خازوقولوجي: علم دراسة الخازوق
مقدمة
في العصور الوسطى والقديمة
انتشرت أساليب بشعة في الإعدام والتعذيب
أشهرها الإعدام بالخازوق
يجيبوا الضحية ويقعدوه على عمود خشبي حاد
ويفضل لأيام يتعذب وينزف لحد ما العمود يدخل من جسمه ويطلع من فوق
ويفضل شعور الألم البشع مصاحب الضحية وهو بيموت بالبطيء
ومن أشهر ضحايا الإعدام بالخازوق هو الشهيد سليمان الحلبي بعد ما قتل كليبر قائد الحملة الفرنسية على مصر وقتها، بس الحمدلله إن الاعدام بالخازوق اختفى في عصرنا الحديث..
بس للأسف
الخازوق نفسه مختفاش
واتحول من عامود خشب حاد بيقتل؛ لـ خازوق معنوي
صدمة مؤذية ومؤلمة لصاحبها.. محدش فينا مجربش الخازوق المعنوي اللي ممكن يبوظ حياتك كلها!
عارف الحدث اللي لما تفتكره وتقول انا حياتي اتغيرت 180 درجة بعده
-للأسوأ طبعا-
اهو هو ده لاموغظة الخازوق
ايه بقى أنواع الخوازيق؟
وهل أقدر أهرب منه؟
أو حتى أقلل من كمية الخوازيق في حياتي؟
طب يعم أنا لبست الخازوق خلاص
أعمل ايه علشان أتعافى منه؟
متقلقش يا صديقي
معانا دراسة علمية عن الخازوق
عملها الكاتب كيرلس بهجت
في كتابه "خازوقولوجي: علم دراسة الخازوق"
ودلوقتي بقى.. يلا نشوف الخوازيق اللي ورانا.
أنواع الخوازيق
وهنحكي النهاردة قصة كريم؛ سوبرمان الخوازيق، مرجع المعذبين وأسطورة الحظ السيئ
كريم عدى على كل أنواع الخوازيق الأربعة
وجاي يفيدنا بخبراته
ويقولنا:
أول نوع هو الخازوق الطاير
وده بيجي في كريم بالغلط
بيبقى قاعد بيشتغل في أمان الله
وتلاقي المشكلة جاية لحد عنده
في عميل اتشتم من موظف تاني اسمه كريم بردو
فالعميل قدم شكوى للمدير
وراح المدير خاصم لكريم بتاعنا يومين من المرتب
طب وأنا مالي يا لمبي.. اهو هو كدا وعديها..
أما النوع التاني من الخوازيق هو الخازوق الحتمي
وده الظروف بتفرضه غصب
يعني كريم اتجوز وخد أجازة من الشغل أسبوعين علشان يسافر مع مراته يتفسح ويتبسط بحياته الجديدة
ولما رجع
لقى الشركة بتقوله ألف شكر يا عم كريم
احنا سرحنا 50% من الموظفين علشان عندنا أزمة سيولة ماليه وهنبيع الشركة لمستثمر من كوستاريكا
بس الصراحة بردو
أنا هقولك حاجة عن كريم.. هو محنّك شويتين
وده بيلبسه في النوع التالت من الخوازيق
الخازوق الذاتي
زي ما عمل مع الوفد الياباني
اللي كان جاي الشركة يخلص صفقة استثمارية
فكريم قال لمديره أنا بتكلم ياباني من وأنا عندي 12 سنة
سيبني معاهم بس وهخلصلك الدنيا كلها
طبعا المعلم كريم ميعرفش عن الياباني غير كلمة أوتاكو
فبوظ الدنيا وموّت الوفد الياباني من الضحك والصفقة باظت
فالمدير راح طرده
وقاله: مترجعش قبل ما تتفرج على Death Notes و Attack on Titan
وآخر نوع خوازيق معانا هو الخازوق أبو لمبة
آجارك الله منه يا صديقي..
ده بيبقى جذاب وخادع للضحية
زي الشخصيات النرجسية كدا
وطبعا كريم مفوتش الخازوق ده وحب مريم التوكسيك
اللي طلعت عليه كل أمراضها
وهو كل اللي عليه: I Can Fix Her
ياخويا اتنيل..
