1- الكوميديا مش عيب

عندي واحد صاحبي اسمه مروان

ميم لورد بس الدنيا مش مدياله الفرصة

كل ما يفتح بوقه

بيجيب لنفسه المشاكل

يعني مثلا

في مرة كنا راكبين المترو

وأول ما جات المحطة اللي هننزل فيها وفيه ناس واقفة ع رصيف المحطة هتركب في نفس الوقت اللي هننزل فيه والدنيا هتبقى زحمة وكله بيخبط ف كله..
لاقيته بيقول بصوت عالي: "وسّع الطريق معاااانا واااااحدة حاااااامل هناااااا"

وفي مرة تانية كنا في الشغل

والمدير بلغنا ان في ميتنج في آخر اليوم

مروان يسكت وياكل عيش؟ 

لا ازاي

راح قايل بصوت عالي:

"الراجل دا يا إما معندوش شغل يا إما حد كان حارمه يمسك ميكرفون وهو صغير فبيحب يرغي كتير" 

والمدير سمعه ورفده

ودلوقتي بقترح عليه يقدم في مسابقات ال stand up comedy 

لإنه موهبة مظلومة فعلا

لإن الفكاهة أو حس الدعابة من أقوى المهارات الاجتماعية 

اللي ممكن تساعدك في حياتك

وتفتح لك أبواب كتيرة في الشغل 

بس للأسف ثقافتنا عندها تصور سلبي عن حس الدعابة

وإن مينفعش نضحك ونهزر ونألش في الشغل 

ولا في الشارع ولا مع الناس الغريبة

لكن احنا في حلقة النهاردة بقى

هنثبت أهمية الضحك والدم الخفيف

في الشغل وفي الحياة الشخصية

وهقولك ازاي الضحك والهيخيهوهيخو  بيخلوا حياتنا أحسن بكتير

كمان لو دمك تقيل ويلطش 

فاطمن هساعدك تبقى جيم كاري (Jim Carrey) في شلتك

وهخليك تستخدم الكوميديا استخدام صح من غير ما حد يفتكرك ساذج أو شخص مش مسؤول

كل ده في حلقة النهاردة من أخضر والمبنية على كتاب 

Humor, Seriously: Why Humor Is a Secret Weapon in Business and Life (And how anyone can harness it. Even you.)  

أو يعني الفكاهة، بجدية: لماذا تعد الفكاهة سلاحًا سريًا في العمل والحياة
(وكيف يمكن لأي شخص استغلالها، حتى أنت)

من تأليف:

جينيفر أكير "Jennifer Aaker "ونعومي بجدوناس"Naomi Bagdonas"

 

وبفكرك أنك تقدر توصل لآلاف ملخصات الكتب في الصحة النفسية والفكر والفلسفة ومجالات تانية كتير لما تحمل تطبيق أخضر على موبايلك وتشترك في الباقه المميزة علشان تسمع آلاف الملخصات الحصرية في 15 دقيقة للملخص بلا حدود.. ودا مش هتلاقيه على يوتيوب هنا ^_^

 

ومتنساش على ما التطبيق يتحمل تعمل سبسكرايب لقناة أخضر وتفعّل وصول كل الإشعارات ليك عشان تستمتع بكل جديد أول بأول

 

نرجع للضحك بتاعنا ونشوف بيقول ايه..

2- خرافات وأوهام عن الكوميديا والضحك

 

في دراسة علمية مشهورة بتقول

إن معدل الضحكات أو الابتسامات للإنسان

 بيقل كل ما بيكبر في السن.

والانخفاض ده بيحصل بشكل واضح

بعد سن الـ ٢٣ 

يعني لما الإنسان يبدأ يدخل في حياة الكبار

ويتحمل المسؤولية

ويسعى لتحقيق أحلامه 

ويشتغل ويبقى عنده كارير وضغوط.

 

والعلماء سموا الدراسة دي منحنى الفكاهة أو "humor cliff"

طب ليه الناس بتبطل تضحك أو تهزر مع بعض؟

لإن فيه ٤ خرافات مسيطرة على ثقافة الفكاهة

الخرافات دي بتعزل الدم الخفيف والضحك عن حياتنا.. 

