مقدمة

تخيّل معايا يا صديقي ولد صغير في فصل كبير كل الأطفال قاعدين هاديين لكن هو مش قادر يقعد ثابت مكانه، ودماغه سرحانة بعيد خالص عن اللي المدرّس بيشرحه، وباقي الأطفال بيتنمروا عليه ..المدرّسين شايفينه شقي وبيقولوا لوالدته ده عمره ما هيفلح وشوية شوية المدرسة اللي المفروض تكون مكان يساعده يبني أحلامه، بتتحول لكابوس.

 

بس الحمد لله فيه مكان بيلاقي فيه نفسه، وهو حمام السباحة .. كان أول ما بينط في المية، كل الضوضاء اللي في دماغه بتختفي وكان بيقعد بالساعات يتدرّب وولا كان بيشتكي ..

 

طب ليه عامل كده في المدرسة؟ بعد ما والدته يأست من مستواه الدراسي بتاخده لدكتور، وأخيرًا بيكتشفوا السبب: ابنك يا هانم عنده ADHD يعني اضطراب تشتت الانتباه وفرط الحركة!  

 

كان بالنسبة لها تشخيص مخيف وكانت خايفة ابنها ميعيش عيشة طبيعية لكن سنين بتمرّ، اللي كان الناس شايفينه نقطة ضعف، بيبقى مصدر قوته وبيحقق اللي محدش قبله عمله.

 

الولد ده هو مايكل فيلبس (Michael Phelps)، أكتر رياضي حصد ميداليات في تاريخ الأولمبياد - 28 ميدالية! قصته مش بس عن نجاح رياضي، لكنها دليل على قوة الإرادة وفهم النفس، وإزاي ممكن تتحوّل التحديات لفرص عظيمة بس لو فهمناها كويس … يعني ايه بقى ADHD أو اضطراب تشتت الانتباه وفرط الحركة؟

 

ده اللي هنعرفه في حلقتنا النهاردة المبنية على كتاب "عقول مشتتة: أسباب اضطراب تشتت الانتباه وسُبل علاجه" لـ د. جابور ماتيه | Gabor Maté.  

هنبدأ بتشبيه بسيط جدًا قبل ما ندخل في الكلام العلمي .. يعني ايه حد عنده اضطراب قصور الانتباه وفرط الحركة؟ تخيل انك واقف في أوضة زحمة جدًا وكل اللي حواليك بيتكلموا وفجأة حد سألك هو فلان ده قال ايه؟ 

هو ده بالظبط اللي بيحصل في مخ المصاب باضطراب قصور الانتباه ..

 

طبيعة اضطراب قصور الانتباه

 

يعني الشخص اللي عنده قصور الانتباه ده عقله مش بيهدى أبدًا وبيخاف ليقعد مع عقله لوحده ولو لدقايق ولا كأن فيه وحش هينقض عليه ويلتهمه تماما ده غير بقى موجات النشاط الأوفر اللي بتيجي فجأة/ فتلاقيه بيسوق العربية لوقت طويل من غير أي هدف، وبيقعد على المكتب ورا شاشة لابتوب من غير ما ينجز حاجة ماهو مش عارف يركز، وبيبقى عايز يتنطط ويعمل أي حاجة حرفيًا بس ميقعدش ساكت ولا يركز في مهمة واحدة بس

 

وللأسف كمان المصاب بالاضطراب ده بيكون حاسس ان عنده طاقة مهدرة وامكانيات مش مُستغلة.. لكن مش قادر يحط ايده عليها او يستخدمها لصالحه لان في حاجة غلط فيه هو شخصيا .. ده غير التسرع والتهور وعدم الصبر..

الكاتب نفسه اللي هو دكتور اكتشف أنه مصاب بقصور الانتباه بالصدفة بعد ما عانى طول حياته من الحاجات دي وكان متخيل ان الغلط فيه والمشكلة الأكبر بقى اللي اكتشفها هي ان دكاترة قليلين فعلا فاهمين الاضطراب ده .. والأهم أسبابه ودي لسه هنتكلم عنها بالتفصيل قدام..

بس دلوقتي هنفسر أكتر طبيعة اضطراب قصور الانتباه..

 

اضطراب قصور الانتباه له 3 سمات أساسية: وكفاية اتنين منهم بس لتشخيص حد بيه.. والسمات دي هي ضعف الانتباه، والاندفاعية، وفرط النشاط أو الحركة.

