لغة جسد الكاذبين: من الأكاذيب البسيطة إلى الخداع المرضي - كيف تكشف الأكاذيب والخدع والزيف الذي يواجهك يوميًا
مقدمة
تخيل إنك في يوم من الأيام العادية جدًا
روحت الشغل عادي جدا برضو
وإذا بمديرك في الشغل جه بنفسه يشكرك على شغلك ويمدح في اجتهادك ويوعدك إن مرتبك هيزيد
بس بتاخد بالك إن المدير غطي مناخيره بايده وهو بيتكلم
ده كمان نبرة صوته اتغيرت
لا وحرك ايده ناحية اليمين في آخر الكلام
ولأنك ناصح مطبق طول الليل على كتب وفيديوهات لغة الجسد فأنت قولت بسسسس المدير بيكدب عليا ومفيش زيادة ولا حاجة وبناء عليه استقلت من شغلك..
وبعدها بتقابل صحبك آخر اليوم على القهوة
وإذا بصحبك هو كمان بيمدحك وبيشكر فيك وفي جدعنتك معاه
بس بتاخد بالك بقى إن صحبك وهو بيتكلم مبصش في عينك
لا وكمان كان بيهز رجله
ولأنك ناصح زي ما اتفقنا وخبير في لغة الجسد
فأنت قولت بسسسس صاحبي هو كمان بيكدب
فبتقطع علاقتك مع صحبك وتمشي
وقبل ما تحس إن كل اللي حواليك غدارين وكدابين
وتحمد ربنا على قدرتك على كشف الكذب
خليني افوقك من أحلامك وأقولك إنك غلطان
مبروك عليك!
خسرت شغلك وخسرت صحبك
الله طب ولغة الجسد يا أخضر؟
يا سيدي وهو أي واحد بيعطس ولا بيغطي مناخيره يبقى بيكدب
المدير وكان عنده برد عادي
وصحبك وبيحبك عادي، هيكدب عليك ليه يعني
لغة الجسد موضوع كبير ومعقد يا صديقي
وأخضر هنا علشان يساعدك تفهمه
فازاي تعرف إن حد بيكدب من لغة جسده؟ وازاي تميز ده كدب ولا لا أصلًا؟
إجابات الأسئلة دي هنعرفها النهاردة في حلقتنا المبنية على كتاب The Body Language of Liars: From Little White Lies to Pathological Deception—How to See Through the Fibs, Frauds, and Falsehoods People Tell You Every Day
لغة جسد الكاذبين: من الأكاذيب البسيطة إلى الخداع المرضي - كيف تكشف الأكاذيب والخدع والزيف الذي يواجهك يوميًا.
من تأليف:
ليليان جلاس
ايه بقى حوار لغة جسد الكذابين ده؟
________________________________________
- يعني إيه كذب؟
بص، علشان نفهم لغة الجسد صح
فاحنا محتاجين نجيب الموضوع من الأول خالص، ونسأل سؤال بسيط:
يعني ايه كذب أصلًا؟
الكذب هو إنك تقول حاجة غلط أو تخبي حقيقة عن حد، وأنت عارف الصح ومتعمّد تعمل كده، وغالبًا بيكون هدفك إنك تأثر على اللي قدامك أو تخدعه.
وهنا لازم نفرّق بين الكذب والخداع، لأن الفرق بينهم كبير. الكذب زي ما قولنا، هو إنك تقول حاجة غلط أو تخبي حاجة، لكن الخداع حاجة أوسع وأكبر.
المخادع مش بس بيكذب، ده كمان بيأذي اللي حواليه بأفعاله مش بكلامه بس، وبيكون عنده هدف كبير عايز يحققه.
يعني الكذب جزء من الخداع، لكن الخداع مش كله كذب؛ يعني لو مديرك سألك وقالك "خلصت شغل" وأنت قولت له آه خلصت مع إنك مخلصتش ولا حاجة فدا كذب؛ لكن لو مدتلوش فرصة يسأل أصلًا وعملت نفسك مشغول ومعاك شيتات وورق ومش فاضي تبص جنبك وأنت أساسًا قاعد تلعب فدا خداع لأنك مقولتش بلسانك حاجة.
