لو حاسس بالإنهاك والتشتت نتيجة ضغوطات الحياة اليومية، وقيودها..
ربما يكون حان الوقت لجعل الاهتمام بنفسك جزء من روتينك اليومي، وبدء العناية بذاتك.
العناية والاهتمام بنفسك وجعل سعادتك أولوية مش أنانية منك.
بل حق لنفسك عليك؛ علشان تقدر تكمل في الحياة.
ودا معناه اتخاذ خطوات تجاه العناية بسلامتك الذهنية، والعاطفية، والروحية، والجسدية.
* معنى العناية بالذات: أن تمنح ذاتك حقها في التقاط الأنفاس.
ودا بالتأكيد مش معناه إنك تسيب كل اللي في إيدك، وتهمل مسؤولياتك وتبدأ تدلل نفسك، بل زي ما قلنا اتخاذ خطوات بشكل متعمد للحفاظ على سلامتك الجسدية، والذهنية، والعاطفية، والروحية.
* غالبًا اللي بيعوقنا عن العناية بذواتنا: الشعور بالذنب.
هسيب الأولاد لمين؟
هخرج وزوجي بدون الأولاد؟
الوقت اللي هقضيه في الاهتمام بنفسي، كنت ذاكرت فيه للأولاد.
وأسباب تانية كتير وجودها بيدفعنا للشعور بالذنب.
بس افتكر إن عنايتك بنفسك: هيديك طاقة كبيرة، تقدر تستثمرها في رعاية الآخرين، مش هيقلل منها.
* من أبسط الأساليب للتخلص من الشعور بالذنب: إنك تمنح نفسك الإذن فعلًا لاستقطاع بعض الوقت، وتخصيصه للعناية بذاتك، وجعلها أولوية.
لو بتنظم وقتك عن طريق جدول فضيف خانة: لوقتك الخاص بذاتك.
وكذلك لو بتستعمل دفتر يوميات، أو رسائل تذكير.
ودا هيخليك قادر تمضي قدمًا في الشيء اللي عزمت على تنفيذه.
حتى لو كان الوقت اللي خصصته قليل؛ المهم تتلزم بيه.
* ازاي تقدر تلاقي الوقت دا؟
ببساطة:احنا مبنستغلش أوقاتنا أمثل استغلال، وبالتأكيد فيه أوقات بنضيعها في حاجات بنعتقد إنها مهمة، بس هي مش كدا.
زي الساعات اللي بتتسحب من تحت إيدينا على السوشيال ميديا.
واللي نقدر نستغلها، ونوجهها للعناية بذاتنا.
كمان فيه أوقات بينية كتير؛ بين الشغل والمواصلات مثلًا، أو الاهتمام بالأولاد والاهتمام بزوجك، أو أثناء أوقات الانتظار..
إنك تقرأ في كتاب مثلًا، أو تتأمل في السما، أو تشرب مشروبك المفضل، ببساطة.. اختار أوقات فراغك لنفسك.
* ولو معندكش طريقة كويسة للتعامل مع المهام والمسؤوليات المتراكمة عليك؟
اصنع قائمة مهام، بخط إيدك.
وسجل فيها كل حاجة محتاج تنجزها، ولما تنتهي من مهمة؛ علم عليها.
الإحساس بإن كل شيء معروف ليك، ومترتب؛ هيخليك تحس بالسكينة، وإنك مش تايه، ولا مضطر تجري في المهام.
إحساس بالنظام، والإنجاز.
بالتأكيد دا مش متعلق بالعناية بالذات، لكنه مهم لتنظيم حياتك، وتقليل مستويات التوتر، الأمر اللي يعتبر ضروري لسلامتك النفسية.
* فيه سؤال مهم: ازاي تقدر تستعيد طاقتك؟
إنك توقف نظام تشغيلك، على الصعيد الجسدي والذهني.
ببساطة: اقفل وسائل التواصل الخاصة بيك، أو إبعادها عنك.
واسمح لنفسك بالانسجام مع حواسك، والاستماع ليها.
ودا بيتطلب من القدرة على قول (لا).
لا، لكل الأنشطة اللي بتستنزفك، أو بتحملك فوق طاقتك، أو ينفع تأجلها.
لطلبات الآخرين اللي بيبتزوك.
لأي شيء هيتسبب في انهيارك.
أقل شيء تقدر تقدمه لنفسك: إنك تمنحها العطف اللي بتمنحه لغيرك.
تقبلها، وترفه عنها، وتساعدها على النمو والنضج، وتعتني بيها.
وأخيرًا:
ايه الأمور اللي ممكن تعتني بذاتك من خلالها؟
1. ترتيب البيت، وإن كان دا مش المتبادر للذهن لما نقول (عناية بالذات).
التخلص من المقتنيات غير الضروريةهيخليك تحس بالارتياح النفسي، ويهدأ عقلك.
خصص 10 دقايق يوميًا لترتيب بيتك، أو جزء منه.
2. ضع لنفسك أهداف عليك إنجازها.
زي الوصول للوزن المثالي، أو إنهاء عدد معين من الكتب، أو زيارة أشخاص محددين.
التخطيط وإنجاز الأهداف هيزودوا من اعتدادك بنفسك، وهيخلوك تخرج برا الكومفرت زون اللي حاشر نفسك فيها بقالك سنين.
بس تأكد إن الأهداف دي نابعة من جواك، مش هرب من المسؤوليات المتراكمة عليك، أو تأثر بأحلام أشخاص آخرين.
3. اهرب لبعض الوقت.
خد أجازة من شغلك مثلًا، وقضِ بعض الوقت أنت وزوجتك.
أو سيبي أولادك لوالدتك مثلًا، واخرجي مع زوجك.
واعتنوا ببعض.
أو اتفق مع أصدقائك واخرجوا في أجازة لمدة يومين في مكان بعيد، بحيث تسترخوا قدر الإمكان.
ولو مقدرتش؛ أجازة نهاية الأسبوع موجودة، تقدر تخرج فيها.
أو حتى تستمتع في منزلك.
وزي ما يقال:
(الوسع في القلوب).
وبس كدا.
سلام.
الموضوع التالي
