موسوعة أخضر للكتب

في أشخاص في حياتنا … تعليقاتهم خادشة للحياء وأحيانًا بتوصل للتحرش الجنسي، … تلاقيهم مثلا بيقتربوا أكتر من اللازم … مبيحترموش حدود الغير … بيشوفوا اللي حواليهم كغنيمة جنسية أو فرصة لإثبات الذات عن طريق الإيقاع بالشخص…..

سواء كان اللي بيقوم بالتحرش دا راجل أو ست فالعلاقة مع المتحرش صعبة … هي دايمًا محملة برسائل مختلطة واحتمالات خاطئة.

ودا بيسبب عدم الاستقرار وعدم فهم الشخص أو معرفة حدوده ايه؟ أو نهايته فين؟

صفات المتحرش

خلينا نبدا الحلقة ب المتحرشين نفسهم، هما مين وايه صفاتهم

المتحرشين لهم صفات مشتركة: منها علي سبيل المثال الخبث: تلاقيه بيستعمل سلطته مثلا في التسلط على النساء وتحقيق رغباته، وإلا يتعرضوا للفصل أو لعقوبات سيئة. … ساعات بيتم استخدام الخبث عن طريق عمل حيل ردئية زي فتح الباب المقفول من غير استئذان أو التعدي على خصوصيات الشخص أو السلام بشكل مبالغ فيه أو التلميحات الجنسية…. كل شخص وطريقته.

كمان من ضمن صفات المتحرش الغرور: دايمًا بيفكر في شكله قدام الناس، ومظهره. وأي ست لامحالة لازم تقع في غرامه، أو أي راجل لازم يعجب بيها، وإلا تكون فاشلة كأنثى.

بردو الشعور بالوحدة من صفات المتحرش: هو شايف إن الطريقة اللي يقدر يملا الوحدة دي بيها إن الناس تعجب بيه (أو بيها) ويقعوا في غرامهم.

التضليل كمان من صفات المتحرش … هو بيتعمد استخدام أفعال لها أكتر من دلالة في حين إنه يقدر يستخدم أفعال دلالتها صريحة.

زي إنه يبعت لزميلته في الشغل مثلًا هدية غالية أو بتعبر عن شيء حساس، في حين إنه يقدر يقولها كل سنة وأنتِ طيبة وخلاص … بينصب الفخ علشان الشخص يقع فيه بنفسه، ولو موقعش؛ يبقى هو تصرفه كان عادي مش أكتر ومش مشكوك فيه

كمان من ضمن اهم صفات المتحرشين التعطش للقوة: الاستيلاء على الناس وإيقاع الناس في غرامهم مش تعبير عن الحب ولا رغبة في إقامة علاقات مستمرة، لكن هو تعبير عن القوة هو بيحس بيه ف السيطرة على الناس

اخر صفة بيمتاز بيها المتحرش هي الانتهاز: هو دايما عنده طريقته في خلق فرصة واستغلالها بشكل سريع.

بدل ما السكرتيرة ترجع بيتها بتاكسي فهو يعرض إنه يوصلها في طريقه … وتتحول المواصلة دي لشكل يومي ويبدأ يقرب لها أكتر وأكتر … وهكذا

التعامل مع المتحرش

طيب دا بالنسبة لصفات المتحرش … ازاي بقي ممكن نتعامل معاه وازاي تتعامل مع التحرش بشكل عام لو تعرضتله

١- متلومش نفسك

متدخلش في دوامة من الشعور بالذنب.

الشخص اللي بيتعرض للتحرش غالبًا بيسأل نفسه أنا عملت ايه غلط علشان دا يحصلي؟

أو فين المشكلة؟

هل لبسي؟

هل تصرفاتي؟

ببساطة المشكلة مش فيك، لكن في الشخص اللي تعدى على حدودك.

٢- متكنش مع الشخص المتحرش في مكان لوحدكم.

ودا من أفضل سبل التعامل مع المتحرشين قبل ما يبدأوا أصلًا … إننا نحجم دوره ونخلي كل تعاملاتنا قدام الناس، بحيث ميلاقوش منفذ أو نقطة ضعف يدخلوا منها.

٣- خلي علاقتك العاطفية بشريك حياتك واضحة.

سواء كنت خاطب أو متجوز وضح دا بشكل صريح.

ومن الطرق اللي ممكن تطفي بيها نار الشخص المتحرش إنك تتقرب لشريك حياتك لو كنتم مع بعض تمسك إيده مثلًا أو تقرب منه، وتتجنب نقده قدام الشخص دا؛ علشان ميعرفش إن فيه خلافات بينكم يقدر يستغلها.

وممكن تستعين بشريك حياتك على إبعاد الشخص دا عنك، ولو بالقوة- لو تعدى حدوده بشكل صريح.

٤- ارفض تكون ضحية.

انت لو ردود فعلك مكنتش واضحة ومعبرتش عن غضبك وعدم قبولك للي بيعمله دا بشكل صريح فهيشوف سكوتك دا (قبول).

عشان كدا وضح بشكل حازم وصريح من أول مرة رفضك وصعد التعاملات دي لأشخاص أعلى؛ بحيث يوقفوا الشخص عند حده.

ارفض التعامل على إنك مغلوب على أمرك وأكل عيشك هيتقطع أو يخوفك إن الناس هتعرف اللي هو عمله ايه؟

لأن دا هيدخلك في دوامة من الابتزاز مش هتعرف تطلع منها

٥- خلي ردود فعلك حازمة.

ممكن تقول مثلًا:

(خليك في مكانك دقيقة لو سمحت، او خلينا نتكلم كزملاء في الشغل وبس).

عبارات زي دي مفيهاش عجرفة ولا سوء أدب، أنت بتوضح حدود وطبيعة علاقة الشخص بيك، الطريقة دي ف الكلام هتخليك تتولى زمام الأمور وتقود الموقف.

وأفضل حاجة ممكن توصل للشخص المتحرش رسالة إنك مش صيد سهل هي الثقة … لما يحس بثقتك في نفسك هيخاف منك.

٦- استعين بصديق في الشغل.

يساعدك على صد الشخص المتحرش دا … متواجهش الأمر لوحدك.

وبس كدا 

سلام