 

 

• أول خرافة فيهم هي إن الشغل مش مكان للهزار

 

طب هل الشغل لازم يبقى جد ٢٤ ساعة؟

ممنوع حد يهزر أو  يضحك حتى في أوقات البريك؟

الغريب إن في دراسة بتقول

إن ٩٨% من المديرين

بيفضّلوا الموظف اللي دمه خفيف

كام يا أخضر؟

٩٨% يا صديقي

• هتقولي ده أنا أكيد مديري من ال ٢% الباقيين
• هقولك ما يمكن دمك اللي مش خفيف يا صديقي أو بتستخدم الكوميديا بشكل غلط وأوقات مش مناسبة؟.. أو حتى لو فعلًا مديرك بايخ ومن الـ 2% الباقيين مسيره يسمع الحلقة دي ويعرف!

المهم

الدراسة كمان قالت إن ٨٤% من المديرين 

شايفين إن الموظفين اللي عندهم حس دعابة كويس شغلهم وأداءهم بيبقى أفضل من الباقي.. يعني الموضوع مش مجرد هتضحك المدير عشان يزودك آخر السنة ولا حاجة هو هيأثر عليك أنت كمان وعلى أدائك ومزاجك..

 

 

• وتاني خرافة معانا هي خرافة الفشل

 

ودي بتحسسنا بخوف على مظهرنا وشكلنا لو قلنا حاجة والناس مضحكتش

أو إن الكومنت الساخر أهان حد أو سبب له ألم

بس مين قال أصلا إن الشخص اللي دمه خفيف لازم يهين أو يتريق على حد علشان يضحك الناس؟!

 

الفكاهة يا صديقي بتعتمد على عاملين: السياق والضحك

لو قلت كومنت ساخر مناسب للسياق  بس الناس مضحكتش 

فعادي مفيش مشكلة

أما لو ضحكوا فأنت كده جامد

أما لو كان السياق مهين لحد تاني فحتى لو الناس ضحكت

فأنت كده شرير يا صديقي 

وانا مصدوم منك.

 

 

 

• فيه خرافة تالتة بقى وهي أن علشان تكون فكاهي لازم تكون بتضّحك غيرك ويعني راجل مسخرة من الآخر.. 

 

معلش بس.. هو مين قال كدا؟ مش لازم تضّحك حد خالص عشان تثبت أن عندك حس فكاهي لو أنت مش عايز.. كفاية بس تضحك على الكومنتات والنكت اللي بيقولها غيرك، متبقاش قفل يعني أو واخد وش خشب كدا مش بيتفاعل مع أي حاجة مضحكة.. يا سيدي كفاية توزع ابتسامتين تلاتة كدا كل يوم وتخفف هموم غيرك وضغوط الناس دا أهم 1000 مرة من إنك تبقى كوميدي أوووه ياااه آخر حاجة ومفيش منك اتنين

 

• أما آخر خرافة معانا عن الدم الخفيف

 

هي إن الشخص بيتولد بيه

الحقيقة لأ، حس الدعابة مهارة ممكن أي حد يتعلمها

صحيح في ناس دمها خفيف بالفطرة

لكن أي حد ممكن يستخدم خفة الدم 

لما يعرف تقنيات معينة

ويتدرب عليها باستمرار 

 

3- سحر الفكاهة: تأثير الضحك صحيًا وفي الحياة العملية

طبعًا هتقولي وأنا عليا بإيه أتعلم ولا اضّحك حد ايه اللي هيعود عليا يعني؟ 

ودا ياخدنا للكلام عن فوايد الضحك العلمية..

لما بتضحك دماغك بيضحك معاك

لإن في كوكتيل هرمونات جميل انطلق في جسمك

خد عندك بقى:

• دوبامين Dopamine بيزود السعادة
• و أوكسيتوسين Oxytocin بيرفع الثقة في النفس

وإندروفين Endorphins بيقلل التوتر والقلق ويحسّن مزاجك

يعني الحالة الصحية النفسية والجسدية بتتحسن

وبتشوف الحياة والعالم بشكل إيجابي أكتر

طب ده صحًيا

طب بالنسبة للحياة نفسها بقى.. الشغل والعلاقات، هل خفة الدم أو حس الدعابة ممكن يفيدني في حياتي العملية؟ 

 

اه طبعا، الفكاهة زي سلاح سري في الشغل والعلاقات

سلاح عنده 4 قدرات مختلفة

 

• أول قدرة هي القوة

 

وهنا ممكن خفة الدم تبقى طريقة دفاعية لما تتعرض لهجوم أو في موقف محرج

زي مثلا لو نسيت اسم حد ممكن تطلع منها بإنك تقوله:

