علم نفس الغباء
المقدمة
تعرف يا صديقي
إن واحد صاحبنا حسابه البنكي اتهكر
وكل فلوووسه اتسحبت
يساتر يارب طب وبعدين؟
ولا قبلين.. الهاكر خد كل فلوسه من حسابه
وبسهولة كبيرة أوووي
أصل الباسورد بتاعه
كان 1234
طبعًا أنت خلاص كدا الراجل اللي اتسرق دا مبقاش صعبان عليك، وبقيت شايفه حد غبي ويستاهل..
أصل مين يعني يحط باسورد سهل كدا
وعايز اقولك إن تفكيرك في الموقف ده
هو الغبي يا صديقي
وده لأنك بررت السرقة
فمن وجهة نظر أخلاقية
ده تفكير غبي
وقبل ما تشتمن…. الصوت بيقطع
" أهو أنت اللي تفكيرك غبي يا أخضر" صوت بيطلع بيشتم بسرعة وعصبية"
برضو شتمتني؟ مقبولة منك يا صديقي
لأن في الحقيقية أنا الغبي
لأني مكملتش القصة
المهم طلع صاحبنا ده أصلًا
عميل سري في إدارة الحسابات
وكان بيحاول يقبض على الهاكر من مدة
فعمل حساب سهل الوصول ليه
والهاكر وقع في الفخ
وطبعًا دلوقتي نظرتك اتغيرت
وبقيت فاكر إن الغبي في الحالة دي
هو الهاكر
أصل مين الهاكر الغبي
اللي يقع في فخ بسهولة كدا
احم بس اسمحلي اقطع كلامك
واقولك يا صديقي
إنك أنت اللي فكرت بحماقه في الحالة دي برضو
وده لأنك صدقتني
ومسألتش عن مصدر
ولا انتقدت القصة
" يوووه تاني يا أخضر؟ أهو أنت " " نفس الصوت"
مقبولة منك تاني برضو يا حبيب أخضر
أنا بفكر أوقات بشكل غبي فعلًا
كلنا بنفكر بشكل غبي
حتى أنت كمان!
كلنا كدا ازاي يعني يا عم أخضر
مالك الحلقة دي شغال شتيمة في الكل
وكلامك ناقص ليه
هقولك حالًا معنى كلامي، وهقولك يعني ايه غباء، وليه " غبي" مش شتيمة وكمان مين هو الشخص الغبي، كل ده هنعرفه النهاردة في حلقتنا المبنية على كتاب " the Psychology of Stupidity " من تأليف Jean-François Marmion.
ايه بقى موضوع الغباء دا؟!
يعني ايه غباء؟
خليني اسألك الأول: هو يعني ايه غباء أصلًا؟
سؤال غريب مش كدا؟
لأننا اتعودنا نستخدم
" غبي" كنوع من الإهانة
وسبحان الله تقريبًا دي الإهانة
اللي كل الثقافات واللغات معترفة بيها عادي
بس لو سألت أي حد فيهم
مين هو الشخص الغبي
هتلاقي إجابات مختلفة
يعني ممكن حد يقولك
الغبي هو اللي بيعمل
تصرفات غير مناسبة
في وقت غير مناسب
زي إنه يضحك في عزا مثلًا
وممكن حد تاني يقولك
إن الغبي هو اللي درجاته وحشه
أو مستواه في الشغل مش قد كدا
وممكن حد تاني خاالص بقى
يقولك إن الغبي هو الشخص
اللي بيتأثر باللي حواليه بسهوله
ومعندوش شخصية
كل دي تعريفات نسبية للغباء
وبتختلف من ثقافة للتانية
ومن فرد للتاني
حتى لو بينتموا لنفس الثقافة
وعلشان اللخبطة دي كلها
فخلينا نبص على الغباء بقى من منظور علمي
بس خليني احذرك
إن حتى الغباء من منظور علمي
تعريفه نسبي .