________________________________
- أربع أنواع للكذب
وكمان مهم نعرف إن الكذب أنواع
اه زي ما سمعت كدا يا صديقي الكذب فيه منه أنواع كتير
وخلينا نتكلم عن ٤ أنواع منتشرين منه
:
أول نوع هو الكذبة البيضاء
ودا النوع اللي بنقول عليه "كذبة ملهاش ضرر"، يعني مش الهدف منها الأذى.
زي لما واحد من صحابك يجي يسألك: "إيه رأيك في شكلي النهارده؟" وأنت شايف إن لبسه مش قد كدا، لكن مش عايز تضايقه فتقوله: عظمة ايه الاستايل الجامد ده
وهنا نيتك مكانتش منفعة شخصية أو أذية لشخص تاني
تاني نوع هو كذب المصلحة
وده لما حد يكذب علشان يحقق منفعة لنفسه، وده للأسف منتشر، تخيل مثلا زميلك في الشغل يقول للمدير إنه هو اللي عمل المشروع كله لوحده، مع إن الحقيقة إنك كنت شريك أساسي فيه، بس هو عايز ياخد الترقية أو المكافأة لنفسه.
أما تالت نوع من أنواع الكذب، فهو الكذب الاستراتيجي
وده نوع كبير شوية، بيُستخدم في المواقف السياسية أو الحروب. مثلًا الحكومات أوقات بتطلع تصريحات مغلوطة علشان تشوش على العدو أو تخفي خطة معينة.
وآخر نوع بقى والأخطر، هو: الكذب الضار والمؤذي
وده النوع اللي بنتكلم عنه بشكل خاص، لأنه بيبقى بهدف الأذى. تخيل إن حد يروح ينشر إشاعات عن حد تاني في الشغل أو على السوشيال ميديا، وكل ده علشان يبوظ سمعته ويوقعه في مشكلة.
وعارف إن زمانك بتسأل دلوقتي:
طب وليه يا أخضر؟ يعني ليه الناس بيكذبوا أصلًا؟
_____________________________
- أسباب الكذب
هو يا صديقي في أسباب كتير تخلي الواحد يكذب
وأنا وأنت غالبًا اتعرضنا لواحد منهم يعني
وعلشان نفهمهم كويس خلينا نقسمهم لست أسباب
وأول سبب هو:
الكذب لتجنب إيذاء مشاعر الآخرين
عارف لما خطيبتك تسألك رأيك في لبسها، وأنت شايف إنه عادي جدًا، لكن بتقول لها "واو، ده أحلى فستان شوفته في حياتي!"، ليه؟ علشان تتجنب أي زعل أو إحراج، لأنك عارف إن أي كلمة غلط ممكن تخرب اليوم كله.
النوع ده من الكذب بيكون هدفه الأساسي المحافظة على العلاقات، وتجنب أي لحظات محرجة.
أما تاني سبب فهو:
الكذب لتحقيق دوافع خفية
النوع ده بيحصل لما يكون في مصلحة شخصية ورا الكذب.
زي لما تدخل محل ملابس وتقيس لبس، تلاقي البياع بيقولك: "ده عامل عليك زي ما تكون موديل بالظبط!"، وهو أصلاً عارف إن اللبس مش أحسن حاجة، لكن بيقول كده علشان تدفع مرتبك كله وضميرك مرتاح
.هنا الكذب بيكون وسيلة لتحقيق منفعة مهنية أو شخصية
والنوع ده من الكذب مفيد في سياقات معينة، وده ياخدنا لتالت سبب من أسباب الكذب وهو:
الكذب لحماية النفس
وعلشان أوضحلك السبب ده
خليني احكيلك عن ديف dave
موظف مثالي بيعمل شغله أول بأول
لكنه صريح بزيادة، عمره ما يكذب
ورغم إن دي صفة حلوة، لكنها أدت لفصله من الشغل! متخيل؟ ليه بقى؟
ديف كان صريح في انتقاد مديره في العمل
كل ما زميل ليه يسأله عن رأيه في المدير
يقوم ديف يعد العيوب كلها ومن غير أي تحفظ ولا حذر
ولأن العصافير كتير، الكلام وصل للمدير وديف اتفصل من شغله
علشان كدا الكذب للسبب ده بيكون علشان تتجنب الأذى النفسي أو الجسدي
والسبب الرابع بقى واراهنك إنك عملته
هو: الكذب لتحسين الصورة الذاتية
وعلشان تفهم قصدي، عايزك تروح تفتح ال cv بتاعك أو بروفايلك على لينكد ان LinkedIn
عايز تفهمني إنك واخد كل الكورسات دي؟
وشهرين الخبرة بقوا سنتين أمتى؟
الكذب هنا بيحصل لأنك عايز تدي صورة إيجابية عن نفسك خوفًا من الرفض
والسبب الخامس للكذب
هو:
الكذب لتحفيز الآخرين
وده مثلًا زي لما الدكتور يكذب على العيان علشان يحسن نفسيته
أو لما تكذب على صحبك اللي لسه نازل ال gym أول امبارح وتقوله عاش يا وحش العضلة باااينة
والكذب هنا بيكون ليه آثر إيجابي على الآخرين
أما السبب السادس وآخر سبب هو:
الكذب الإلكتروني
وده ال catfish
يعني ايه؟
تخيل مثلًا أكونت على فيسبوك باسم "حبيبة أحمد"، فجأة تلاقيها بتبعتلك تسأل عن المنهج ، مع إنها ما سألتش أي حد تاني في الدفعة. تبدأ تحلم وتخطط، وبتتخيل حتى أسامي ولادكم.