 

1. نبدأ بضعف الانتباه: 

هنا المصاب بينفصل فجأة كده عن اللي حواليه وبيسرح، يكون بيكلم حد وفجأة ميبقاش سامعه ودماغه تروح في حتة تانية خالص، أو ممكن يدخل أوضة ويكتشف إنه مش فاكر هو كان عايز يعمل إيه فيها وليها طبعا أشكال تانية كتير..

 

ومهما كانت شكلها، فقلة الانتباه بتسبب صعوبات عملية كبيرة، الأطفال مش بيقدروا يركزوا في دراستهم، والكبار بيعملوا غلطات كتير في شغلهم وبتفوتهم الترقيات..

 

بس سهولة التشتت دي مش بتبقى طول الوقت لأ ساعات بيكون عندهم تركيز مفرط .. زي الطفل اللي مش مركز في المدرسة لكن ممكن يقعد بالساعات يدرس خرايط وهو مبسوط وده لأن المصاب بقصور الانتباه بيركز بس على الحاجات اللي بتثير اهتمامه والحاجات التانية لا وده يعتبر جزء من ضعف تنظيم الانتباه.

 

1.  الخاصية التانية بقى للمصابين باضطراب قصور الانتباه هي الاندفاعية في الكلام والأفعال وعدم القدرة على التحكم في الاستجابات العاطفية .. وده برضو له أشكال كتير يعني ممكن يتكلموا قبل ما يفكروا ويعكوا الدنيا بكلامهم ويقاطعوا اللي حواليهم، أو يكونوا مندفعين وهما بيشتروا مثلا أو بيحبوا المخاطرة في السواقة وفي كل حاجة ماشيين كده يشوفوا الاندفاع النهاردة على ايه ..

 

1. الخاصية التالتة والأخيرة بقى للاضطراب هي فرط الحركة وده معناه ان الشخص بيلاقي صعوبة أن يقعد ثابت فيفضل يحرك رجله أو يخبط بايده أو يقطم ضوافره.. أي حاجة وخلاص لأنه بيكره الملل وبيكره يكون قاعد فاضي ..

 وهو ده الفرق بين المصابين بـ الـ ADHD والـ ADD ..

 في الـ ADHD بيكون عندك ال3 سمات ولكن الـ ADD معناها ان عندك نقص انتباه واندفاعية بس لكن من غير فرط الحركة..

 

طيب عرفنا ايه هو اضطراب تشتت الانتباه وفرط الحركة .. بيحصل ليه بقى وايه أسباب الإصابة بيه؟

هو ده سؤال المليون جنيه وللأسف لحد دلوقتي مفيش إجابات أكيدة بنسبة 100% …

 

تفسيرات الإصابة باضطراب قصور الانتباه

بس الرأي العام كان بيقول إن قصور الانتباه ده اضطراب وراثي جيني.

 

لكن دكتور ماتيه (Maté) عنده رأي مختلف خصوصا بعد ما ثبت أن مفيش جين محدد لاضطراب قصور الانتباه.. وده اللي خلاه يقول إن الاضطراب ده مش مرض، لكن يعتبر مشكلة اجتماعية ومشكلة نمو..

اه مشكلة ليها جوانب فسيولوجية وعصبية، لكن مش هي اللي بتفسر كل المشاكل العقلية والسلوكية المرتبطة بالاضطراب ده.

 

دكتور ماتيه بيقول إن الاضطراب ده هو استجابة فسيولوجية لتفاعل الإنسان مع البيئة اللي عايش فيها، يعني رغم إن الوراثة ليها دور في تطور الاضطراب، إلا إن دور البيئة أكبر بكتير..

 لأن حتى الجينات اللي بتحدد بنية المخ وآليات عمله عند الناس بتشتغل بالتفاعل مع البيئة ..

 

ليه؟؟ لأن تفاعلنا مع العالم هو اللي بيحدد مسار تطور تشابكاتنا العصبية في المخ بكل تعقيداتها..

والدارات العصبية في المخ بتتبنى من خلال المؤثرات الخارجية اللي بنتعرض لها واحنا أطفال ..

 

 يعني من الآخر  التجارب اللي بيمر بيها الطفل في بداية حياته هي الي بتحدد ايه الأجزاء اللي هتنمو في مخه وازاي وايه الأجزاء الللي لأ مش هتنمو..