كيف يُصنع الخازوق؟
بس الأهم من هو ايه نوع الخازوق.. هو كيف يُصنع الخازوق..
هاخدك دلوقتي وندخل المطبخ ونعرف الطبخة السودا اللي بيتطبخ بيها الخازوق.. بس وأنت داخل خلي بالك لتلبس ف خازوق كدا ولا كدا بالغلط..
شوف يا عزيزي المتخزوق.. فيه 6 عناصر رئيسية لصناعة أي خازوق
أ,ل حاجة: التأقلم على القهر
بمعنى؛ إن كريم اتظلم في مواقف كتير
في الأول كان بيطالب بحقوقه وبيدافع عنها وبيهاجم اللي ظلمه
بس لما اتهدد واتعاقب والناس اللي حواليه خوفوه وقالوله امشي جمب الحيط يا ابني وعدي أيامك على خير
فكريم اتعوّد إنه يتظلم
واتأقلم على دور الضحية ومبقاش يعترض أو يدافع عن نفسه خلاص
وده خلاه يستقبل الخوازيق بسلام
ايه يعني ما هي كده كده بايظة بايظة بايظة
" تتقال بصوت محمود العسيلي"
أما تاني عنصر من وصفة الخازوق: هي التلاعب النفسي
فاكر مريم التوكسيك؟
الخازوق أبو لمبة الجذاب المخادع ده
مريومه الكيوتايه النسمة استخدمت أساليب النرجسية في الإغراق في الحب
يعني اهتمام بكريم وكلام حلو وصوابع جلاش وحبيبي غرز الشوكة في إيدي افتكرني البسوسبة وشوية تلزيق كدا لحد ما الواد يا عيني وقع على وشه
وهوووب
الخازوق بدأ يكشر عن أنيابه
وبدأت مريم تتحكم فيه وتؤذيه باسم الحب.. كم أنت برئ أيها الحب..
لحد ما كريم اتعقد من حياته ومن صنف البنات كله
حتى بنات أفكاره مش بيطيق يقعد معاهم، ما هم بنات بقى وكدا ههه
أما تالت عنصر معانا هو المفاجأة
الخازوق الصح لازم يكون غير متوقع
أيا كان بقى هو ايه:
- سواء شخص ظهر من العدم حط عليك وكّرهك في حياتك
- أو حدث دمر مستقبلك
- أو ماتش نهائي القرن اللي خسرته
- أو يمكن المصيف اللي اتلغى بسبب هجوم السلاحف على شواطئ مرسى مطروح
بس تأثير المفاجأة بيزيد أكتر وأكتر بسبب العنصر الرابع
وهو سطحية الضحية
يعني كل ما الضحية كان سطحي فهتلاقي المفاجأة بتلسعه أحلى خوازيق عادي مهو زيرو تخطيط زيرو تفكير في بدائل..
يعني كريم عنده قصر نظر
مش محتاج نضارة يا صديقي لا
عنده قصر نظر معنوي في التخطيط يعني
بيبص تحت رجليه يا سيدي
شخصية كسولة
مش بيفكر في المستقبل
ولا عامل حساب تقلبات الزمن
ومشغول بس بالتفاهات
فطبيعي أي حدث مفاجئ ولو بسيط
هيبقى خازوق بالنسباله
في ناس بقى تشلّك
يبقى سطحي ولسة واخد خازوق دشمله حياته ويروح يتعاطف مع صانع الخازوق!!!
وده العنصر الخامس من عناصر صناعة الخوازيق، وهو:
الشفقة
الضحية بيبقى متعاطف مع صانع الخازوق
وبيحاول تبرير السياق اللي حصل فيه الخازوق
ويقولك:
أكيد هو مُجبر على كده
أكيد مكانش يقصد
هو طيب مستحيل يعمل حاجة تأذيني
فوق يا ضحية
فووووووق
الجهل والغباء ده هو اللي مبوظ الوعي
الضحية دورها تدافع عن نفسها ضد صانع الخازوق
مش تخلق له مبررات
بس بيني وبينك يا صديقي
في ضحايا تحب الخازوق
وده آخر عنصر في صناعة الخازوق:
الحاجة إلى الخازوق
الشخص الضحية بيبقى عنده رؤية سلبية لذاته
وتقدير منخفض لقيمته
شايف إنه يستاهل ينجح أو يتحب أو الناس تحترمه
فبيجي الخازوق يأكد النظرة السلبية دي
لأن الشخص الضحية مهزوم ومكسور من جوا فممكن الخازوق يأكد له الرؤية السلبية عن نفسه دي.