لكن، المفاجأة الكبيرة! "حبيبة أحمد" دي تطلع أحمد زميلك عادي، اللي محدش كان معبره في الحقيقة، فقرر يعمل أكونت بنت علشان يلم المنهج بالطريقة دي
بس عارف يا صديقي، هجاوب على سؤالك عن سبب الكذب مرة تانية، بس على مستوي أعمق حبتين، ففتح مخك وركز معايا
كلاكيت تاااني مرة
طب وليه يا أخضر؟ يعني ليه الناس بيكذبوا أصلًا؟
_____________________________________
- كيف بدأ الكذب؟ الحيوانات تكذب أيضًا!
خلينا نصيغ السؤال بشكل تاني، ونقول:
هو ايه جذور الكذب وظهر ازاي؟
بص يا سيدي مش هتصدق اللي هقوله بس هعمل اللي عليا وأقوله وأنت حر بقى
الكذب مش صفة متعلقة بالبشر بس
بالظبط زي ما سمعتني
الحيوانات كمان بتكذب والعلماء لاحظوا ده من زمان
بس الغرض من كذبهم هو البقاء والنجاة
وهقولك مثال أنت عارفه كويس
الحرباية اللي بتغير لونها على حسب بيئتها، ده نوع من الكذب
الفيل كمان العلماء لاحظوا إنه ممكن يصاحب فيل تاني علشان يديه الأمان ويسرق أكله بعدها!! آه من غدر الفيل.. عامل زي صحبك اللي كان معاك في المدرسة وبيصاحبك عشان ياكل سندوتشات جبنه رومي :( اعمل له منشن ف كومنت وافضحه هنا على الملأ ^_^
وبما إننا جبنا سيرة صحبك حرامي السندوتشات.. فنيجي بقى للبشر، الموضوع هنا معقد أكتر ومش مفهوم
خصوصًا بعد ما وضحنا إن وراه نوايا وأنواع وحوارات
العلماء لاحظوا إن الكذب بيبدأ والطفل عنده ٦ شهور بس!
اه والله شوفت؟!
من عمر ال ٦ شهور الطفل بيعيط بدون سبب علشان يجذب اهتمام مامته وخلاص
وبعدها لما اللغة تتطور يبدأ بقى يفهم موضوع العقاب والمكافأة
وفي مرحلة المراهقة الكذب بيكون زي اختبار لحدود الأهل أو تمرد أو حتى محاكاة للأقران
يعني إيه كل ده؟
يعني ببساطة، كلنا كذبنا في مرحلة ما من حياتنا، حتى لو إحنا مش فاكرين. الكذب مش بس مهارة بنطورها، لكنه جزء معقد من التجربة الإنسانية، بيبدأ معانا من أول لحظة بنحاول فيها نكتشف العالم!
