يعنى إيه غسل أموال؟
في البداية تعال نتفق إنك مش هتغسل حاجة إلا إذا كانت مش نظيفة, تمام كده ؟ هو ده بقي بالظبط معني غسل الأموال. يعني فلوس جاية من مصدر غير مشروع وبالتالي قولنا عليها غير نظيفة بيتم غسلها عشان تبقي أموال نظيفة، يعنى أموال جاية من مصدر مشروع، عشان كده نقدر نقول إن مكافحة غسل الأموال شغلتها انها تمنع المجرم إنه يقدر يستفيد من الفلوس اللى اكتسبها من جرائم زي تجارة المخدرات، تهريب البشر، الرشوة، الاحتيال..وغيرها من الجرائم غير المشروعة، عشان كده نقدر نعتبر إن مكافحة جرائم غسل الأموال تعتبر خط الدفاع التاني في مواجهة الجريمة المنظمة لو أفلتت من السلطات والأجهزة الأمنية.
خلونا نتعرف أكتر على تاريخ مصطلح غسل الأموال:
نشأة المصطلح نفسه للوجود اتقال فيها أكتر من حكاية أشهرها إن مافيا تجارة المخدرات لما حققوا أرباح ضخمة غير مشروعة قابلتهم مشكلة وهي ازاى أنهم يدخلوا الفلوس دي البنوك ويتعاملوا بيها بشكل طبيعي؟ فلجأوا لفكرة إنشاء مغاسل للملابس على مستوي البلاد ودخلوا أرباح المخدرات البنك على أساس إنها أرباح المغاسل بتاعتهم ولما اتكشف الموضوع والقضية اتعرضت قدام المحكمة ساعتها القاضي قال جملته الشهيرة إن المتهمين ” كأنهم غسلوا الفلوس من المخدرات ” ومن هنا كانت نشأة مصطلح غسل الأموال، وبكده نفهم إن من شروط حصول جريمة غسل أموال أن يسبقها جريمة غير مشروعة الأول وينتج عنها أرباح ملوثة يتم غسلها، عشان كده بنقول عليها إنها جريمة “تبعية” يعني بتيجي تابعة لجريمة أخرى فلو مفيش جريمة أولى يبقي مش هيكون فيه إيرادات وأرباح ملوثة وبالتالي مش هيكون فيه جريمة غسل أموال.
طيب خلونا نتكلم عن مراحل غسل الأموال:
عملية الغسل دي بتقوم على 3 مراحل:
مرحلة الإيداع.
مرحلة التمويه.
مرحلة الخداع.
أول مرحلة هي مرحلة الإيداع ودي بتبقي أصعب مرحلة لأنها بتضمن محاولة إدخال الأموال غير المشروعة للقنوات الرسمية للاقتصاد سواء عن طريق إيداعها في بنوك أو المضاربة في البورصة أو شراء عقارات أو تمويل نشاط إقتصادي..إلخ صعوبة المرحلة دي إنها بتطلب إن الإيداع يتم من غير ما يتم إثارة أي شبهة حول مصدر الأموال عشان الجهات الرقابية متخدش بالها وبالتالى تبدأ تبحث في الأموال ومصدرها الحقيقي.
بعد ما تخلص أول مرحلة تيجي المرحلة التانية وهي مرحلة التمويه ودي معناها إن العميل بيقوم بسلسلة كبيرة من عمليات البيع والشراء المعقدة والمكثفة على سبيل المثال إجراء عدد كبير من التحويلات البنكية بين عدة حسابات مصرفية داخلية وخارجية أو عمليات مضاربة مكثفة على الأوراق المالية في البورصات ودي بيبقي الهدف منها عمل نوع من التمويه والخداع للسلطات الرقابية يصعب عليهم مهمة إكتشاف المصدر الحقيقي للأموال اللى كانت في الأصل غير مشروعة
بعد كده تيجي المرحلة التالتة والأخيرة واللى هي عبارة عن مرحلة دمج الأموال غير المشروعة في قنوات الاقتصاد الرسمي وبكده تكون تمت عملية الغسل بنجاح لأن في المرحلة دى بتكون هناك صعوبة كبيرة في اكتشاف المصدر الحقيقي للأموال دي بعد ما تم زرعها وإخفائها داخل الاقتصاد.
