العادات المرنة: كيفية إنشاء عادات أكثر ذكاءً تتكيف مع يومك
العادات المطاطة
تخيل يا صديقي إنك قدام محيط
موجه عالي
ومش مستقر
وكل شوية ارتفاع الأمواج بيتغير
ورحت انت مقرر بكل ثقة
إنك مش بس تنزل الميه لأ دا أنت هتعوم عكس التيار
ومتوقع كمان إنك هتوصل للبر التاني!!
تفتكر ايه النتيجة؟
طبعا انت عارف النتيجة هتبقى ايه
أصل انت مش مايكل فيليبس يعني
شفت الموقف التخيلي ده
ده مثال بسيط معبّر عن الحياة
الحياة شبه المحيط
والأمواج العالية هي التغيرات في الحياة
أما سيادتك اللي عايز تعوم ضد التيار
فده بيعبر عن عاداتك اللي بتفشل تحافظ عليها..
أصل مين فينا مقررش يطور من نفسه
سواء في رياضة أو علاقات أو شغل
وبدأ متحمس في اليوم الأول
وبعدين مع الوقت بدأ يقطّع
لحد ما بيفشل ويبطل العادة
طب ليه؟
ايه سبب فشلنا في الحفاظ على العادات؟
مع إنك قرأت كتير وسمعت أكتر عن العادات
متقلقش يا صديقي
أنا هقولك انت بتفشل ليه في الاستمرار في العادات
وكمان هقولك تحل المشكلة دي ازاي
وهطلّعك من الحلقة دي بمفهوم جديد عن العادات
وهو مفهوم العادات المرنة
كل ده في حلقة النهاردة المبنية على كتاب:
Elastic Habits: How to Create Smarter Habits That Adapt to Your Day
أو.. العادات المرنة: كيفية إنشاء عادات أكثر ذكاءً تتكيف مع يومك
لـ
ستيفن جيز
تعالى بقى نشوف ايه موضوع العادات المطاطة أو المرنة؟
ليه بنفشل في الالتزام بالعادات؟
خليني ابدأ بسؤال المشكلة
ليه بنفشل في الالتزام بالعادات؟
سؤال بيحير كل واحد فينا
خصوصًا لما نكون فاكرين إننا خلاص هنتغير
وهنبقى نسخة أفضل من نفسنا
ونبدأ في روتين جديد أو عادة جديدة
وبعد أسبوع نلاقي نفسنا رجعنا لنقطة الصفر
طب ليه بنفشل؟
ايه بتعصبك كلمة فشل وبتفكرك بدرجات الامتحانات؟
طب يا فاشل يا فااااشل
تعالى بقى نعرف أسباب فشلك ايه
مش في الامتحانات طبعا
في العادات
عندنا 3 أسباب في الفشل ده:
- أول سبب هو العادة الصلبة
يعني إيه؟
يعني لما تكون حاطط لنفسك روتين جامد أوي
زي إنك تجري كل يوم الساعة 6 الصبح بالظبط
أو تذاكر ساعتين آخر النهار
بس تيجي في يوم من الأيام
يحصلك ظرف مفاجئ
ضيف جالك
وراك مشوار ضروري
صحيت متأخر
اتسحلت في مسلسل 90 حلقة
فتقول لنفسك: "خلاص، النهاردة مش هجري، هجري بكره بقى إن شاء الله."
لإنك متعود إن عادة الجري صلبة مش بتتغير
معادها محدد ومدتها ثابتة
أنا متعود أبدأ الساعة 6 و 43 دقيقة
لو الساعة بقت 6 و 44 دقيقة
مش هعمل العادة
أنا حر
إلا تنظيم الوقت اه
أنا سمعت يجي 15 ساعة بودكاسات عن إدارة الوقت
وعارف أنا بعمل ايه!!
