الصحيان بدري. والصحيان بدري دا معناه إنك تنام بدري. الأسبوع فيه 168 ساعة، تقريبًا بتقضي تلت الساعات دي في السرير نايم … بقية اليوم بيعتمد على التلت دا. لما تنام كويس، وتصحى براحتك، هتعرف تاخد راحتك وتكون منتبه. الأشخاص اللي بيحبوا الإنجاز عندهم اهتمام كبير بوقتهم والحفاظ عليه. لدرجة إنهم مش عاوزين يضيعوا أي دقيقة منه. مش عاوزين يصحوا مصدعين أو مش عارفين اليوم هيضيع في ايه؟ في المواصلات ولا في النت ولا في الشغل اللي هما متأخرين عليه. نام بدري واصحى بدري؛ علشان صحتك تكون أفضل وتركيزك يبقى أعلى. ركز مع اللي بتعمله. هقولك تجربة شخصية. لما بقرأ في كتاب وأعمل حاجة … برجع ألاقي نفسي مش مركز ودماغي مشتتة ومش عارف دا من ايه؟ لحد ما لاحظت نفسي وفهمت. وأنا بقرأ كل شوية ببص للتليفون وأفتح النت أو أرد على رسالة، ودا بيضيع تركيزي وبيفصلني من الحاجة اللي كنت بعملها، وبيعملي صداع. العلماء لقوا إن علشان ترجع لتركيزك تاني بعد مكالمة تليفون محتاج 15 دقيقة. يعني شوية مكالمات أو إشعارات كفيلة إنها تضيع يومك من غير أي إنجاز. للتعامل مع الوضع دا … حاول تستخدم مهارة اليقظة، وتركز في (هنا والآن)، تركز في اللحظة الحالية يعني. ومن الأفضل لو خليت كل المشتتات بعيد عنك؛ علشان تعرف تركز في اللي بتعمله ومفيش حاجة تقاطعك. وتركيزك يفضل مستمر. اعمل خبرة سارة. وأنت خارج مثلًا البس نضارة شمس (أنت عارف إنها جميلة عليك). عطر جميل. ترتب الأوضة. تقابل صاحبك (اللي بيحبك) وتحضنوا بعض. وهكذا ركز مع مشاعرك وعواطفك. اسأل نفسك أنا زعلان ليه؟ ايه اللي حصل انهارده ضايقني؟ الإحساس دا جاي منين؟ أنا ليه افتكرت الذكرى دي؟ ولاحظ امتى ثقتك في نفسك بتكون عالية؟ امتى بتكون فرحان؟ وايه اللي بيغير مزاجك؟ كل ما ركزت مع مشاعرك وعواطفك وعرفت تتابعها هتقدر تتحكم فيها مرن جسمك. جايز سمعت النصيحة دي كتير، بس فعلًا الرياضة مهمة لصحتك النفسية والجسدية. ولو مش قادر تروح الجيم أو تخرج تجري، ممكن تعمل تمارين بسيطة في البيت. شوف ايه التمارين اللي بتستمع بيها واعملها بانتظام. انفرد بنفسك. التمرين دا مفيد جدًا لو مبتتعرفش تتحكم في نفسك واللي على لسانك بتقوله، أو بتحس بالوحدة لو الناس مش حواليك، أو التليفون مش في إيدك. محتاج تتعرف على نفسك وتأنس بيها. حدد لنفسك عشر دقايق كل يوم لوحدك. ابعد كل الأفكار عن دماغك، وركز مع نفسك. وسيبها تقول اللي هي عوزاه. عشر دقايق مع نفسك وبس. ولمزيد من التفاصيل (ممكن تشوف حلقة فقه النفس اللي عملناها قبل كدا؛ هتلاقي رابطها في التعليقات تحت). اخرج برا الشرنقة. اخرج برا أوضتك شوف القمر والنجوم بالليل. اتعرف على أسماء النجوم وأماكنها في السما. فيه عالم كامل برا أوضتك. صيف وشتا وخريف وربيع وزهور وشمس وقمر وأنهار ومطر. اخرج ولاحظ إنك جزأ من شيء أكبر منك بكتير، أنت مش لوحدك في الكون. ولا نفسك بس اللي تقدر تعتمد عليها. وحتى لو عايش في مدينة اخرج وروح حديقة وامشي من غير الجزمة على العشب. خليك كريم. ساعد صاحبك المزنوق في الميد ترم. ساعدي والدتك في تحضير الأكل. شوف جارك لو محتاج حاجة ساعده بيها. روح انت وبادر لانه (أكيد مش هييجي يقولك ساعدني). الكرم والعطاء بيحسسنا باحترامنا لنفسنا وإننا عايشين. وإننا بنأثر في حياة غيرنا، وبنساعدهم حتى ولو بحاجات قليلة. فكر في انهارده وبكرا. آخر اليوم أتكلم مع نفسك. شوف يومك قضيته في ايه؟ ايه اللي كنت ناوي تعمله، وعملته فعلًا؟ وايه اللي معملتوش؟ وليه؟ اتعلم من أخطائك، وخطط ليومك؛ علشان إنجازك يكون واضح ليك. وكل ما إنجازك بيكون واضح ليك كل ما ثقتك بتزيد وبتتشجع تكمل. تواصل مع هدفك في الحياة. الشغل؟ الأولاد؟ الزوج؟ الزوجة؟ الدراسة؟ الدين؟ جايز الإجابة متكنش جاهزة الوقتي، بس فكر، وهتلاقيها. مش شرط هدفك دا يكون حاجة كبيرة. ممكن يكون هدفك متأذيش الناس. هدفك أسرتك تكون بخير. أو هدفك تحافظ على صحتك. أو تساعد غيرك. التواصل مع هدفك دا هيمنحك المعنى والقوة، ويظبط بوصلتك. وبس كدا. سلام.
