النجاح في مقابلات العمل بيحتاج لبعض الأمور..
زي: إظهار أنك المرشح المثالي للوظيفة اللي أنت مقدم عليها، وإن عندك ما يؤهلك لتولي المسؤولية.
فيه بعض الخطوات اللي ممكن تساعدك على النجاح.
- الاستعداد.
* الاستعداد دا بيكون من خلال عدة محاور:
المحور الأول: النقاش.
غالبًا الشركات أو المؤسسات بتحدد ميعاد المقابلة وتبلغك قبله بفترة.
حاول تستعد كويس لسؤال الأسئلة الصحيحة، وكذلك، الاستعداد للرد على الأسئلة اللي بتوجه ليك بطريقة جيدة.
دور كويس على بيانات الشركة، والمسمى الوظيفي اللي أنت مقدم عليه، ومهامه، ومسؤولياته، واحتياج الشركة، وتقدر تضيف فيه ازاي.
اجمع أكبر قدر من المعلومات تقدر تساعدك على إظهار قدرتك على الالتزام بمسئوليات الوظيفة وواجباتها.
مش كدا وبس، ابحث عن اسم الموظف اللي هيعمل معاك المقابلة، ودوره الوظيفي في الشركة، ودا هيساعدك على إجراء نقاش فعال معاه.
أما المحور التاني: ودا متعلق بالاستعداد بالأوراق اللازمة، والإجابات والمقترحات اللي هتضيفها.
ودا لأن فيه خبرات ومهارات لازمة للوظيفة يفترض توفُّرها في الشخص اللي بيقدم.
فكل ما كنت مستعد بشكل أفضل؛ كل ما كانت فرصة نجاحك أكبر.
المحور التالت: الأسئلة:
توقّع الأسئلة الشائعة في مقابلات العمل وتدرّب على إجاباتها.
زي شايف نفسك فين بعد خمس سنين؟
أو هتقدر تضيف ايه للشركة؟
ومتنساش تستخدم مفردات أو مصطلحات خاصة بالمهنة أو الوظيفة اللي هتقدم عليها؛ لأن دا أدعى لإظهار فهمك للمكان اللي حابب تكون فيه.
2. أظهر الصدق والثقة.
خليك صادق لما توصف نقاط قوتك لما تُسأل عنها.
اللي بيسألك مش بيسأل من باب الفضول بس لمعرفة مهاراتك، لكن هو عاوز يعرف مدى كفاءتك.
* المهارات الاجتماعية والقدرة على تسويق نفسك أصبحت أحد أهم المهارات المطلوبة.
لذلك تشتغل على النقط دي كويس.
3. تدرب على المقابلة.
مع شخص آخر علشان تشعر بمزيد من الراحة أثناء المقابلة ذاتها.
اطلب من صديق ليك محاورتك وتدرب على التعبير عن صفاتك له، وعن النقاط اللي حابب تتكلم عنها.
أو تخليه يسألك الأسئلة اللي متوقع تتسأل ليك، وتجاوب عليه.
اعمل دا أكتر من مرة لحد ما تبدأ تشعر بالراحة.
في الأول هتحس كأنك بتقرأ سيناريو ولكن بعد فترة قصيرة هتبدأ تحس أن الأمر طبيعي.
4. تحدث عن نقاط قوتك بثقة.
محتاج تظهر بمظهر الواثق من نفسه، بس مش المغرور.
حاول الحفاظ على ثقتك بنفسك مع كونك متواضع بشأن إنجازاتك ومهاراتك.
لما تتكلم عن نقاط قوتك:
حاول تختار نقاط القوة المتعلقة بالعمل الفردي لو كانت الوظيفة اللي هتقدم ليها عمل فردي.
أو اختار نقاط القوة المتعلقة بالعمل الجماعي؛ لو كانت المؤسسة اللي هتقدم ليها أو الوظيفة اللي عاوز تشتغل فيها العمل فيها جماعي.
وبشكل عام..
تكمن نقاط القوة الفعلية في تلات فئات رئيسية:
- المهارات اللي بتعتمد على المعرفة: زي مهارات الكمبيوتر واللغات والمعرفة التقنية.
- المهارات القابلة للتحويل: زي مهارات التواصل مع الناس ومهارات الإدارة أو حل المشاكل.
- الصفات الشخصية: زي الاجتماعية أو الثقة بالنفس أو الالتزام بالمواعيد.
* ولما تتكلم عن نقاط قوتك:
متنساش تقول أمثلة عليها.
- وأنت مش ملزم بشكل معين لتوضيح نقاط قوتك.
ممكن تظهر مثلًا نقاط قوتك ومجموعة مهاراتك من خلال مشاركة ما كان جيد في الماضي (وظيفة مثلًا أو إنجاز)، وازاي نجحت جهودك، وإسهاماتك.
- وكمان تقدر تذكر أي جوائز أو شهادات تقدير حصلت عليها أو تكريمات.
5. خليك صادقً بشأن نقاط ضعفك.
لما اللي بيعمل معاك المقابلة يسألك سؤال عن نقط ضعفك: خليك صادق معاه.
هو مش عاوز ردود مثالية، ولا مبهرة.
هو عاوز الحقيقة؛ اللي تساعده على تقييمك، وعلى معرفة مدى ملائمتك للوظيفة.
وكل ما ساعدته يقيمك بشكل صحيح، ويعرف مدى ملائمتك للوظيفة؛ زادت فرصة نجاحك..
إما بالموافقة؛ لو كنت الشخص المناسب.
أو الرفض؛ لو كنت غير مؤهل.
ودا هيخليك تقوي نقاط ضعفك، وتشوف مكان مناسب ليك فعلًا.
6. انتبه لبعض النقاط.
اللي ممكن تخليك مستبعد.
- زي إنك تكون انتقادي للغاية.
- إنك تشك في الإدارة وفي زملائك.
- إنك تكون لحوح.
- مماطل.
- كثير الكلام، بدون داعي.
- شديد الحساسية.
- أو إنك تظهر نقص الإصرار.
- أو نقص اللباقة الاجتماعية والأدب.
7. أظهر مدى سعيك للتغلب على الصعوبات التي تواجهك.
إنك تكون شخص عملي بتتكلم بصدق، وبتوضح الحقيقة، أفضل من إنك تكون شخص مثالي في المواقف دي.
الرد المثالي ممكن يكون غير واقعي ويخليك تظهر وكأنك بتحاول ترفع من شأن نفسك، وغالبًا دا بيكون بناءً على صفات أو إنجازات غير حقيقية.
قول مثلًا للشخص اللي بيجري معاك المقابلة:
“أنا باخد خطوات جادة للحد من عادة المماطلة.
بضع لنفسي مواعيد نهائية علشان ألزمها بالإنجاز، وبقدم لنفسي حوافز في حالة الالتزام بالمواعيد دي.
ودا ساعدني كتير في حل مشكلتي”
8. أظهر اهتمامك بالوظيفة.
ودي ممكن تعمله عن طريق الأسئلة مثلًا..
ايه متطلبات النجاح في الشركة، أو المؤسسة؟
ايه هي فرص النمو المتاحة ليا، ضمن الحدود اللي بتضعها الشركة؟
أو مين الأشخاص اللي هكون على تواصل كبير معاهم في الشركة، أو هتشتغل معاهم، أو تحت إدراتهم؛ ودا هيعطي انطباع عنك بأنك شخص اجتماعي مثلًا.
أو اسأل عن حاجات أنت حابب تعرفها عن الوظيفة، أو الدور المنوط بالشخص اللي هيتولاها..
وبس كدا.
سلام.
الموضوع التالي
