من أول ما الإنسان بيتولد بتكون جواه الرغبة بالاكتمال..
شعور بيفضل ملازمة بإنه محتاج شريك لحياته؛
وده اللي بيخليه يبدأ رحلة بحث في غاية الأهمية، لحد ما يلاقي نصه التاني، ويكملوا بعض فيبقوا زي روح واحدة في جسمين، المهم بقا هل انت لقيت الشخص المناسب؟ دخلت البيت من بابه؟ مبروك تمت الخطوبة بنجاح، وكهدية خطوبتك هنكون احنا دليلك لخطوبة سعيدة!
فدي شوية مفاهيم ونصائح هتساعدك في خطوبتك.
- اول حاجة لازم تكون فاهم ان محدش هيلاقي حد كامل، بالتالي مينفعش تنتظر من الطرف التاني انه يتصرف زي الملايكة!
كل شخص مننا فيه عيوب، وعشان حياتك تكون مستقرة لازم تختار شخص تكون واثق انك هتقدر تتقبل عيوبه تماما مش بس تتحملها
وعشان كده لازم تكون عارف نفسك هتقدر تتحمل ايه وتتغاضى عنه، وايه مش هتقدر تتقبله بالتالي توفر على نفسك وعلى شريكك خناقات كتير.
- كمان لازم تكون مدرك الفروق بين الرجال والنساء سواء في التركيب الجسدي او الفكري!
فلو انتِ بنت، يبقا لازم تحترمي مواعيد الماتشات وتنظمي مواعيد مسلسلاتك بحيث تتفادي اي صدامات قبل بدايتها، واعرفي ان كل راجل ليه كهف افكار كده بيحب يقعد مع نفسه فيه شويتين تلاتة، في الوقت ده مش مطلوب منك اكتر من انك تكوني هادية وتديله مساحته الشخصية، متفضليش ترني عشرتلاف مرة تحت عذر أصلي قلقانة عليك! يعني مش هتحكيلي! بتخبي عن خطيبتك حبيبتك! هو مش بيخبي عليكي بس فعلا مفيش حاجة يحكيهالك، هو بس كل فترة بيبقا محتاج يقعد مع نفسه شوية، قعدة بلا هدف، وهقولك على معلومة كمان، الراجل معندوش ذاكرة تواريخ، يعني معندوش القدرة انه يحفظ تاريخ ميلادك واول مرة اتقابلتوا واول مرة اتخانقتوا! بالله بلاش الرعب اللي معيشينهم فيه! خافوا ربنا! انتو معندكوش اخوات ولاد ولا ايه!!
أما بالنسبة للرجالة فلازم يراعوا ان الست بتحب مشاركة التفاصيل، مينفعش تطنشها وهي بتاخد رايك في لون مانيكير صباع رجلها الصغير، ولا مثلا تقوللها انا مالي! وإلا هتفضل تسمع تعبير وانا مالي ده كل ما تطلب منها طلب، وحاول على قد ما تقدر تنزل معاها وهي بتعمل شوبينج من فترة للتانية، ده اكتر وقت هتشوف شخصيتها المبهجة فيه، ولو عاوز تقنعها توافق على حاجة انت متاكد إنها مش هتوافق عليها، زي انها تتنازل عن طقم الجيلي مثلا، ف احب اقولك أروقة السوبر ماركت هي المكان المثالي لمناقشة الموضوع ده، لإن هرمون السعادة بيكون عالي في الوقت ده وصدقني مش هترفضلك طلب.
حاجة كمان، الست في الغالب وبالذات في فترة الخطوبة بتحب تبين ان ليها شخصية قوية، وده بيكون تطبيقا لنصيحة جدتها: خطيبك على ما تعوديه، بالتالي ك محاولة منها لفرض شخصيتها، وانها تعودك تاخد ديما رأيها، بترفض اي طلب على صيغة الأمر، لكنها كمان بتوافق على الأمر اللي بيتقال بصيغة الطلب ومن غير ما تفكر حتى، وده بقا ملعبك اللي لازم تكون فاهم تتصرف فيه ازاي، بمعنى انك لو قولتلها متنزليش النهاردة!! هيكون متوقع جدا تلاقيها طلعت لايف من النادي، أما لو قولتلها مثلا: ما تكنسلي خروجة صحابك ونقضي اليوم سوا، هترحب جداا، حتى لو مش هتعملوا حاجة غير انكو هتتكلموا شات او فون شويتين زي كل يوم!
- كمان لازم تكونوا مدركين ان دي مجرد فترة تعارف، فعلى قد ما تقدروا حاولوا ديماا انكو تحافظوا ع المسافات، ومتتعلقوش اوي لإن على قد العشم يكون ال.. واخد بالك انت؟ كمان متنسوش انها فترة اختبار لنفسكو قبل ما تكون كده للطرف التاني، انت بس بتشوف هل هتقدر تتأقلم مع الشريك ولا لا، ورغم كده إلا ان الطرفين بيكونوا متجملين، والنوع الصريح اللي مبيحطش ماسكات ده نادر جداا، فمتحطش توقعات عالية او تشوف اللي قدامك على انه شخص مثالي علشان متتصدمش لما تبقو تحت سقف واحد!
واحب ااكد على ان الراجل السوي كل متطلباته في الحياة هي ان اليوم يمر بهدوء وروقان من غير خناقات وضرب نار، فمتبقيش نكدية.. واخدة بالك انتي؟ وبالنسبة للرجالة فـ احب اطمنك واقولك، ان البنات دول على قد ما بيبانوا معقدين زي بيوت النحل، إلا انهم في الحقيقة أبسط من غزل البنات!
شاركها تفاصيلك، حسسها انها الشيء المؤنث الوحيد في حياتك اللي ليه أهمية، واسمعها بقلبك هتعرف مالها، حتى لو قالت مليون مفيش.
وفي الختام بتمنالكم.. خطوبة سعيدة.
المصدر: كتاب أنقذ زواجك قبل أن يبدأ، لـ ليز باروت و ليزلي باروت
أفكار مشابهة:
الموضوع التالي
