية البشرية بتتكلم عن أفكار زي الربح السريع، وإن اللي بيفصل بينك وبين النجاح الشغف، ولازم تعمل ما تحب حتى تحب ما تعمل.
وإن التفكير الإيجابي هو اللي هيغير حياتك بسرعة.
وكل اللي هتفكر فيه هيحصل..
فلازم تفكر في الثراء علشان تبقى ثري.
ولازم تفكر في النحافة علشان تبقى نحيف، إلى آخر دا من الأفكار المغلوطة.
واللي بتتكرر بشكل محفوظ.
خليني الأول أقولك شوية معلومات عن النوع دا من المحتوى.
1. غالبًا بتكون العناوين مختلفة والمضمون واحد.
* المضمون دا بيكون منقول من مكان تاني، ومكرر بأشكال مختلفة.
* والعنوان بيكون جذاب علشان تشتري الكتاب أو تحضر الدورة، بس مش حقيقي، ومتقدرش تنفذ اللي بيتقال في المدة اللي بيوهمك بيها.
2. بتكون مبنية على انطباعات، مش تأملات حقيقية أو رؤى أو نظريات وأبحاث.
3. أغلب اللي بيقدموا المحتوى دا، مش معاهم شهادات، ومش متخصصين.
4. الجهات الرقابية غير مؤهلة لتتبع المحتوى دا ومقدميه ومدى تأهلهم.
5. المختصين اللي بيتعرضوا للمحتوى دا بالنقد قليلين جدًا، مقارنة بالإصدارات اللي بتخرج بالعناوين دي، ومدى ترسخها في أذهان الناس.
في فيديو انهادره هنتكلم عن فكرة من دي منتشرة حوالينا، وهي (الربح السريع).
واللي كُتب كتير بتتبناها تحت جملة (تخيل نفسك ثريًا وحقق الثراء).
لدرجة إن فيه ناس كتير بقت تتعامل معاها على أنها حقيقة بديهية.
وبيطبقوها على حاجات تانية.
يعني إن كان تخيل الثراء هيخليك ثري، ليه متتخيلش إنك شفيت من الأمراض اللي عندك، أو إن ذكائك زاد، أو مظهرك بقى أفضل؟
* يعني لو كان تحقيق الثراء والنجاح ببساطة عن طريق استبدال الأفكار والمشاعر السلبية بأفكار ومشاعر إيجابية؛ ليه لسا فيه ناس كتير جدًا بتعاني من التعاسة والفقر؟
ببساطة، الأمر لا يتعلق بالتخيل -زي ما العناوين دي بتحاول تقنعك-، بل بالعمل.
الأشخاص اللي بيكونوا ناجحين في حياتهم، أو أثرياء غالبًا بيكونوا مدفوعين باحتياج قهري للإنجاز، بيكون فيه سبب ما يدفعهم للعمل، وتحقيق الإنجازات.
كمان الكيفية اللي بيتصرف بيها الإنسان ويتحرك من خلالها هي العنصر الحاسم في تحقيقه للنجاح أو الثراء، مش اللي بيفكر فيه، أو يتخيله.
الكيفية اللي بيفكر بيها الإنسان، بتأثر على مشاعره.
أيوة، ممكن تدفعه للحركة والإنجاز.
بس مش شرط.
مش كل شخص أفكاره إيجابية أو بيحلم بالثراء هيكون ثري.
الأمر بيتعلق بالخطوات اللي بتاخدها، وبالعادات اللي بتبنيها بمرور الوقت.
وبالأهداف اللي بتسعى لتحقيقها.
علشان تكون ثري مثلًا محتاج تعمل 6 حاجات تقريبًا:
1. تعمل بجد.
ومتاخدش الحياة على إنها فسحة.
2. تتقن ما تفعل.
من وظيفة أو مهارة.
ولو عندك خال غني ساب لك ورثه كله، يبقى الكلام دا مش ليك.
3. يكون عندك مصادر دخل عديدة.
ودا بيتطلب منك تحسين جودة عملك، أو إظهار مهاراتك، أو استغلالها.
4. تخلي إنفاقك معتدل.
وقدر الإمكان تحاول متقعش في الفخ اللي بيقع فيه أغلب الناس، وهو زيادة الإنفاق بزيادة الدخل.
متخليش رغبتك في الشعور بأنك غني تخليك تنفق كل ما تملك.
5. تكون متميز في الادخار.
فيه كتب بتنصح بادخار ثلث الدخل.
وللأسف، الادخار مش ثقافة شائعة، وخاصة في الطبقات الفقيرة.
إلا أن الادخار له أهمية كبيرة.
تقدر تواجه بيه الطوارئ، أو تستغل الفلوس دي في مشروع لتحسين دخلك.
6. ادفع لنفسك أولًا.
أغلب الميزانيات اللي بنحاول نجبر أنفسنا على الالتزام بيها بتفشل؛ لأننا ببساطة بنحدد هندفع ايه لكل مكان.
للكهربا والمايه ومدارس الأولاد، وهكذا.
ولما نوصل آخر الشهر؛ علشان نشوف هندخر ايه، وندفع ايه لنفسنا؟
منلاقيش حاجة.
حدد من البداية هتدخر قد ايه، واقتطعه من دخلك.
ادفع لنفسك أولًا.
* وزي ما أنت شايف، العمل الحقيقي والادخار خطوات أساسية للثراء.
وميكفيش إنك تقول أنا غني؛ علشان تبقى غني فعلًا.
ما لم تتحرك فعلًا لتحقيق الثراء الذي ترغب فيه.
وبس كدا.
سلام.
المصدر:
* الثروة التلقائية خطوات نحو الاستقلال المالي.
الموضوع التالي