انا آسف على اللغبطة دي والله
بس بلاش عصبية وخليك معايا للاخر
تعريف الغباء من منظور علمي بيختلف حسب بتبص عليه منين بالظبط
فخلينا نبص عليه من أربع جهات مختلفة
وهما:
- المنظور المعرفي
- والمنظور العاطفي
- والمنظور التطوري
- وأخيرًا المنظور الأخلاقي
وخلينا نبدأ بالمنظور المعرفي
والمنظور ده بيقولك
إن الغباء ببساطة
هو حالة معناها إن ال IQ قليل
يعني الغبي في نظرهم
هو الشخص اللي مش قادر يكمل نمط بسيط
أو يحل معادلة سهلة
أما المنظور العاطفي
فقالك إن الغباء ده
معناه مفيش قدرة على التحكم في المشاعر والعواطف
وبالتالي الشخص الغبي هو الشخص اللي بياخد قرارات
بناء على مشاعره المتسرعة
زي مثلًا إن حد يسيب شغله
بسبب إنه زهقان
من غير ما يفكر في تبعات القرار ده
أما بقى المنظور التطوري
فقالك فكك من كل الهري ده
الغباء ببساطة هو تكرار سلوكيات
غير نافعة وانتظار نتيجة مختلفة منها
زي إن حد مثلًا يسهر كل يوم لوش الفجر
ويستنى إنه يصحى بدري فايق ورايق
وهو بيكرر نفس السلوك كل يوم
وآخر منظور يقى
وهو المنظور الأخلاقي
فده قالك إن الغباء نسبي
ومعتمد على القيم المقبولة عند المجتمع
يعني فيه مجتمع بيشوف إن الغش
مش غلطة كبيرة
وفي مجتمع تاني بيشوف إنه عيب كبير
فحسب المنظور ده
الشخص الغبي هو
اللي تجاهل قيم مجتمعه
والمعلومات المتاحة
وعمل تصرف مرفوض
وهو مدرك إنه مرفوض
يوووه يا أخضر كل ده كلام عن الغباء ومعناه، أنا تهت منك، خلصني عايز تقول اييييه
الدرجات
الحوار يتوه أنا عارف يا صديقي
ومتقلقش مش معنى إنك تايه
إنك غبي لا قدر الله
لا…
أنت بتفكر بشكل غبي أوقات كتير اه
بس أنت مش غبي يعني
وقبل ما تشتم تاني
خليني اكلمك
عن
باسكال إنجل | Pascal Engel
وده عالم نفس رايق
حس بالتوهان زيك بالظبط
من كل تعريفات الغباء دي
وقال أنا هفكني من كل الكلام ده
ومش هعرف الغباء
أنا هحط درجات للغباء
وبالفعل باسكال فكس لتعريف الغباء
وحط ٤ درجات للغباء اعتمادًا على الناس
اللي بنتعامل معاهم وبنشوفهم
والدرجات دي كانت
كالتالي:
1- الدرجة الأولى وهي البلادة الذهنية
ودي أعلى درجة من الغباء
ومعناها شخص عنده مشاكل في القدرات العقلية الأساسية
زي التفكير المنطقي والنقدي
وفي الغالب عنده مشكلة في التطور العقلي زي مرض وراثي مثلًا
2- أما الدرجة التانية، ودي أقل شوية من البلادة الذهنية ، وهي درجة البلهاء الطيبون!