"أنا ذاكرتي على ادي في الأسماء

بس بفتكر الوشوش الحلوة كويس" ^_^ 

 

أو لو كنت طالع تتكرم أو تاخد شهادة في حفل تخرج

بس اتكعبلت ووقعت

ممكن تلعب ٣ عدات ضغط وتقوم 

والموقف المحرج هيعدي عادي

والناس هتضحك وهتعجب بحسك الفكاهي

اللي بردو من قوته إنه بيفتح لك طريق القبول

وبيخلي اللي حواليك يقدّروك ويدوك مكانتك

 

بص حواليك كده

هتلاقي في أي شلة صحاب

الأشخاص اللي دمهم خفيف

ليهم مكانة مختلفة

وبيجذبوا اهتمام الناس بسهولة

وبياخدوا اللي هم عايزينه بأقل مجهود!

 

 

• أما تاني قدرة لسلاح خفة الدم

 

كونها بتسهل لك تعمل روابط اجتماعية وتكوّن علاقات جديدة

بمعنى.. الناس اللي دمها خفيف

علاقاتهم الاجتماعية بتبقى أقوى

وبتدوم لوقت أطول

وكمان بيكسبوا ثقة الناس بسهولة

مسمعتش حد قبل كده اتجوز حد  وكانت من أول أسباب الارتباط "إن دمه خفيف"؟!

طب بذمتك مش بتحب تقعد مع صاحبك اللي بيضحكك أكتر من صاحبك الصيوحة العيوطة الشكّاء البكّاء؟

 

أقولك على الكبيرة؟

لما بتضحك.. بتبتكر.. وبتبقى كريتيف اوي.. 

 

• ودا  التأثير الإيجابي التالت لخفة الدم: الابتكار 

 

أصل حس الدعابة بيخليك تفكر برة الصندوق

وتاخد مخاطرة الناس خايفين منها

وبيحفز روح الإبداع الجماعية في الشغل 

لأن ممكن نكتة أو ألشة تتحول لمشروع حقيقي

زي ما حصل مع لوني جونسون Lonnie Johnson

وده مهندس كان شغال في التمانينات في مشروع مضخة تبريد بالطاقة الشمسية

بس اخترع بالغلط مضخة ميه

ولما اكتشف ده، قال لصحابه:

"احنا ممكن نعمل أقوى مسدس ماية في العالم"

وفعلا، مسدس الماية اتحول لمنتج

وبقى من أشهر ألعاب الأطفال العالمية 

أكيد لعبت بيه وأنت صغير وكنت بتهزر مع الناس وترش مايه عليهم

متعمليش فيها إنك كنت طفل مؤدب وهادي بقى

 

 

• ووصلنا لرابع تأثير إيجابي معانا لخفة الدم

 

وهي المرونة النفسية

حس الدعابة بيخليك تتجاوز الحاجات المؤلمة وتسخر من الأحداث السيئة  وتتحمل الضغط النفسي..

وممكن يساعدك إنك تتعافى من الاكتئاب!

وفيه شعوب معروفة بالطابع الكوميدي ليها حتى في أسوأ الأزمات.. ويمكن دا بيخفف نوعًا ما عن آلامهم

 

4- وصفة من مطبخ الكوميديا: ازاي تبقى خفيف الدم؟

طب بعد ما عرفنا عجايب الفكاهة والسر البااااتع للدم الخفيف..

ازاي بقى نتعلم مهاراته؟

بص يا صديقي

وصفة الدم الخفيف مكونة من جزئين

الحقيقة.. والتناقض المفاجئ

يلا نجرب مع بعض عشان نفهم أكتر

ممكن نقول:

"انا بشتغل شغلانة كويسة

بس لو كانت كويسة أكتر

كنت بطلت أروح"

أو ممكن أقول:

" التكنولوجيا ساعدتني في شغلي جدا

بقيت بوفر حوالي ٤ ساعات مجهود 

وبقعدهم على نتفليكس"

 

"أو: أنا متردد في كل قرارات حياتي

يا سلام لو حد يقدر ياخدها مكاني

ممكن اتنازل عن حريتي..او لأ هفكر ساعتها.. مش عارف"

 

