في البداية خلينا نعترف ان مش كل والد أب؛ لأن والد يعني أي شخص زوجته ولدت طفل،
لكن مش هيقدر يربي الطفل ده تربية سوية إلا أب واعي ومسئول..
واحنا متفقين ان الغالبية تعرف تخلف، وان كتار يعرفوا يربوا صح، لكن قليلين فعلاً اللي بيعرفوا يربوا بفن..
وطالما قررت تربي بفن هيكون عندك أربع محاور أساسية محتاج كأب إنك تركز عليها:
أول حاجة هي (قدرات ابنك):
اكيد ابنك مش كامل ودا شيء المفروض ميقللش منه في نظرك، لان محدش فينا كبشر بيتصف بالكمال..
ورغم كدا انت لازم تؤمن بيه، خصوصًا في الوقت اللي هو مش قادر يؤمن فيه بنفسه.
تنقله شعورك بالثقة ويا سلام لو تفاخرت بيه في مرأى ومسمع من الجموع والجماهير.
وكمان محتاج تتعرف على مواهبه الظاهرة وتؤمن بيها، او تحاول تستخرج مواهبه المدفونة وتكون انت الداعم الأول والأهم ليه، وفي كل الأوقات بالذات اللي شغفه بينتهي فيها، لازم انت تشجعه..
أحد الممثلين المشهورين كان في لقاء صحفي والمذيعة سألته، هل انت فرحان بالنجاح اللي وصلتله؟ قاللها انه عمره ما شاف نفسه ناجح لإن أهله كانوا ديما يوصفوه بالفشل. فلازم كأهل نكون عندنا الوعي الكافي بتأثير تشجيعنا لولادنا على نجاحهم فيما بعد.
وكمان مهم انك تعرف نقاط ضعفه مش عشان تعاقبه عليها لكن عشان تساعده يعدلها، أو على أقل تقدير يتعايش معاها من غير ما تسببله مشاكل كبيرة
تاني شيء مهم وحساس هتتعامل معاه هي: (طلباته)
هطمنك واقولك انت كأب مش مطالب توفر لابنك كل اللي يتمناه، لكنك مطالب توفرله كل اللي تقدر تقدمهوله.
فمثلا لما واحد من أولادك يطلب طلب وانت هترفض يبق لازم تشرح أسباب رفضك، وتعوض ببديل عن الطلب عشان يثبت حبك.
ولو وعدت بشيء فتجنب تماما انك تنسى وعدك او تخلفه لإن دا اكتر شيء يقلل قيمة كلمتك كأب في اعتبار أولادك.
وحاول كمان تحسسه ان بينكم ميول واهتمامات مشتركة، وانكم بتحبوا نفس الحاجات، مثلا لون معين، فيلم معين، أو حتى أكلة معينة.
وأخيرا وليس آخرًا خليك عادل بين الأبناء لأن التمييز هيولد الكراهية بينهم.
ثالث حاجة هي انك هتتعامل أكيد مع: (أخطائه)
وخليني اقولك ان الأب القاسي بيسبب للأولاد مشاكل نفسية، وبرضوا لو الأب متهاون هيسببلهم مشاكل سلوكية، عشان كدا الحل هو انك تخليك حازم موضع الحزم لين موضع اللين.
ولاحظ ان مينفعش تحسس الطفل ان حبك ليه مشروط بنجاح او فعل او اي حاجة معينة.
لكن لازم تعلمه ازاي يتحمل المسؤلية وعواقب قراراته وتنمي فيه القيم والمبادئ السليمة في الحياة، مهمة مش سهلة أنا عارف، لكنها بردو مش مستحيلة، كل اللي هتحتاجه هو التفاهم والصبر والاستمرارية، مش اكتر.
رابع شيء هو (شكل ابنك)
الشكل مش المقصود بيه الملامح و بس، ده كمان بيتضمن طريقة اللبس وطريقة التعامل وكل حاجة في اسلوبه..
ازاي يتعامل وازاي يمشي وازاي يقعد وازاي يهزر، امتا يضحك وامتا يكون حازم.
والنقطة المهمة هي ان الاب لازم يكون فاهم انه قدوة، بمعنى ان الابن بيتابع كل تحركاته وتصرفاته وبيعمل زيه، بالتالي ضروري جدا ان الاب يتصرف التصرفات اللي عاوز يعلمها لابنه. ويتجنب السلوكيات اللي متليقش بيه ك أب و ك قدوة.
وبالنسبة للملامح و الشكل، فـ احنا عندنا للاسف كمية كبيرة من المراهقين غير راضين عن شكلهم لقله ثقتهم بيه، عشان كدا لازم تحسسه انه جميل. وتفهمه ان الجمال معاييره مختلفة وان الاختلاف دا هو سبب التميز..
وكمان من مثالية الاب عدم مقارنة الابن بغيره من الاصدقاء او القرايب والمعارف لان دا بيقلل ثقة الابن فى ذاته ويحسسه بالنقص وعدم الكفائة، وفي الغالب بيولد الكره جوا الابن للشخص الاخر.
نوصل من كده لإن الأب دوره كبير جدا في التربية، وإنه مسئول عن تقويم ابنه بالذات في المراحل الأولى من حياته وتكوين شخصيته.
وأخيرًا: كان فيه فئة كبيرة فاكرة ان الام وبس هي المسؤولة عن التربية والأب عندهم مجرد خزينة أموال متحركة، ومالوش دعوة بالحنان والعاطفة والتوجيه، وبنستدعيه بس وقت العقاب مش اكتر.
أتمنى تكونوا غيرتو رأيكم بعد الفيديو.
وبس كدا
سلام
المصدر: كتاب كيف تصبح أبا ناجحا/ عادل فتحي عبد الله
الموضوع التالي