طب والعمل؟
خليني أقولك العالم مكان للخوازيق
محدش هيطبطب عليك
أخضر بس اللي هيحاول يعلمك حاجة تنفع للزمن
تفادي الخازوق
بجد يا أخضر
يعني هتعلمني أخلص من الخوازيق في حياتي
انت غلبان أوي صديقي .. محدش قدر ولا هيقدر يمنع الخوازيق
بس ممكن نتفادى بعضها لو طبقت الـ 5 قيم دول في حياتك:
الشبع والحدود والحكمة والواقعية والجرأة
ملحقتش تكتبهم؟
هقولهم تاني واحدة واحدة
ركز معايا بقى
- أول قيمة معانا هي الشبع
الخازوق بيدخل من نقط ضعفنا؛ من جوعنا.. مض جوع أكل لأ..
جوعنا للأمان والحب والاحترام والقوة
الجوع بيكشفنا وبيخلينا فريسة سهلة للخازوق
فلازم نشبع الجوع ده بطريقة صحية
علشان تسد نقط ضعفك قدام الخازوق
- أما تاني قيمة معانا هي الحدود
لازم تسيب مسافة آمنة بينك وبين الأشخاص علشان تحافظ على طاقتك وكرامتك
ولو حافظت على الحدود دي ودافعت عنها
هيقل معدل الخوازيق اللي بيقابلك
- وتالت قيمة معانا هتساعدنا نتفادى الخوازيق
هي الحكمة
الشخص الحكيم بيتعلّم من خوازيق الماضي
وبيتقبل احتمالية الخطأ
ومنفتح على النقد الذاتي لأفعاله وأفكاره
علشان كده عقليته في تطوّر مستمر
ومش بيكرر الخوازيق
- وكده وصلنا لرابع قيمة وهي الواقعية
أغلب الخوازيق بيبقى سببها أن الشخص الضحية عايش في الخيال
وبتبني الضحية لنفسها عالم موازي من التوقعات
كل حاجة فيه بتمشي صح
وكل الناس فيه حلوين
مفيش تعب ولا خطر ولا فشل
والنتيجة ايه؟
خوازيق بلا عدد
فالحل إن الضحية تنزل على أرض الواقع شوية
وتخف توقعات مثالية
وتوسّع دايرة الاحتمالات
وتتوقع السيناريوهات الأسوأ
5) وآخر قيمة معانا لتفادي الخوازيق هي الجرأة
ودي معادلتها بسيطة
وعي بحقوقك + دفاعك عنها
مش محتاج تبقى قليل الأدب أو متهور
ولا حتى تدفع اشتراك الجيم ومتروحش
مش هنمسك الناس نضربهم أكيد
خلاص يعم كده؟
عرفت بتتفادى الخوازيق ازاي؟
يلا أشوف وشك على خير
مع السلا… (للفويس أوفر: كأنه هيقول مع السلامة بس قطع كلامه)
اه صح نسيت معلش
احنا لازم نتكلم عن التعافي من الخوازيق
يا إما الحلقة هتبقى خازوق للضحايا.. أصلًا يعني.
التعافي من الخازوق
طب ازاي نتعافي من خازوق لبسناه؟
أبدًا يا سيدي..