وده الشخص اللي عنده ذكاء معتدل ونوايا كويسة
لكن تصرفاته غير منطقية
وتفاعله مع المواقف الاجتماعية غير متوقع
وده بسبب نقص الخبرة
وانعدام الفهم للسياقات المختلفة
3- والدرجة التالتة بقى
هي:
درجة الحمقى
ودول أذكى شوية من البلهاء الطيبين
وعندهم قدرة تفكير كويسة
لكنهم بيستخدموها بشكل غلط
وعندهم غرور كبير
بيخليهم مقتنعين إنهم صح
ودول بيسببوا أذى للي حواليهم بقراراتهم المتسرعة السيئة
ووصلنا لأخر درجة من درجات الغباء
4- وهي الدرجة الرابعة
والدرجة دي من الغباء
اسمها الغباء المتطور
وده لأنها معقدة جدًا
وعكس الدرجات الباقية
أصحابها عندهم ذكاء عالي
لدرجة إنك ممكن تلاقي
ناس منهم مثقفين وعلماء
وكمان واخدين نوبل
والأشخاص دول
رغم ذكائهم
فبيتصرفوا بشكل لا عقلاني
أو بياخدوا قرارات غلط
رغم إن عندهم العلم الكافي
لكنهم مش بيوظفوه صح
وبس كدا، دي درجات الغباء
وكان هدف باسكال منها إنه يقولك إن الغباء مش بالضرورة معناه انعدام الذكاء
ويوضح إنه درجات مختلفة في حجم تأثيرها
ها لسه تايه برضو؟ لو لسه تايه متقلقش، لأن علماء كتير فضلوا تايهين برضو بعد كلام باسكال، وتبنوا طريقة بحث مختلفة خالص بقى
الصفات المشتركة
في شوية علماء كدا
مكانش عاجبهم الحال المايل ده
وحسوا إن تعريفات الغباء ودرجات الغباء؛ كلها كلام عايم
غير قابل للقياس
ومنقدرش تطبقه على أرض الواقع
فقاموا شافوا طريقة بحث مختلفة
وهي:
إنهم يدرسوا الأغبياء
ويحددوا صفات مشتركة بينهم
بحيث يطلعوا في الآخر
بكام صفة كدا
أول ما نلاقيهم عند حد
نقول بسسسس
أهو ده غبي
والصفات المشتركة اللي حددوها كانت:
إن الأغبياء بيميلوا للمغالاة في تقدير نفسهم
يعني من الآخر؛ الغبي هو شخص بيحب ينفخ في قدراته
وكمان هو شخص بينسب لنفسه النجاح ويلوم أي حد على الفشل
يعني لو كان في تيم، والتيم نجح فهو اللي نجح
لكن لو التيم فشل..!
فالتيم هو اللي فشل
هو ملوش دعوة..
ولقيوا كمان
إن الغبي هو شخص
عنده تشاؤم اجتماعي وسياسي
كل الناس في نظره فاسدين
وكلهم جهلة
وهو الوحيد اللي عنده ضمير
وفاهم اللي بيعمله
فتلاقيه فاكر إنه يقدر يعمل
كل حاجة بسهولة وإتقان
يعني يقدر يكون مدرب كورة
بدل المدرب الفاشل اللي لسه مخسر فريقه
ودكتور شاطر عنده ضمير
بدل الدكتور اللي لسه مدفعه فلوس كتير
وهكذا بقى …
وعارف إن زمانك بتقول لنفسك" هو الغباء موضوع مهم أوي كدا لدرجة إن العلم يحاول يعرفه، وكمان نحطله درجات وتعريفات وصفات ..لييييه كل ده يا أخضر؟
عايز اقولك إن موضوع الغباء ده شغل العلماء جدًا
لدرجة إن فيه منهم كرسوا حياتهم
بس علشان يفسروا ليه بنعمل تصرفات غبية
النظام الثاني خارج الخدمة
وواحد من اللي كرسوا حياتهم
علشان يفسروا التصرفات الغبية دي كان عالم الاقتصادي الشهير: دانيال كانيمان | Daniel Kahneman
ودانيال قالك
أنا هبسط الموضوع
احنا هنتخيل إن العقل البشري زي الكمبيوتر بالظبط
والكمبيوتر ده
فيه نظامين تشغيل
- النظام الأول
هو نظام معتمد على الحدس
بيتستجيب بانفعال وبسرعة لكل المثيرات من غير ما يحلل المعطيات
وبسبب كدا بياخد قرارات متهورة وغبية
أما النظام التاني
فهو نظام بطيء
بياخد وقت يفكر
ويحلل المعطيات كلها
وكمان بيشرف على النظام الأول
ويقوله استنى عندك
بلاش القرار المتهور ده
وبسبب كدا
القرارات الناتجة عنه
منطقية أكتر
فدانيال قالك إن التصرفات الغبية
هي ناتج تحكم النظام الأول في القرارات
وإن الشخص الغبي
هو شخص معطل النظام التاني
ومعتمد على النظام الأول
فكل ردود فعله
متهورة وغبية
وكمان قالك إن أي حد فينا معرض لسيطرة النظام الأول في مواقف كتير
يعني كلنا أغبياء في أوقات معينة!!