وده ياخدنا للسبب التاني لفشل العادات
- وهو عقلية الكل أو لا شيء
يا إما هبطل السجاير خالص
أو هدخن بشراهة
طب لو بطلت وشربت سجارة واحدة في اليوم؟
يبقى ده فشل وهرجع للعادة دي
أو يا إما هصلي كل الصلوات بالنوافل
يا إما مش هصلي خالص
للأسف عقلية الكل أو لا شيء دي مدمرة لأي عادة حقيقية
لأن البشر بطبعهم نفسيتهم بتتغير
النهاردة انت متحمس تتعلم اسباني
علشان تحفظ نشيد ريال مدريد
أو تتفرج على مسلسل لا كاسا دي بابل من غير ترجمة
يجي بكره
تلاقي نفسك زهقت من الاسباني
وحبيت تتعلم الإيطالي علشان أفلام المافيا
وتبقى الدون محمود كورليوني راح
الدون محمود كورليوني جه
وطبعا بعد بكرة هنتعلم برمجة معروفة
علشان نشتغل بالدولار
وده ياخدنا للسبب التالت لفشل العادات، ألا وهو:
- الاعتماد على الدافع
الدافع في العادات بيبقى شبه البنزين
كده كده هيخلص
مش كفاية تبقى متحمس أو شغوف بالعادة الجديدة
ولكن الصح إنك تبني نظام مرن
يخليك تحقق الحد الأدنى من النجاح في العادة دي
حتى في الأيام السيئة والظروف المنيلة
أيوة يعني ايه الحل بردو؟
ازاي تخلي العادة مرنة؟
العادات الناجحة يا صديقي محتاجة لاموخذة شوية مرونة
علشان العادات المرنة تقدر تعملها حتى في ظروف متغيرة
أو أحداث مفاجأة بتغيّر شكل يومك
طب ازاي العادة تبقى مرنة؟
عن طريق إننا نقسم العادة لـ 3 مستويات
- Mini
- Plus
- Elite
أو يعني المصغر، والأعلى، والفائق..
المستوى الأول اللي هو المصغر
بيضمن لك تعمل أقل مجهود ممكن من العادة
وده هو الحد الأدنى اللي في أسوأ الأحوال هتحققه.
فمثلا لو بتعمل رياضة هتتمرن تمارين كارديو لمدة 10 دقايق بس
طب والمستوى الأعلى أو ال Plus؟
هنا هنرفع الجهد شوية
وهنتمرن لمدة نص ساعة
طب لو عايزين ندوس كمان؟
يبقى وصلت للمستوى الـ elite أو الفائق
هنا بقى نتمرن لمدة ساعة
هتقولي طب ايه الفكرة من تقسيم العادة ل 3 مستويات؟
هقولك لسببين
السبب الأول إنك تضمن حد أدنى من النجاح
مهما كانتت ظروفك
والسبب التاني هو التغلّب على المماطلة والتردد
ماهو لما يبقى قدامك خيار واحد بس
فأنت يا إما هتختاره أو هتسيبه
بديهيات
أما لو قدامك كذا اختيار هيبقى وضعك أحسن..
فلو تعبان شوية ممكن تختار المستوى المصغر
ولو متحمس ورايق يبقى ادخل في المستوى الفائق
بالطريقة دي انت خليت العادة مرنة
يعني قابلة للتكيف مع الظروف الخارجية وحالتك النفسية
بدل ما كانت صلبة وثابتة ومقيدة
- بس معلش يعني يا أخضر
أنا عندي سؤال
ايه اللي يضمن لي إن طريقة العادات المرنة دي هتنجح معايا وهقدر ألتزم بعادة معينة بشكل مستمر؟
ما كل كتب العادات بتقول كده!!
هجاوبك يا صديقي
ليه العادات المرنة هتنجح؟
ميزة العادات المرنة إنها متوافقة مع طريقة عمل الدماغ
الدماغ يا صديقي بيشوف العادات ازاي؟
بيشوفها على طريقة:
المحفز- الروتين- المكافأة.
