أشهر ٥ مغالطات منطقية
محتوى
في تواصلنا العادي مع بعض … الكلام … مبيكنش مجرد … ولا صيغته واضحة …. الكلام بيكون مغلف بانفعالات، وأعراف ودلالات…
من الحاجات اللي بتغلف كلامنا العادي … المغالطات المنطقية.
المغالطة المنطقية هي خطأ في الاستنتاج والتفكير .. ممكن نقول إنها حجج باطلة بتاخد شكل الحجج الصحيحة. وهي بتستخدم عادةً لخداعنا
خليني اقولك النهاردة في الفيديو دا أشهر ٥ مغالطات منطقية انت بتتعرض لها في الحياة اليومية
مغالطة تسميم البئر
اول مغالطة هي مغالطة تسميم البئر وهي ببساطة تشويه رأي ما بصورة غير مباشرة عن طريق تسفيه مصدره، أو تكذيبه، أو إهانته.
مثلا اني اقول الكلام مسبق بجمل زي: (مش ممكن حد عاقل يصدق كذا..)، أو (الغبي بس هو اللي هيقتنع بكذا..)، أو (بعض السذج بيعتقدوا كذا..). و عبارات شبه الجمل دي ..
خلينا ناخد مثال محدد، مثلا جملة (الأغبياء بس هما اللي بيؤمنوا بكروية الأرض).
الجملة اللي قولتها دي بتخلي إن مينفعش حد يعارضها من غير ما يدخل في جملة الأغبياء. كمان عرضها بالشكل دا؛بيخليها متتعداش انها تكون مجرد تأكيد، وتحتاج لدليل يؤيدها.
تسميم البئر، محاولة ملتوية، ومخادعة في النقاش؛ لأن اللي بيستعملها غالبًا بيكون عارف إن اللي بيناقشه بيعتنق الرأي المخالف له، فبيحاول احتقار رأيه، وإهانته.
ومواجهة الأسلوب دا بيكون بالإنكار الفوري للجزء المسمم من العبارة، وبعد كدا توضيح الأسباب؛ اللي بتوضح صحة موقفك، ومعقوليته.
وممكن تسأل اللي أطلق الوصف دا؛ عن السبب اللي خلاه يصف كل من يعارض رأيه بالغباء؟ موضح ليه إن دا مجرد تأكيد فارغ، وإنه من قبيل المصادرة على المطلوب.
مغالطة السؤال الملغّم
المغالطة الثانية هي .. مغالطة السؤال الملغوم .. انك يتم سؤالك سؤال يحتوي على افتراض مسبق بحيث انك اما ترد عليه هتبان انك مذنب بدرجة ما سواء عارضته أو وافقت عليه
اسالك مثلا انت امتى بتفكر تتعالج من الإدمان … او انت امتي هتتوقف عن العنصرية
بغض النظر عن انك كنت فعلا بتمارس السلوكيات السلبية دي والا لا … انا هنا يهاجمك في شكل سؤال – و يضطرك للدفاع عن نفسك
المغالطة دي دايما بُتستخدم علينا في تغيير مسار النقاش لأن طبيعتها مستفزة .. اول ما تتقالك هتتوقف عن اللي انت كنت بتتكلم فيه وتلاقيك بقيت مضطر تدافع عن نفسك .. عشان متظهرش بشكل المذنب
مغالطة المقامر
تالت مغالطة هي مغالطة المقامر .. ودي اني اكون شايف أن نتائج إعادة المحاولة مرتبطة بحدث هو في الحقيقة مستقل عنها.
باختصار معناها إن تكون شايف ان فرصتك في الفوز مثلا هتزيد كل ما تزيد خسارتك. ودا بيكون واضح في لعب القمار مثلًا؛ وإيمان اللي بيلعبوا إن عدم الفوز لفترة طويلة بيرفع احتمال الفوز بصورة كبيرة في الرهان الجاي. أو بكرا أو بعده؛ فيقول مثلًا: (أنا مكسبتش النهارده، ولا امبارح؛ ففرصتي في الفوز بكرا هتكون أعلى .. أو العملة جت تلات مرات علي وضع الكتابة .. اكيد المرة دي هتيجي علي وضع الصورة).
المقامر بينسى إن فيه قوانين للاحتمالات؛ فلو رميت عملة نقدية مثلًا على الأرض احتمال ظهورها على الكتابة أو الصورة متعادل. ولو رميتها 100 مرة؛ فاحتمال ظهورها على الصورة 50 وعلى الكتابة 50.
مغالطة “ليس اسكتلندي حقيقي”
رابع مغالطة هي … ليس اسكتلندي حقيقي .. وفي الحجة دي الواحد بيلجأ للمثالية عشان يخفي ضعف حجته او يدحض انتقادات الاخرين ليه
اقولك مثلا .. الجنوب افريقيون مش بيسرقوا .. كلهم اخلاقهم عالية .. فتقولي الراجل دا جنوب افريقي وحرامي .. فتغضب وتقولي .. هو مش جنوب افريقي حقيقي .. مفيش جنوب افريقي حقيقي بيعمل كدا
ف المغالطة دي ايمان الشخص غير قابل للنقض لانك مهما طرحت من ادلة هيستمر الطرف التاني ف تحريك النقطة المراد الوصول ليها في الحوار بشكل مش هينطبق عليها دليلك .. النوع دا من الحجج بيتم استخدامه لتجنب الانتقاد الواقعي الموجه للفكرة المطروحة
مغالطة حدث بعده، إذا هو سببه
خامس وآخر مغالطة … هي مغالطة حدث بعده اذا هو سببه، المغالطة دي شكلها بسيط وهو أن أ حدث قبل ب .. يبقى أ سبب ب و ب نتيجة ل أ.. وهكذا يفترض ان هما سبب ونتيجة لأن وقت حدوثها حصل بعد بعض
خلينا نقول مثال
قدامنا اهو رسم بياني يوضح أن درجة حرارة الارض ارتفعت القرن اللي فاتت .. وف نفس الوقت عدد القراصنة قل .. يبقى برودة درجة الحرارة بتسبب انتشار القرصنة
ف الحقيقة مش معني ان حادثتين حصلوا ورا بعض او مع بعض انهم سبب ونتيجة ممكن تكون ف حادثة تالتة سببت الحادثتين او الاتنين حصلوا مجرد صدفة بحتة
وبس كدا.
سلام!