تفسير بسيط ومنطقي مش كدا؟
لو مش فاهمه
فأنت تييييت (صوت تييييييييت) بقى
هه بهزر معاك ياصديقي
المهم إنه بعد ما دانيال فسر التصرفات الغبية
وبعد ما حطينا تعريفات ودرجات للغباء
فخلينا بقى نتكلم عن أنواع الغباء
أنواع غباء ؟
هو فيه كمان أنواع غباء يا أخضر!
أنواع الغباء
الغباء اللغوي
يوووه فيه كتير متعدش
بس احنا مش هنعرف نتكلم عنهم كلهم؛ فخلينا نتكلم عن 4 أنواع هما الأهم:
- الغباء اللغوي
- وكمان الغباء السياسي
- والغباء الاقتصادي
- وأخيرًا الغباء الرقمي
وهنبدأ كلامنا
بالغباء اللغوي
وخليني احكيلك قصة الأول
في رواية اسمها ١٩٨٤
من تأليف جورج أورويل | George Orwell
بتظهر لغة جديدة وغريبة
بين شخصيات الرواية
والكل بيستخدموها
واللي بيميز اللغة دي
إن مراكز الدماغ العليا
مش بتتحكم فيها
يعني ايه بقى الكلام المعقد ده؟
يعني الناس بيتكلموا من غير ما يفكروا
فتلاقي واحد بيقول للتاني مبروك في عزا
أو واحد بيشتم وبيقول كلام عنصري
يعني محدش بيفلتر كلامه
واللغة دي سموها
" نيو سبيك | New Speak" يعني اللغة الجديدة
طب ايه علاقة اللغة اللي في الرواية
بالغباء اللغوي اللي هنتكلم عنه؟
العلاقة بينهم يا صديقي
إنهم متشابهين
لدرجة إن العلماء استخدموا
" نيو سبيك" علشان يوصفوا الغباء اللغوي
وهقولك حالًا متشابهين ازاي
الغباء اللغوي ولغة النيو سبيك
الاتنين مش بيوصفوا الواقع
ولا بيوصلوا أفكار
والكلام ملوش أي معنى
لأنه مش بيوصل أي رسالة مهمة
والاتنين مش بيعدوا على الدماغ الأول
يعني هنلاقي الشخص الغبي لغويا
بيقول أي كلام في أي وقت
مش بيختار لا وقت ولا بيئة مناسبة
ولا حتى بيفكر مرة واحدة في كلامه قبل ما يطلع
وهنلاقي إن الغبي لغويًا
كلامه كله عبارة عن:
تحيز
أو عنف
أو عنصرية
أو غلطات منطقية وهبد
أو شعارات رنانة
الغباء السياسي
وعلى ذكر الشعارات الرنانة
فده ياخدنا لتاني نوع من الغباء
وهو الغباء السياسي
أصل مفيش أكتر من الشعارات الرنانة
في السياسة
والغباء السياسي ده
نقصد بيه الأشخاص المتعصبين
المقتنعين إنهم أعلى وأفضل من الكل
وإن وجهات نظرهم صح
ومش بيسمعوا للأطراف التانية
ولا بيقدموا حجج منطقية
وكلامهم نصه شعارات
وهنلاقي نوع الغباء ده منتشر في الأيديولوجيات المتطرفة واللي بتحيد عن الفطرة السليمة
زي التحيزات العرقية أو التحيز لجنس معين سواء رجاله أو ستات..