المحفز هو الدافع لعمل العادة
الروتين هو تكرار العادة بانتظام
والمكافأة هي نتيجة العادة
يعني مثلا
أنا هذاكر صيني علشان أشتغل بمرتب 50k
ده الحافز
حطيت نظام مذاكرة لسنتين والتزمت بيه
ده الروتين
وأخيرا المكافأة هي إني اشتغلت وقبضت المرتب
العادة المرنة بقى ايه تأثيرها في القصة دي كلها؟
إنها بتدي الروتين شوية تنوع
بدل ما يحصل ملل من التكرار الكتير
فخد يا دماغ شوية options مختلفة أهي
ده غير إن الأوبشنز المختلفة دي
متحددة من قبل كده
فده بيقلل من الإرهاق العقلي
مش لسة هتفكر توصل ازاي لهدفك وتعمل ايه النهاردة..
لا
اللي هتعمله واضح ومعروف
وده بيسهل الالتزام بالعادة
بس في حاجة انت ناسيها يا صديقي
لا غير إنك تعمل لايك للحلقة وتشترك ف قناة أخضر وتحمل التطبيق على موبايلك لو مش عندك..
نسيت إن العادات المرنة بتعمل حاجة مهمة جدا
وهي إنها بتضمن لك حد أدنى من النجاح اليومي
النجاح ده حتى لو صغير
لما بيتراكم
فهو بيشجع دماغك إنها تستمر في تكرار العادة
وبالتالي تتعزز أكتر
وتثبت أكتر
اتفضل بقى وقف الحلقة وروح اعمل اللي انت نسيته
لا مش العادة المرنة
اللايك على الحلقة والاشتراك في القناة وتحمّل التطبيق اللي هيساعدك تخلي حياتك أحسن يا بيه
ازاي تتغلب على صعوبات نظام العادات المرنة؟
طبعا انت فاكر كده الحلقة خلصت
والدنيا سهلة ولذيذة
لا يا صديقي للأسف
حتى لو نفذت كلامي
وطبقت نظام العادات المرنة
هتلاقي بردو صعوبات
وممكن تنتكس في أي وقت
وممكن تفقد الشغف أو الدافع للعادة
أو تفوّت يوم أو اتنين من غير ما تعمل حتى المستوى المصغر
أو ممكن تفضل طول عمرك
بتعمل المستوى المصغر بس
احنا هنهزر ولا ايه؟
هو أنا مقسم لك العادة مستويات وأدوار
علشان تقعد في الدور الأرضي طول عمرك
هات مفتاح الدور الأرضي
اتفضل اطلع فوق للدور اللي بعده
لأن حل المشكلة دي إنك ترفع المستوى المصغر شوية
بدل ما بتتمرن 10 دقايق خليها تلت ساعة
بدل ما بتقرأ 10 صفحات في اليوم
خليها 20 صفحة في اليوم
وكإنك بتضحك على دماغك
وبتقوله ده هو هو نفس المستوى المصغر
مفيش أصغر من كده والله في سوق العادات
طب بالنسبة لمشكلة فقدان الدافع يا أخضر؟
هنرجع تاني للمستوى المصغر.. بسيطة اهي..
مهو ده الهدف منه
خليك فاكر إن: حد أدنى من النجاح = حد أدنى من الاستمرارية
فالحفاظ على الاستمرارية مفتاح أساسي في تثبيت أي عادة.
طب معلش يا أخضر سؤال خجول من شخص متخاذل
لو فقدت الدافع وأنا بعمل المستوى المصغر بس؟
ايييه!
يا صديقي انت كده مش متخاذل وبس..
