موسوعة أخضر للكتب

النهاردة … هحكيلكم حكاية النرجسي

وكلمة نرجسي هنا .. دي انا قصدي بيها تحديدا النرجسي المتطرف

مش النرجسية نفسها كقابلية اللي هي موجودة بشكل مش كبير اوي عندي وعندك وعند كل الناس تقريبا .. 

انا بكلم عن صفة موجودة ف ٤ ف المية من البشر – ال ٤ ف المية دول اللي صاحبنا بطل حكاية النهاردة منهم … عندهم حاجة اسمها القابلية النرجسية عالية جدا … 

ورا بطل حكايتنا واللي زيه احساس قوي بالعار

احساس عميق بالعار من شي غلط حصله ف الطفولة 

الاطفال اللي اهاليهم كانوا مهمللينهم او غايبين عنهم بيبدوا يحسوا ان فيهم شي غلط كبير جدا فيهم هما

بيشوفوا ان الاهمال دا غلطتهم هما خطاهم هما 

دي ع الاغلب بتكون بداية احساسهم بالعار 

بيعشوا حياتهم بالاحساس دا … بس بيكون خامل … بينشط امتي بقي … اما يواجه حاجة اسمها جرح نرجسي

اما يحسوا بموقف ممكن يكون بيقلل منهم … والموقف دا ممكن يكون مجرد اهانة بسيطة اوي او حتي موقف عادي تماما مفهوش اي اهانة بس هما يشوفوه مهين … ساعتها وكان حد ضربهم بسكينة

هما بقي عايشين حياتهم بالطريقة دي … خايفين جدا من ان حد يجرحهم الجرح دا… ودا وضع مزعج … تخيل انك ماشي مهدد ٢٤ ساعة تنجرح … فبيعملوا ايه؟

بيطوروا نظام دفاع قوي يحميهم من الجروح النرجسية دي … النظام دا بيكون ع الاغلب هجومي … هو هيجاهم الناس مش هيستني اما يتحط ف مواقف يهاجموه فيها

طريقتهم ف الهجوم بتختلف … هنقول في حكاية النهاردة اربع انواع منهم

النرجسي المتنمر

اول واحد هو النرجسي المتنر او النرجسي البلطجي … صاحبنا دا عدواني … ومهوس بالمنافسة … هو مقسم العالم لنصين نص كسبان ونص خسران … وطبعا مينفعش ابدا يكون ف الجانب الخسران … لازم يكون دايما ف الجانب الكسبان … هوسه بالمكسب بيخليه بيدفع الناس للخسارة … بيمشي طول اليوم عمال يخسر ف الناس

وهو صغير كان بيضربهم … ووهو كبير بيلقح عليهم بالكلام

التنمر عنده اسلوب حياة … تسليته ف الحياة انه يدور علي الناس الضعيفة ويتسقوي عليها … بيصحي الصبح بيقول ف سره … بسم الله الرحمن الرحيم هندوس علي مين النهاردة

هو اما يعمل دا بيحس انه قوي

الشي الغريب ان النرجسي البلطجي المتنمر دا وضحايا … الاتنين شبه بعض جدا من جوا … يبان ان فيهم واحد قوي وواحد ضعيف … بس ف الحقيقة الاتنين حاسين بعدم الامان وحاسين انهم اقل من غيرهم

النرجسي المغري

دا بالنسبة للنرجسي المتنمر … نيجي بقي لتاني نوع … النرجسي المغري او المخادع … 

النرجسي اللي فات بيمشي ف الحياة يضرب الناس ويشتمهم ويتشاكل معاهم … بيحس انه افضل منهم بانه يضربهم او يهينهم او ينزلهم تحته ويطلع علي كتفافهم

النرجسي دا بقي المغري … غير مباشر .. لو بيتعامل معاك مثلا … هيديلك اهتمام – هيحسسك انك نجمة وانك شي مهم جدا عنده … بس مش عشان هو بيحبك فعلا لكن عشان عايزك تحبيه

النوع دا من النرجسين بيستغلوا قابليتك النرجسية بشكل يخدمهم – هيعمل انه بيحبك جدا … هيعمل انه بيسمعك … هيحسسك انك مرغوبة ومهمة لمجرد بس انك تعامليلي زي ما بيعملك ف المقابل وتحبيه … بعدين هيتحكم فيكي

مجرد ما تقعي ف شبكته – بعدها اما يتاكد انك خلاص اعتمدتي عليه

ساعتها هيبدا مرحلته التانية وهي انه يلعب علي نقط عدم الامان عندك عشان يخليكي دايما معتمدة عليه