والعلماء لاحظوا إن
الغباء السياسي
خطر جدًا
وده لأن الأغبياء سياسيًا
بتسيطر عليهم دوافعهم اللاواعية
ورغباتهم وغرائزهم
فيبدأو يرفضوا كل ما هو أجنبي
وبتزيد عندهم مشاعر التميز والاستثنائية
ويقتنعوا إن الأيديولوجية اللي بينتموا ليها
صح بشكل مطلق
ونتيجة لده بيحصل
تصرفات عنيفة
قد تصل لأذية الأشخاص المختلفين عنهم
ياااه يا أخضر
يعني الغباء ممكن يكون خطير؟
اه جدًا، أومال أنا مكلف نفسي وبشرحلك كل ده ليه
الغباء الاقتصادي
النوع التالت من الغباء بقى هو الغباء الاقتصادي
وده حوار لوحده
فخلينا نجيبه من أوله علشان نفهم
العلماء زمان
لما حبوا يدرسوا قرارات البشر الاقتصادية؛ افترضوا إنه طبيعي كل واحد عايز مصلحته فمحدش هياخد قرار اقتصادي يضره ولا يضيع فلوسه اللي تعب في تجميعها
وبناء عليه حطوا علم الاقتصاد القياسي
وهو فرع الاقتصاد اللي قالك
إن الفرد دايمًا بياخد القرار العاقل
اللي في مصلحته ومصلحة فلوسه
بس لما نزلوا لأرض الواقع بقى لقيوا إن مش دايمًا الفرد بياخد القرار الاقتصادي الصح
وإنه في سلوكيات كتير مش مفهومة
يعني ممكن تلاقي واحد بيستثمر فلوسه وهو معتمد على الحدس ومعندوش خبرة
أو واحد تاني بيشتري حاجات كتير مش مهمة ومش أولوية وهو مش قادر يدفع تمنها
فقالولك بس
احنا هنعمل فرع تاني من علم الاقتصاد؛ ونسميه الاقتصاد السلوكي
وده هيدرس قرارات الأفراد
المتأثرة بالعواطف والدوافع اللاواعية
اللي بتأثر في سلوك الشراء
وتخلي الأفراد يفضلوا المتع اللحظية
وفي المقابل ياخدوا قرارات غبية
وقام عالم نفس
اسمه باري شوارتز | Barry Schwartz
زود على كلامهم عن الغباء الاقتصادي وقالك إن أفراد العالم الحديث أغبياء اقتصاديًا بسبب تعدد الخيارات..
