التلخيص مهم جدًا في عملية القراءة؛ لأنه بيساعدك على تكرار المعلومة وتثبيتها، بالإضافة لسهولة استرجاعها.
– بالتأكيد مش كل الكتب هيتم تلخيصها.
الكتب المركزية، أو اللي أنت محتاج تخرج بأكبر قدر استفادة منها.
ايه هو بقى التلخيص؟
إعادة صياغة النص الأصلي صياغةً جديدة في عددٍ أقل من الكلمات والعبارات والجمل مع المحافظة على جوهر النص الأصلي، والإبقاء على أفكاره ومعانيه.
ويقال: لخّصْتُ القولَ أي اقتصَرْتُ فيه، واختصرت منه ما يُحتاج إليه.
وفيه تعريف كمان للتلخيص: إيراد الأصول وحذف الفضول.
وتعريفات التلخيص في اللغة العربية كتير.
بس لو لاحظنا هنلاقيها بتركز على أهم الأدوار المطلوبة للتلخيص، وهي:
1. الرفق بالمتلقي. (القارئ).
ودا لو هتلخص لغيرك يعني، مش لنفسك.
2. الاقتصار على الحقائق والأصول والدرر.
3. الحذف.
4. قلة الألفاظ وكثرة المعاني.
5. التذكير برؤوس المعاني.
وبكدا التلخيص بيضحي بكتير من الموجود في النص الأصلي، من أمثلة ومناقشات وأوجه خلاف.
ودا في مقابل الاستفادة من فوائد التلخيص.
* فيه بعض الشروط محتاجين نراعيها قبل ما نبدأ تلخيص كتاب، وهي:
1. عدم تغيير معلومات الكتاب الأساسية أو التعديل عليها؛ علشان متتحولش المعلومات من صحيحة إلى خاطئة أو محرفة، وبالتالي تفقد أي علاقة بيها بمعلومات الكتاب الأصلية.
2. يفضل عدم تكرار كتابة الأمثلة، أو المقدمة مثلًا، أو معلومات الكتاب الأصلية.
3. التمييز بين النص الرئيسي والنص الثانوي، أو النصوص المتفرعة.
علشان نقدر نحدد ايه المهم، وايه الأقل أهمية.
4. الكتابة بأسلوب متسلسل، وتنسيق الأفكار والمعلومات بطريقة منظمة.
* أما قواعد التلخيص فأربعة:
1. قاعدة الحذف:
ومن خلالها تقدر تحذف كل الجمل التي لا تساهم في فهم النص.
2. قاعدة الدمج:
ومن خلالها تقدر تدمج الجملة في جمل أخرى، لا تشكل شرط لازم أو نتيجة للجملة.
3. قاعدة البناء.
ومن خلالها تقدر تبني جملة من مجموعة جمل، بشرط أن الجملة دي تكون ناتج طبيعي للجمل.
4. قاعدة التعميم.
وتقدر من خلالها تستبدل مجموعة من الجمل بجمل تعميمية تحمل في ذاتها المعاني اللي حملتها الجمل المستبدلة.
* نيجي بقى للجزء المهم، وهو طريقة تلخيص الكتاب:
1. بص على الفهرس؛ علشان تعرف العناوين اللي في الكتاب، وتستحضر تقسيمة الكتاب وأنت بتقرأ.
2. اقرأ الكتاب بطريقة سريعة وشاملة؛ علشان تعرف اللي جواه من أفكار ونقاط أساسية. وتعرف ايه الموضوع الرئيسي اللي بيدور حواليه الكتاب.
3. لما تقرأ الكتاب وتعرف الأفكار الأساسية؛ هتكون حددت طبيعة المعلومات اللي في الكتاب، وفهمت هتتعامل معاها على أي أساس؟
4. هات ورقة وقلم، أو افتح ملف وورد؛ علشان تبدأ ترتب أفكارك، وتشوف ايه المعلومات الأساسية اللي هتبني عليها التلخيص، وايه المعلومات اللي هتتجاهلها.
5. حاول تصيغ الموضوع الرئيسي اللي بيدور حواليه الكتاب بطريقة بسيطة مع المحافظة على أصل الفكرة.
6. بعد كدا اكتب المعلومات الأساسية والمهمة على شكل نقاط أو عناوين رئيسية.
7. اقرأ المعلومات اللي تحت الفكرة وحاول تلخصها.
8. اربط الأفكار أو العناوين الأساسية بالفرعية.
9. لما تنتهي من تلخيص الكتاب راجع الفقرات اللي كتبتها؛ علشان تتأكد إن المعلومات صحيحة، ومفيش خطأ في سرد الأفكار أو ترتيبها، وإن التلخيص متوازن مفيش فقرة بتطغى على فقرة تانية.
ولو لاحظت فيه معلومات غير مهمة؛ ممكن تستغنى عنها.
وممكن تستفيد من أخضر وملخصاته وتستنى حلقة بيشرح فيها فريق أخضر ازاي بيلخصوا الكتب.
وبس كدا.
سلام.
أفكار مشابهة:
الموضوع التالي