 

فتخيل معايا كده يا صديقي طفل اتولد في أوضة ضلمة ومامته كانت بتأّكله وتهتم بيه لكن عمره ما شاف النور .. يا ترى بعد سنة بقى هيقدر يشوف عادي وهتتطور حاسة البصر عنده؟ الإجابة لأ 

ومش بس كده  ده كمان مخه مش هينمو زي أمخاخ الأطفال التانيين بغض النظر عن الجينات اللي ورثها ومش هيفرق انه اتولد بعينين زي الفل وان اعصابه المسؤولة عن توصيل الصورة البصرية للمخ سليمة لأن الوحدات العصبية اللي بتشكل حاسة البصر ببساطة مش هتتطور لأنه مش موجود في بيئة تساعده على تطورها ..

 

ونفس الكلام بقى مع كل سمات اضطراب قصور الانتباه ..

 

وأهمهم ضعف القدرة على الضبط الذاتي ودي اللي بتفسر الـ 3 سمات بتوع  الاضطراب.. المصابين بـالـ ADHD مش بيطوروا القدرة على الضبط الذاتي، وبالتالي مش بيقدروا يوجهوا انتباههم بالطريقة اللي عايزينها، ومش قادرين يتحكموا في مشاعرهم أو ردود أفعالهم، وده ببساطة نتيجة لعدم اكتمال نمو مناطق المخ المسؤولة عن التحكم في الانفعالات والتنظيم العاطفي عندهم.

 

وممكن نقول إن ورا الاضطراب دا حاجة تانية.. ألا وهي: قشرة الفص الجبهي الأيمن اللي ورا الجبين على طول لأن وظايفها بتشمل التحكم في الانفعالات والذكاء الاجتماعي العاطفي والدافعية وكمان توجيه الانتباه والناس اللي بيتضرر الجزء ده عندهم بيعانوا من سهولة التشتت والاندفاعية وغيرها من الصفات اللي ليها علاقة باضطراب قصور الانتباه .. 

 

 بس ده مش معناه اننا لما نسأل عن أسباب قصور الانتباه تبقى الاجابة وجود مشكلة مرضية في المخ بالمعنى الباثولوجي البحت زي التهاب المفاصل ده!!

 

 لأ، اضطراب قصور الانتباه مشكلة نمو مش مشكلة مرضية .. وحل مشكلة النمو بيكون بتحفيز النمو .. وتحفيز النمو بيحصل من خلال توفير الظروف المناسبة اللي تخلي تحفيز النمو ممكن .. وده ممكن يحصل في أي وقت وفي أي سن زي ما هنعرف النهاردة..

 

الظروف المثالية للنمو

 

طب ايه هي الظروف المثالية اللي المفروض ينمو فيها المخ بقى نمو سليم وكامل؟

الإجابة بتتلخص في التغذية والبيئة الآمنة والارتباط والتناغم العاطفي بكيان أمومي وكمان دفء وأمان نفسي وعاطفي وغياب الضغوط .. 

يعني نشأة الطفل في بيئة عاطفية هادية ومستقرة هو أساس تطوير البنية الفيسيولوجية العصبية المسؤولة عن قدرة الشخص على الضبط الذاتي .. 

 

لكن لما تتأثر العوامل دي أو متبقاش موجودة بتتأثر عملية نمو المخ بشكل سلبي وبتكون الإصابة باضطراب قصور الانتباه واحدة من آثار الخلل ده..

 

تحب أثبتلك يا صديقي؟ 

الدكتور ماتيه  نفسه بيعترف ان زواجه مكنش سهل كان فيه صعوبات كتير وإحباط واضطرابات وكان بيعاني انه يحضر ذهنيا وهو مع أهله وكان بيجري من شغل للتاني وبعدين اكتشف إصابته بالـ ADHD.... وزوجته كان عندها اكتئاب شديد في فترة ما بعد ولادة واحد من الأطفال .. وعشان كده لما ولاده التلاتة اتشخصوا باضطراب قصور الانتباه مستغربش! 

 

لأن الحقيقة الحالات النفسية للأب والأب بتساهم في تشكيل مخ الطفل وعقله حتى لو بيحبوهم وبيهتموا بيهم ماديا .. 

وعشان كده فيه ثيمات متكررة عند كل المصابين بالاضطراب زي الخناقات العائلية والطلاق والتوتر والضغوطات النفسية واكتئاب الآباء والأمهات، كل دول بيساهموا في معاناة الطفل من مشكلات اضطراب قصور الانتباه .. لكن ده مش معناه ان اللي راح راح ..