يعني الواحد بيدخل السوبرماركت يلاقي مئات الأنواع لنفس المنتج
وآلاف المنتجات
وده بيخليهم مرتبكين
وفي الغالب قدام كل الخيارات دي
بياخدوا في الآخر القرار الغبي
يعني يا أخضر علشان اشتريت
بيتزا بال ٢٠٠ الأخيرة
ابقى غبي اقتصاديا؟
اه بالظبط
ومتشتمنيش
ده كلام علماء الاقتصاد
مش كلامي
الغباء الرقمي
ومتقاطعنيش
خليني اكمل كلامنا عن الغباء
النوع الأخير من الغباء بقى
هو
الغباء الرقمي
والنوع ده من الغباء
معقد جدًا
فخلينا نتكلم
عن معناه
والعوامل اللي سببت ظهوره
الغباء الرقمي هو عدم قدرة الفرد إنه يستخدم التكنولوجيا بشكل صحيح
ومش بيعرف يحمي نفسه أو بياناته
وممكن يسبب أذى لنفسه
أو للي حواليه كمان
والغباء الرقمي ده مش بيظهر على الانترنت بس
ولكن بينعكس في تصرفات الفرد في الواقع
وده اللي هنلاحظه لما نتكلم عن العوامل اللي خلقت الغباء الرقمي، وكمان كانت السبب في إنه في حالة تزايد
والعوامل دي كتير ومتنوعة
لكن هنتكلم عن أهم عاملين منهم، وهما:
وسائل الإعلام
ومنصات التواصل
وهنبدأ بوسائل الإعلام
وخليني احكيلك قصة عنها
سنة ٢٠١٢ بيحصل ضجة كبيرة
بسبب نشر كتاب اسمه
Trust Me, I'm Lying: Confessions of a Media Manipulator
وده لأنه مؤلف الكتاب
اللي اشتغل في مجال التلاعب بالإعلام
اتكلم في كتابه عن الخدع اللي بيمارسها الإعلام
وعن إن الأخبار مش دايمًا حقيقة
وإن الإعلام بيخلق عناوين مثيرة ومضللة علشان يلهي الناس ويلغي قدرتهم على التفكير الناقد
وده بدوره بيزود الغباء الرقمي
لأن الشخص بيصدق أي حاجة
يقرأها أو يشوفها بدون تفكير
وبالتالي بتنتشر الإشاعات
وبتتحول لحقاىق
أما العامل التاني والأهم
فهو
وسائل التواصل الاجتماعي
وخليني اقولك إن دي لوحدها
بتخلق حالة خطيرة من الغباء الرقمي
اللي بينعكس على أرض الواقع
ويسبب أذى للناس
ووسائل التواصل الاجتماعي
بتخلق الغباء الرقمي
من خلال حاجتين
أول حاجة
هي:
إنها بتحفز السعي المحموم للشهرة
فتلاقي الشخص بيعمل أي حاجة علشان يتشهر
وبسبب ده بقينا نشوف تصرفات غبية جدًا زي:
المقالب الخطيرة اللي بتنتهي بموت أصحابها
أو التجارب المؤذية زي إن مراهق يجرب يشرب كلور
أو أي مادة سامة..
وكل ده علشان المشاهدات والشهرة!!
وتاني حاجة
هي
إنها بتوفر
هويات مجهولة للمستخدمين
فممكن الشخص يعمل حساب فيك
ويكتب كومنتس تنمر وشتيمة
أو ينشر اشاعات مؤذية من غير ما يخاف من التبعات
لأن في نظره محدش عارفه
فيقدر يعمل تصرفات غبية وخطيرة
من غير ما يطاله الضرر من ورا أفعاله
وبس يا صديقي
بكدا نكون خلصنا أنواع الغباء
وعارف إن زمانك بتسأل سؤال مهم
هو:
نقضي ازاي بقى على الغباء يا أخضر ؟
الخاتمة
وعلشان أرد على سؤالك
هستشهد بكلام عمنا اينشتاين
اللي قالك
" هناك شيئان لا حدود لهما: الكون والغباء البشري، ولست متأكدًا بشأن الكون!""
يعني هو قصده يقولك
إن كدا كدا دايما هنعمل تصرفات غبية
وإن مفيش حدود للغباء
ولا نهاية لوجوده
لأنه جزء من وجودنا البشري
حتى اينشتاين نفسه عمل تصرفات غبية
لكن اللي نقدر نعمله هو إننا نتقبل الغباء ونتحمل مسؤولية تصرفاتنا
يعني لو عملت فعل غبي خلاص اتعلم منه وحاول متكرروش
أصل كدا كدا هتعمل تصرف غبي غيره
وبرضو هيكون دورك هو إنك تتعلم من غلطتك ومتكررش الموضوع
وبس كدا ياااا ، أقصد يا صديقي.. بتمنالك حياة رايقه بعيدًا عن الغباء والأغبياء.. سلام