ملاحظ معايا الفكرة فين؟

جملة حقيقية عن نفسك

وبعدها جملة مفاجئة متناقضة

وعلشان كده بينصح متخصصين الكوميديا إنك تدور في حياتك على الجزء الحقيقي

وتركز على أفكارك ومشاعرك الخاصة

وتبص على أفعالك المتناقضة

 

تيكنيكات الضحك

 

وفي كام تكنيك كده ممكن تتدرب عليهم

علشان تزود مهاراتك الكوميدية

أول تكنيك هو تضخيم الملاحظات

وهنا بتكبر الحقايق اللي لاحظتها

فمثلا ممكن تقول:

"أنا فاشل في الطبخ 

محدش بيطيق الأكل اللي بعمله

حتى البوتاجاز ما بيصدق أشيل من عليه الحلل

وبيطفي نفسه بنفسه"

 

وفي تكنيك تاني اسمه التباين

وهنا بتلعب على اختلاف حاجتين جمب بعض

فمثلا ممكن تقول:

"أنا مش متخيل ازاي أخويا مش مدمن قهوة زيي

اهو ده أكيد عنده دم في عروقه مش كافايين زي اللي عندي"

 

فيه تكنيك تالت وأخير

وهو بناء سلسلة افتراضات

وهنا انت بتقول افتراض غريب وبتكمل عليه

وتشوف العالم بقى عامل ازاي

زي مثلا ممكن تقول:

"يا سلام لو كان في Crying Corner في الشغل

كان زمانه بقى أزحم من الحمامات

وممكن نفطر ونتغدى هناك

وعمرك ما هتلاقي بنت حاطة ميك أب في الشغل 

دول أهم تكنيكات.. وأنت مع الوقت أصلًا هتلاقي التكنيك الخاص بيك أنت اللي محدش يعرف يطبخه زيك، لدرجة أن لما حد يعمله هيتقاله "أنت بتقلد فلان".. فخليك مع الموضوع لحد ما توصل لأسلوب خاص بيك في الضحك. 

 

5- الفكاهة في العمل: خلق ثقافة الفكاهة

 

ندخل بقى على الجزء اللي هيضايق المديرين

الفكاهة في الشغل

في 4 حاجات لو استخدمنا الفكاهة في الشغل بطريقة كويسة

هنقدر نخليها أحسن

أول حاجة هي التواصل

الشغل الحديث قايم على التواصل بين الموظفين

وكل ما كانت لغة وطريقة التواصل أحسن

كل ما زادت الانتاجية

والعلماء بيقولوا إن اللغة اللي بنستخدمها

هي اللي بتشكّل الطريقة اللي بنشوف بيها العالم والناس

ومن أكتر الحاجات اللي  تأثر على لغة التواصل هي الفكاهة

علشان بتسمح لك تتكلم زي البشر مش زي آلة أو جماد من غير مشاعر.

وبتقربّك من زمايلك في الشغل

 

ومش لازم تبقى مدير علشان تخلق جو من الفكاهة

ممكن تحسّن من بيئة العمل والعلاقة بين الموظفين

بحركات دمها خفيف وبسيطة جدا

زي مثلا الأسماء المستعارة بين الموظفين فتقول لزميلك اللي بينقذكم من الدروبات:

"الحقنا يا ونش"

أو تبعت رسايل دمها خفيف لزمايلك

من غير ما تطلع برة إطار الرسمية

زي إنك تضيف ملاحظة مضحكة في الآخر

ممكن مثلا تقول لل HR:

"أتمنى تقيمي الشهري يبقى زي تقييم حلقات Breaking bad"

وكمان الفكاهة مش بس بتقرب بين الموظفين وبتحسن لغة تواصلهم وبيئة العمل

دي كمان بتساعدهم يتعاملوا مع الأوقات الصعبة

ودي تاني حاجة

زي مثلا التخفيف من حدة مشكلة أو أزمة

أو انتقاد سلوك أو سياسة معينة للشركة

أو حتى الاعتراف بالأخطاء بطريقة كوميدية.. دا بيبقى أسهل عليك لما تقول غلطة ليك وأنت بتضحك ماهو محدش فينا بيحب يقول دا بتأنيب ضمير وجلد ذات قدام الناس

 

أما تالت حاجة
ممكن تستخدم الفكاهة في الإقناع

لأنها بتكسر الحواجز اللي بينك وبين الناس

علشان تقل مقاومتهم لتأثيرك

وبتزود من جاذبيتك الشخصية فبتسهل إن أفكارك تتقبل عادي.