__________________________
- السياق يكشف الكذاب
طب يا عم أخضر أنت قولت الكتاب عن لغة جسد الكاذبين
فين لغة الجسد دي؟ من الصبح بنشرح في جذور وأنواع الكذب
عارف إنك هتسأل كدا يا صديقي، وهو ده عيبك مستعجل
كان مهم نشرح كل المعلومات دي علشان نقدر نحدد السياق
ايه بقى السياق ده؟
ببساطة يعني الموقف اللي شاكين إنه الكذب حصل فيه
يعني لأنك عارف الأنواع والأسباب هتعرف تحط سياق تحدد بيه ايه الكذب وايه سببه
لأن لو مفيش سياق فكدا أي حد حط ايده على مناخيره كذاب بقى!
تطّلع السياق ده بقى ازاي؟
ببساطة أنت محتاج تحلل الموقف، يعني لو أنت خارج مع صحبك على القهوة هيكذب عليك ليه يعني؟
وبعد كدا مهم جدًا تركز في المعطيات، يعني لو حد عنده برد مثلًا وصوته متغير، فأكيد دي مش علامة كذب يعني
وطبعًا مهم جدا متمشيش تكذّب في الناس وخلاص، الخطوات دي موجودة علشان تقدر تاخد بالك لو عندك حدس إن حد بيكذب عليك أو هيوقعك في مشكلة
_____________________
6) لغة جسد الكذّاب
وصلنا للجزء اللي أنت جاي علشانه بقى
ايه هي لغة الجسد اللي تقولك الشخص ده بيكذب؟
خلينا نقسمهم ل ٣ أنواع علشان نقدر نفتكرهم كويس
يعني هنتكلم عن:
- علامات عامة في لغة الجسد
- وعلامات في الوجه
- وأخيرًا ًا علامات في الصوت ومحتوى الكلام
قبل ما نبدأ الكلام عنهم، فعايز أقولك إن العلامات دي بتحصل بشكل لا واعي لما الشخص يكذب، وإن مش بالضرورة كلهم يكونوا موجودين بنفس الشكل والدرجة عند كل الاشخاص، فخلي ده في بالك لما تحاول تحلل لغة الجسد
أ) ويلا بينا نبدأ بالعلامات العامة اللي منها: التنفس
يعني عايز تفهمني يا عم أخضر إن تنفس الواحد ممكن يكشف كذبه؟
اه طبعًا
التنفس الطبيعي بيكون بطني، يعني البطن هي اللي بتتحرك.
لكن لو الشخص بيكذب، التنفس بيتحول لتنفّس علوي من ناحية الصدر، وده بيبان أكتر لو كتفه بيتحرك وهو بيتكلم.
ولو التنفس حوار معقد فكك منه
فيه كمان علامات بتظهر على الجلد وممكن تلاحظها بسهولة
زي:
- احمرار مفاجئ في الوجه أو الأذنين.
- أو تعرق الجبهة
وضعية الجسم كمان بتكشف كتير، يعني الشخص اللي بيحاول يهرب من المواجهة ممكن تلاقيه مايل بجسمه لورا وهو بيتكلم، أو موطي رأسه وباصص للأرض. كمان لو لاحظت إنه بيحط إيد فوق التانية أو بيلمس رقبته كتير، دي إشارات واضحة للتوتر.
وفيه شوية تصرفات صغيرة لكنها مهمة، زي إنه يفتح زرار القميص فجأة كأنه مش مرتاح، أو يغطي بوقه بإيده، أو حتى يلمس مناخيره. لغة الجسد كمان بتكون متناقضة أحيانًا، زي إنه يهز رأسه بـ"لا" وهو بيقول "نعم".
وأخيرًا، لاحظ الحركات الصغيرة اللي بتدل على التوتر، زي اللعب بالقلم، أو فرك منديل أو حتى فرك الأيدين بشكل مبالغ فيه
وكدا خلصنا العلامات العامة
ب) يلا نشوف بقى العلامات اللي بتظهر على الوجه في حالة الكذب
- أول حاجة ركز على تغير لون البشرة إما الاحمرار أو العرق بفكرك تاني أهو.
- بعدها بقى ركز في حركة العين، الشخص اللي بيكذب ممكن تلاقيه مش قادر يحافظ على التواصل البصري لفترة طويلة، أو بالعكس يركز زيادة عن اللزوم كأنه بيحاول يقنعك.
- كمان لو لاحظت عيونه بتتحرك بشكل سريع يمين وشمال، ده ممكن يكون محاولة للهرب أو التفكير في كذبة جديدة.