الناس اللي محصلوش علي حب كفايا ف ماضيهم او خسروا حب قوي بالنسبالهم ف الطفولة ك الاب او الام – بتكون نرجسيتهم من النوع دا  – خبرتهم في ف خساره الحب او ف عدم تلقي الحب بيكون مؤلم جدا لدرجة انهم مش بيعرفوا يحبوا تاني

دا بيخليهم عندهم مقاومة ف التعلق بالناس … مش بيتعلقوا بحد – بالطريقة دي بيتكتسبوا قوة … هما كدا ممكن يقدروا يقدروا يخلوا حد يقع ف حبهم ويتعلق بيهم بدون ما هم نفسهم يتعلقوا بيه

النرجسي العظيم

تالت نرجسي ممكن تقابله هو النرجسي العظيم … ودا اللي شايف انه من طينه تانية

كل النرجسين اه عايشبين ف عالم خيالي حاسين فيه انهم احسن ناس .. النرجسي العظيم بقي عايش في بعد تاني مش عالم تاني

شايفين ان هما فوق معايير المجتمع .. اللي المفروض متطبقش عليهم … ساعات هما اصلا بيشوفوا المجتمع معاييره ايه ويعملوا عكسها بدون اي هدف … هو مش عارف يخلي نفسه مهم والناس تتكلم عليه بالطريقة العادية فيعمل ايه يثير استهجان الناس ويهيين معتقداتهم … لمجرد انه بس ياخد الاهتمام

بتلاقيهم دايما وحيدين ومقتنعين انهم عباقرة مش مكتشفين … علي الرغم من عدم وجود انجاز واحد يوحد ربنا يثبت فكرتهم العبقرية عن نفسهم دي

النرجسي الصالح

اخر نرجسي هو النرجسي الصالح … ودا اللي بيدعي التفوق الاخلاقي

النرجسي الصالح مؤمن بشكل قاطع ان هو الوحيد اللي عارف ايه الصح وايه الغلط

انت يا اما تكون مقتنع بوجهه نظره وف الجانب بتاعته … يا اما انت عدو ومش عدو ليه بس لا دا انت عدو لكل ماهو مقدس وكل ماهو خير

النرجسي الصالح دا اول ما تقابله هتحس انه طيب اوي … حاجة كدا مثالية … ممكن يكون مشترك ف نشاط خيري .. مشترك ف جماعة دينية … بيحاول يحل مشاكل اجتماعية

كل اللي انت شايفه دا قناع .. هو مش بيعمل كدا عشان هدفه يصلح المجتمع فعلا ولا هدفه الخير … لا ياعم هو بس مستخبي ورا قناع الاخلاق عشان يخبي رغبته الحقيقة انه يحس انه احسن مني ومنك ومن بقية الناس

عندك مثلا بعض النباتين المتشددين نقدر نقول عليهم انهم بيقعوا تحت التصنيف دا … طبعا انا مش بتكلم عن كل النباتين … لكن بتكلم علي نوع معين منهم انت عارفه كويس .. نوع منهم مش مهتم لا بالنقاش ولا بالحجج … هو مقسم العالم لابيض واسود لناس طيبة وناس شريرة وهو طبعا ف الجانب الطيب … وانت لو مش معاه فهيحكم عليك ساعتها بكل قسوة

ازاي تقدر تتعامل مع النرجسي؟

خلصنا الاربع انواع المشهورة من النرجسين … ممكن نختم حكاية النهاردة بجزء بسيط عن التعامل معاهم

بص … التعامل مع النرجسي المتطرف اه صعب بس ممكن … هما نقطة قوتها بتكون كلهم هو ف تاثيرهم علي احترامك لذاتك … النرجسي المتنمر مثلا يتريق علي شكلك فانت تتاثر … النرجسي المغري يخليك تتعلق بيه وتربط احترامك لنفسك بحبه ليك ويتلاعب بيك

سلاحهم هو لعبهم علي احترامك لذاتك … عشان كدا الطريقة الوحيدة للتعامل معاهم هي بتقوية احترامك لذاتك دا … لو عملت كدا هتبقي  هربت برا نطاق هجومهم اصلا

بص لنفسك ف المراية وتقبل انت مين … تقبل اللي انت شايفه … ساعتها النرجسين مش هيقدروا يلعبوا انهم يخلوك تحس انك قليل … لانك بقيت فاهم نفسك وفاهم كل حركاتهم