أضرار جريمة غسل الأموال:
جرائم غسيل الأموال ليها أثار كبيرة بالذات على المستوى الاجتماعي والاقتصادي:
فالبنسبة للآثار الاجتماعية هنلاقي إن الدول اللى بتبقي فيها نظم مكافحة غسل الأموال ضعيفة بتصبح مأوى للمجرمين اللى عاوزين يغسلوا أموالهم واللى أصلا بتكون ناتجة عن جرائم غير مشروعة ومن هنا تصبح الدول دي أرض خصبة لإنتشار الجرائم وضعف الأمن، كمان بتزود حالة السخط العام في المجتمع والحقد الطبقي ما أنا لما أكون موظف ملتزم بالقانون وبقبض مرتب ضعيف والاقي اللي بياخدوا رشوة كل يوم بيكونوا أغنى من اليوم اللى قبله لازم أحس بحالة من السخط وعدم الرضا!
أما الآثار السلبية على الاقتصاد فكتير, نقدر نقول إن أرباح جرائم غسل الأموال بتكون بمثابة قنابل موقوتة لأن فكرة ضخ كمية أموال كبيرة في الاقتصاد وسحبها بشكل مفاجىء بيسبب خلل في النظام الاقتصادي زي حدوث تضخم وضعف العملة وركود اقتصادي وضعف الاستثمار وبالتالي زيادة البطالة وزيادة عجز الموازنات العامة وموازين المدفوعات وطبعا بالاضافة للاضطرابات اللى هتحصل في أسواق المال واللى ممكن يصل الأمر بيها إلى انهيار النظام المالي بأكمله..
طيب ايه هي الجهود والتحديات لمكافحة جريمة غسل الأموال ؟
عشان تعرف حجم المشكلة يكفي بس إني أقولك إن كمية الأموال اللى بيتم غسلها كل سنة في العالم تفوق ال2 تيرليون دولار وعشان المشكلة الكبيرة دي تم إنشاء هيئة رقابية في العام 1989 اسمها مجموعة العمل المالي وتسمي إختصاراُ بالفاتف(FATF)، الهيئة دي بتصدر توصيات ومعايير دولية ملزمة لأكتر من 200 دولة حول العالم اللى مطالبة انها تعدل قوانينها المحلية عشان تتوافق مع التوصيات والمعايير دي.
أما على المستوى المحلي فبخلاف تشديد الرقابة والقوانين والاجراءات هنلاقي إن الدول وخاصة النامية بتتجه حاليا لبعض الحلول اللى هتزود بشكل كبير من فعالية مواجهة جرائم غسل الأموال زي الاتجاه ناحية الشمول المالي وتعميم أنظمة الدفع الالكترونية واللي هتلزم المواطنين إنهم يودعوا مدخراتهم في القطاع المصرفي وتقليل التعامل بالكاش وبالتالي تزيد فرص السيطرة على التدفقات النقدية ومراقبتها.
لكن تفضل هناك تحديات كبيرة في الموضوع ده أمام الدول والحكومات من أهمها مواجهة الجريمة المنظمة وإستغلال النفوذ السياسي ومحاربة الفساد بالاضافة إلى إستيعاب طوفان التكنولوجيا المالية واللي فتحت أسواق المال العالمية على بعضها وأنتجت في الوقت نفسه عدد من المنتجات المالية من أبرزها البنوك الالكترونية ومنصات التداول الرقمي والعملات الرقمية زي البتكوين واللى بتسهل كتير عمليات غسل الأموال نتيجة لصعوبة الرقابة عليها.
وبس كدا
سلام
الموضوع التالي