- ما ننساش التعبيرات الصغيرة. زي ابتسامة مصطنعة أو متوترة تظهر وتختفي بسرعة، أو رفع الحواجب بشكل مفرط كأنه بيحاول يمثل إنه مستغرب زيك. كمان التجاعيد اللي بتبان على الجبهة أو حول الفم بتكشف شعوره الحقيقي، خاصة لو كان مش مرتاح.
- ومن العلامات الواضحة كمان حركة الشفايف، زي لعق الشفايف بشكل متكرر أو عضّها. دي حركات غالبًا بتظهر لما الشخص بيحاول يسيطر على توتره أو يكسب وقت للتفكير.
ج) كدا باقي معانا لسه علامات في الصوت ومحتوى الكلام تكشف بيها الكذاب..
- أول حاجة ركز على نبرة الصوت. الشخص اللي بيكذب غالبًا بتكون نبرته مش ثابتة، ممكن تلاقيه بيرفع صوته فجأة بطريقة غير مبررة. كمان، النبرة أحيانًا بتكون متوترة أو مليانة تردد، وكأنه مش واثق في اللي بيقوله.
- بعد كده تعالى نلاحظ سرعة الكلام. الشخص اللي بيحاول يخدعك ممكن يتكلم بسرعة شديدة كأنه عايز يعدي الموقف بأسرع وقت.
- أما محتوى الكلام نفسه، فهو أكتر حاجة ممكن تفضح الشخص. الكذاب غالبًا بيبالغ في التفاصيل عشان يحاول يقنعك، أو يتجنب الإجابة المباشرة على سؤالك. ممكن تلاقيه بيكرر نفس الجمل أو العبارات كأنه بيحاول يثبت صدقه بالقوة. ولو ركزت، هتلاحظ إنه بيتجنب استخدام الضمائر الشخصية زي "أنا"، وده لأنه مش عايز يربط نفسه بالكلام اللي بيقوله.
- ما ننساش نركز كمان على التفاعل مع الأسئلة غير المتوقعة. الكذاب ممكن يتوتر أو يحاول يغير الموضوع لو سألته سؤال فجأة
- وأخيرًا، لو لاحظت إنه بيستخدم عبارات زي "بصراحة" أو "صدقني" بشكل مفرط، ده مؤشر على إنه بيحاول يثبت صدقه بشكل زيادة عن اللزوم.
كل العلامات دي لما تجمعها مع لغة الجسد، هتقدر تعرف إذا كان الشخص قدامك صادق ولا بيحاول يخدعك.
7) أخضر بيقولك ايه؟
استنا بس أنت رايح فين أنا لسه مخلصتش.. أخضر بيقولك يا صديقي في النهاية إن لغة الجسد مش هدفها تمشي تشك في الناس وتقول ده كذاب وده مش كذاب. الفكرة كلها إنك تستخدمها بحكمة لحماية نفسك في المواقف اللي ممكن تأذيك أو تحطك في مشكلة، يعني من الآخر عشان متقعش ضحية لحد من الكذابين مش علشان تتسبب في أذى حد أو تشك في كل اللي حواليك.
كمان خليك عارف إن فيه كذابين محترفين؛ عارفين إن معظم الناس عايزه تكشفهم فبيلعبوا على الحتة دي كويس أوي عشان يدولك إيحاء بأنهم بعيد تمامًا عن قصة إشارات الكذب دي.. فمرة يكون صادق ويتعمد يضللك بأنه يعمل كذا علامة كذب عشان تشك وبعدين يثبت لك صحة كلامه 100% فأنت بعدها خلاص مش هتشك فيه أصلا وهتقول العلامات دي أي كلام، أو حتى بيتعمد إخفاء العلامات بمهارة عالية.. بس طبعًا دي ناس قليلة اوي اوي..
وبس كده يا صديقي... سلام!
هه، كذبت عليك! أنا لسه مخلصتش.. حبيت بس افكرك بحاجة مهمة جدًا: السياق هو كل حاجة. متروحش تـ"Skip" الفيديو كله عشان لغة الجسد بس، لأن من غير السياق، ممكن تفهم العلامات غلط وتتصرف بطريقة مش صح.
وبس كده... سلام!
والمرادي بجد؛ اقفل الحلقة خلاص..