أنت كده محتاج إعادة ظبط المصنع مش كتاب في العادات وخلاص!! فلأ معلش تعالى على نفسك شوية
المهم بقى، موضوع الاستمرارية اللي وارد يحصلها انقطاع يوم ولا اتنين لما تقف فيهم عن أداء العادة
حتى متعملش المستوى المصغر
لظروف بقى قاهرة أو اسكندرية هههه آسف
فالمهم هنا
إنك في أسرع وقت ممكن
ترجع للعادة تاني
وكمان تحارب الشعور بالذنب
اللي هينط في وشك أول ما تقطع الاستمرارية
عن طريق إنك تفهم
إن المرونة مش بس في نجاح العادة
وإنما كمان المرونة في طريقة التعامل مع الانتكاسات
ازاي تصمم عادة مرنة مناسبة؟
طبعا العادات المرنة مرنة اه
بس مش مناسبة لأي حد
يعني ايه الكلام ده يا أخضر؟
هفكرك تاني إن احنا عندنا 3 مستويات للعادة المرنة
المستوى المصغر
والمستوى الأعلى
والمستوى الفائق
لما تحب تصمم عادة مرنة
لازم تعمل 3 خطوات
الخطوة الأولى هي اختيار عادة مناسبة لشخصيتك ونظام حياتك
ويكون عندك مساحة تطبق فيها العادة المرنة
مش على طول مشغول ويومك مليان على آخره
مينفعش تكون عايز تقرأ كل أسبوع كتاب كامل
وانت أصلا آخر حاجة قرأتها كانت إرشادات كتاب المدرسة في اعدادي
هنا هتبقى صعب جدا تبني عادة القراءة
وبعد ما تختار العادة المناسبة ليك
هتيجي للخطوة التانية
وهي تحديد المستويات الـ 3 للعادة
يعني في حتة القراءة مثلًا:
المستوى المصغر هتقرأ فيه صفحة أو اتنين في اليوم
ده في الأيام السيئة
أما المستوى الأعلى هتقرأ 10 صفحات
وده في الأيام العادية
أما لو حسيت بحماس وطاقة زيادة
ادخل على المستوى الفائق
واقرأ فصل كامل..
طبعا يا صديقي الأرقام دي كلها كمثال
علشان محدش يقول هو أخضر بيصمم لي عاداتي المرنة ليه
ويا سلام بقى لو طبقت الخطوة التالتة في تصميم العادات المرنة
وهي المحفزات
عارف يا صديقي البنات اللي بيحطوا شوكولاتة بين كل فصل والتاني
اعمل كده!!
مش لازم شوكولاتة يعني
شوف حاجة انت بتحبها
وحفز نفسك بيها
حلقة مسلسل أو ماتش كورة أو ساعة بلايستيشن.
لو طبقت الـ 3 خطوات دول في تصميم العادة المرنة
هيبقى عندك عادة مرنة
مخصصة ومناسبة
وسهلة التنفيذ وكله في الذيذ
أخضر بيقولك: أنت حر في عادتك!
وعلى فكرة..لو خدت بالك يا صديقي
احنا غيرنا مفهومك عن العادات
من إنها لازم يبقى ليها قواعد وأوقات محددة
وخليناها بمستويات مختلفة
وادينالك حرية الاختيار
الحرية اللي ناس كتير فاكرة إنها مضرة بالعادات
وإن الصح إنه يخنق نفسه بقواعد صارمة
علشان يضمن الانضباط في العادة..
احنا هنا مش بس غيرنا مفهومك عن العادات
ده كمان فكرناك إن الحياة بطبعيتها متغيرة، كل فترة بحالة
وإن التكيف مش معناه تجبر نفسك على العادات
ولكن
التكيف في المرونة
تقدر تتحرك اد ايه مع الحياة من غير ما تكسر نظامك وروتينك اليومي، هو دا.
المرونة اللي مش بس هتساعدك تحافظ على عاداتك
ولكن كمان هتخليك لطيف مع نفسك
ومتفهم لإخفاقاتك الصغيرة
ومش هتقعد تلوم نفسك وتحس بالذنب
في كل مرة متعملش فيها عادة معينة
يبقى عد معايا كده
حرية
انضباط
تكيف
مرونة
مفيش شعور بالذنب
عايز ايه تاني من أخضر يا صديقي
أظن كده أنا عملت معاك الواجب وزيادة..
متنساش تقولنا ف الكومنتات ايه العادة اللي هتبدأ تطبق عليها نظام العادات المرنة من دلوقتي؟
بس كده
سلام