 

الطفل والتعافي من اضطراب قصور الانتباه 

 

يعني؟ هل ممكن الواحد يتعافى من اضطراب قصور الانتباه؟ طبعًا ..

وتعافي الأطفال المصابين بالاضطراب ده ممكن جدًا ولكن مش بالأدوية ولكن بمساعدتهم على النمو ..

وده مش معناه اننا محتاجين نرجع بالزمن ولا حتى نغير أسلوب التربية..  ولكن المفروض نغير فلسفة التربية لفلسفة أساسها فهم الآباء والأمهات لأطفالهم بشكل أعمق وحتى الكبار لازم يفهموا نفسهم بشكل أعمق ..

 

نبدأ مع الأطفال..

الطفل اللي بيعاني من الاضطراب عنده جرح بسبب وجود خلل في علاقته بالشخص اللي قدم له الرعاية لما كان طفل رضيع وبالتالي كل سلوكيات اضطراب قصور الانتباه تعتبر علامات على الجرح ده ..

وبالتالي الحل هو إعادة بناء علاقة على أسس صحية وإيجاد طرق جديدة لمعالجة العواطف المحتاجة دارات عصبية جديدة، وبناء دارات عصبية جديدة بيحتاج بيئة عاطفية متوازنة ومناسبة له ..

 

يعني أساليب زي التهديد بالبُعد لو عمل حاجة غلط أو العقاب مرفوضة تماماًا العلاقة بين الطفل وأهله لازم تقوم على الأمان والدعم والحب.. ومن غيرهم ولا محاولة لتغيير سلوكيات الطفل هتنفع..

 

طب نعمل ايه يا أخضر؟ فيه مبادئ ممكن تساعد..

• أولها أن الاهل يتحملوا مسؤولية العلاقة ويقربوا من طفلهم عشان يساعدوه يتقبل نفسه، ويصاحبوه ويقضوا وقت معاه لأنهم عايزين ده فعلا..

ويحسسوه انه مرغوب فيه وانهم مستمتعين بوقتهم معاه لان من غير كده عمره ما هيتقبل نفسه ولا يحبها وعشان كده كتير من المصابين بالاضطراب معندهمش ثقة في نفسهم 

 

• وطبعا بلاش أحكام على الطفل أو إن الأب والام يشاوروا على عيوبه كل شوية لأن المفروض الهدف هنا نعزز ثقته بنفسه ونقلل من شعوره بالخزي ..لأن الطفل المصاب باضطراب قصور الانتباه بيبقى حاسس طول الوقت بالخزي فكمان لما حد ينتقده ثقته هتتحطم أكتر وأكتر ويكره نفسه ..

 

• بس ده مش معناه ان الأب يبالغ في مدح ابنه وانجازاته يعني نركز على كلماتنا واحنا بنمدح الأطفال ونركز على مشاعره لأن الهدف تعزيز شعور الطفل بنفسه وانه مش محتاج يحقق إنجازات عشان أبوه يحبه أو يقبله 

يعني الافراط في المدح والانتقاد الاتنين نفس الفكرة ومضرين، لانهم بيعتمدوا على اهتمام الأب باللي بيعمله الطفل وبيحققه مش الطفل نفسه .. ومش المفروض أننا نبني ثقة الطفل بنفسه على جماله ولا شعبيته ولا ذكائه، لأ نبنبها على الطفل نفسه ..

 

• وآخر حاجة أن التربية طبعا مش بتحصل بالغضب، فلما الأب يكون غضبان ياريت لا ينتقد ولا يؤمر ولا يقول رأيه لابنه لأنه لما بيشوفه غضبان بيحس بالانفصال العاطفي عنه على طول .. وبيدخل في حالة من الخذلان وبيحس انه متهم وانه السبب في غضب ابوه او امه .. فالأب أو الأم لازم يهدوا الأول ويستعيدوا توازنهم قبل ما يتعاملوا مع ابنهم ..

 

لأن تنمية الضبط الذاتي هو الهدف النهائي من عملية النمو .. فازاي الطفل هينميها والأب والأم معندهمش ضبط ذاتي أساسًا؟!

 

يعني عجز الأب والأم عن الضبط الذاتي لانفعالاتهم بيأثر في أطفالهم .. والأطفال كل سلوكياتهم بتبقى عبارة عن رد فعل على الرسايل العاطفية اللي بيسيبها لهم الأب والأم .. فثقفوا نفسكم من فضلكم واشتغلوا على نفسكم الأول ..