 

خلق ثقافة الفكاهة

 

ولو خدنا خفة الدم للمستوى الإداري في الشغل

فهنلاحظ إن الفكاهة مرتبطة بقيمة تانية

وهي الثقة

الإحصائيات أثبتت إن الثقة

 من أهم العوامل المؤثرة على نجاح أي منظومة

بس في انخفاض كبير في معدلات ثقة الموظفين بالمديرين

ولو انت مدير 

وعايز تعرف ازاي ترفع ثقة موظفينك فيك

فلازم تخلق ثقافة الفكاهة في بيئة العمل

لأنها هتساعدك تبقى دبلوماسي أكتر

وتدير لحظات الخلاف بسهولة

وترفع من روح الموظفين المعنوية

وتحسسهم بالتقدير والاهتمام

كل ده عن طريق ثقافة الفكاهة

اللي معتمدة على العفوية والمفاجآت

وخلي بالك

لما تبقى متمكن من شغلك 

ويبقى دمك خفيف

ده مش بيقلل من مكانتك

بالعكس!

ده بيظهرك بصورة أقوى وأقرب للموظفين

 

طب فرضًا إنك مش في الشغل بس قدامك ناس كتير متعرفهاش وعايز تضحكهم.. 

لإن ساعات الظروف تحطك في مواقف

لازم تستخدم فيها شوية فكاهة علشان تعدي

زي مثلا إنك بتعرض بريزينتيشن "Presentation"

ونسيت أو اتلغبطت في حاجة

ممكن تلم الموقف بالكوميديا

بس خلي بالك علشان تعمل تأثير على الجمهور

لازم تعرف 3 عناصر مهمين

الحقيقة والمسافة وطبيعة الجمهور

الحقيقة وعرفناها

وهي إن الحاجة اللي هتقولها تكون حقيقية

أو على الأقل بتحصل في الواقع

وطبيعة الجمهور سهلة

وهي إنك تعرف خصائصهم 

بيحبوا ايه؟ بيفكروا ازاي؟ مستواهم ايه؟

 ويا ترى رد فعلهم هيبقى ايه؟

أما المسافة فهي بُعد الجمهور عن اللي هتقوله

هل هيقدروا يربطوا اللي قلته بحاجة عندهم؟

هل هيستوعبوا اللي بيضحك؟

علشان يضحكوا بعدها

ولا انت بتتكلم في وادي وهما في وادي تاني

طب لو قلت حاجة كنت فاكرها بتضحك

ومحدش ضحك.. ايه العمل؟

 

6- دورة الكوميديا الفاشلة

ما هو زي ما قلنا في الأول 

مش لازم حد يضحك

بس نفترض إنك عكيت الدنيا

وفشلت 

عادي وايه المشكلة

لازم تعرف إن دورة الفكاهة الفاشلة

عبارة عن مراحل

أول مرحلة هي مرحلة الاستيعاب

لما تعرف إن النكتة دمها تقيل

 أو البانش لاين "Punchline" وحش

مش لإن محدش ضحك

لا هو مش مناسب للسياق أصلا

ولا ليه معنى 

وبعدين بتبدأ مرحلة التحليل

 بتسأل نفسك

ايه أسباب الفشل؟

علشان في المرحلة التالتة

التحسين

يكون أداءك أحسن

طب لو بوظت الدنيا بردو؟

عيد يا صديقي المراحل من الأول تاني عادي

7-  أخضر بيقولك: خفة الدم مش قلة أدب

 

وفي النهاية يا صديقي أبو دم خفيف 

لازم أوعيّك وأقولك إن الدم الخفيف عمره ما كان مرتبط بقلة الأدب

وإن التنمر على الناس علشان تجيب ضحك أو تحقق الكوميديا مش بيزود مكانتك في شلة صحابك

بالعكس

ده بيقللك في عنيهم على المدى البعيد 

محدش هيحبك ولا هيطمن لك ولا هيآمن لك

ومع الوقت هتتحول لشخص مؤذي ومكروه

فلم نفسك كده يا متنمر يا اللي بتسمعنا

أما الأصدقاء اللي دمهم خفيف

فدول مش خايف عليهم

هايل يا ولاد استمروا

عايزين نحارب النكد ونقضي عليه

وبس كده

متنساش تضحك أو تبتسم في وش الناس.. فُكها بقى ياااااعم.. 

سلام