 

الشخص البالغ واضطراب قصور الانتباه 

 

كده اتكلمنا عن تعافي الطفل، طب والكبير؟ فيه أمل ؟ أو عفاف حتى؟ أي حاجة..

ما احنا متعودين إن اللي الطفل كبر عليه مبيتغيرش.. بس تفتكر خلاص كدا انتهت حلول الأرض؟!

أحب أقولك يا صديقي.. طبعًا فيه أمل .. البالغ زي الطفل والاتنين يقدروا يتخطوا ويتعافوا عادي وأقولك على حاجة كمان .. الاتنين مشكلتهم واحدة .. مشكلة علاقة.. بس الفرق أن الطفل مشكلته مشكلة علاقة مع ولي الأمر لكن البالغ مشكلته في علاقته مع نفسه وعشان كده أهم خطوة عشان تبدأ التعافي وتنفذ النصايح الجاية أنك تفهم نفسك وتدعمها نفسيًا…

 

 

•  وأول نصيحة انك تتلطف بنفسك وانت بتحاول تتعرف عليها 

 

قرر كده أنك تكون أطيب مع نفسك عشان تتجاوز الصورة اللي تبنيتها عن نفسك واللي ممكن متبقاش حقيقية وممكن كمان مؤذية .. وخلي عندك رغبة حقيقية في تقبل نفسك وفهمها… اسأل نفسك انت ليه خايف ليه قولت لنفسك انك فاشل؟ وراقب تصرفاتك ولاحظ كلماتك.. لأن دا بيشكّل صورتك عن نفسك..

 

 

• تاني نصيحة أنك تقبل ذاتك وتتسامح معاها..

 

وده معناه انك تقبل نفسك أيا كانت هي حاسة بايه دلوقتي، فمتجيش مثلا تحب نفسك وانت سعيد وبعدين تبعد عنها وتكرهها لو حاسس بالاحباط .. اصل تقبُل الذات مش معناه الاعجاب بالذات ولا الهيام فيها لأ ده معناه التصالح مع مشاعرنا حتى اللي بتحسسنا بعدم الراحة .. زي الذنب مثلا ..

 

 

• وثالث نصيحة هي أنك بلاش تقسى على نفسك لو حاسس أنك متقدمتش كفاية .. التقدم بيحصل بالتدريج .. اصبر على نفسك و واحدة واحدة هتوصل لأن مش سهل في يوم وليلة ميبقاش عندك ADHD!!

 

 

 

• ورابع نصيحة بقى انك لازم تدور على مرشد او معالج نفسي تاخد رأيه ومشورته ويساعدك تشوف نفسك على حقيقتها..

 

 

 

• آخر حاجة لازم تتعلم تهتم بنفسك وبالبيئة اللي حواليك لأن احنا قولنا من غير الظروف المناسبة المخ هيعجز عن التطور .. طب ايه هي الظروف البيئية الضرورية للنمو؟

 

 

1. اول حاجة هي المساحة المادية اللي حواليك واللي لازم تكون منظمة لأن المساحة المادية اللي انت عايش فيها يا اما هتساعدك تنظم الفوضى اللي في دماغك أو هتعززها والفوضى بتجيب فوضى من الآخر..
2. تاني حاجة هي النوم الصحي، وده مهم عشان نشاط المنظومة العصبية المسؤولة عن الانتباه يتجدد.
3. وكمان اهتم بالتغذية الصحية والتمارين الرياضية لأنها بتحفز إفراز مواد ضرورية في المخ لثبات المزاج والانتباه والدافعية.
4. ومتحملّش نفسك فوق طاقتها بمسؤوليات والتزامات كتير ..
5. واشترك في أنشطة تنشط عقلك وجسمك وتعبر فيها عن اللي جواك..
6. وحاول كل يوم على الأقل تقعد لوحدك كده وتركز انتباهك على حياتك وأفكارك ومشاعرك عشان تضبط إيقاعاتك الداخلية وتحقق الانسجام بينها .. لأن هو ده الهدف ..

 

وأخيرًا، أخضر بيقولك متشغلش نفسك بالمسميات العلمية ولا تسمح لها تعطلك أو تقيدك .. المهم أنك تحاول تفهم نفسك بجد .. عندك ADHD أو معندكش مش هو ده اللي هيحدد أنت مين وليه .. اعرف نفسك وافهمها .. ولو فيه حد مش فاهمك أو مش فاهم تصرفاتك وميعرفش يعني ايه ADHD فشيّر معاه الحلقة دي عشان يفهم..

وبس كده سلام.