لازم نطبق 5 مبادئ علشان نتعافى من تأثير الخازوق
- أول مبدأ هو التجاوز
علشان تقدر تعدي اللي حصلّك متسيبش الألم يغرقك
ولا الندم يوصلّك للاكتئاب
كلنا بنغلط
والحياة مدرسة
ولسة هنغلط تاني ونتعلّم تاني
أما لو ملكش ذنب في الخازوق فحاول تتعلم منه
ومهما ندمت أو زعلت الماضي مش هيرجع
وخلاص بقى.. اللي حصل حصل ودعونا ننسى خوازيق الماضي ونستعد لخوازيق جديدة بنفس الحماس والإصرار
- وتاني مبدأ معانا للتعافى من الخوازيق
هو التحرر من وهم السيطرة
في ناس عايزة تسيطر على كل تفاصيل حياتها
راسمة خطة كاملة لـ 10 سنين قدام
ولازم كل حاجة تمشي حسب الخطة
وده للأسف وهم كبير وبيزود عدد الخوازيق
وبيصعب عملية التعافي
وانت عارف طبعا يا صديقي إن الحذر مش بيمنع عواقب الأحداث
احنا اه لازم نخلي بالنا كويس من الخوازيق بس مهما عملنا مش هنقدر نمنعها خالص
أومال ايه اللي في ايدينا نعمله؟ هقولك:
- المبدأ التالت اللي هو الاعتراف
اعترف بأنك اتخزوقت.. وقول أنا متخزوووق.. أنا أخدت خازووووووووق
دا اللي لازم يحصل
أصل إنكار الخازوق مش هيخفي أثره
ومتقلقش انت مش لوحدك والله
كلنا في الهوا سوا وياما خوازيق مجمعه الحبايب..
فالاعتراف بده
هيخلينا نبدأ طريق التقبّل والتعافي
واللي رابع مبدأ فيه هو التواصل.. بعد الاعتراف على طول:
- هنحتاج عملية إعادة بناء للثقة
نشيل فيها تأثير الخوف والغضب من دوايرنا القريبة
ونرفع من قيمة ذاتنا
ونرمم الأضرار النفسية اللي حصلت
- علشان نقدر ندخل على خامس مبدأ
من مبادئ التعافي من الخازوق
وهو التطوّر
اعتبر الخازوق امتحان
لازم تذاكر وتتعلم علشان تعدي منه
و لبسة الخازوق دي هتكسبك مهارات وقدرات جديدة
تقدر منها تتكيّف مع الظروف الصعبة وتطّلع أحلى ما فيك
شوفت؟ للخازوق جانب ايجابي اهو وبص لنص الخازوق المليان.
الثالوث المظلم
كل كلامنا اللي فات كان عن الضحية
وازاي تقدر تتفادى الخازوق
أو تتعافى من تأثيره
وفاضلنا كده نتكلم عن صانع الخازوق شخصيًا..
الشرير في رواية أحدهم واللي ربنا يجعله عبره كدا يارب..
ليه في ناس بتحب تضر الآخرين؟
العالمين النفسيين Kevin Williams و Delory Paulhus قالوا لنا إن في أشخاص عندهم 3 جوانب من الصفات الشخصية وسموها الثالوث المظلم
الجوانب دي بتخليهم أسوأ وأخطر نوع ممكن تتعامل معاه من البشر
والجوانب دي هي الميكيافيلية والنرجسية والسيكوباتية
وركز معايا بقى وأنا بشرح
علشان متقابلش حد فيهم
وترجع تصيح لي بعد كده
ركزززز..
الميكيافيلية جاية من واحد اسمه نيقولا ميكافيلي
فيلسوف وسياسي إيطالي مشهور كتب كتاب اسمه الأمير وده عبارة عن نصائح للحكام.
ميكافيلي بيشوف إن الغاية تبرر الوسيلة
وإنك تقدر تعمل أي حاجة مهما كانت سيئة
علشان تشبع رغباتك أو تاخد اللي انت عايزه
ومن هنا جه مصطلح الميكيافيلية؛ شخص بيبرر أي ضرر هيحصل للناس مقابل إنه يوصل لهدفه
أما النرجسية فهي هوس الإنسان بنفسه
مفيش حد تاني في العالم غيره
والناس كلها مش مهمين
وعادي لو حياتهم باظت.
وآخر جانب معانا في الميكس المظلم ده
هو السيكوباتية عياذًا بالله
وهنا الشخص بيكره حد وبيبقى عايز يضره
بطريقة مش مفهومة
ومتعرفش ليه
هو كده
خوازيق وخلاص.. حد سايكو لاموغظة هنعمل ايه..
والحل مع الثالوث المظلم ده مش إنك تحبه
أو تتقبل سلوكياته
أو تقول أنا هصلح الجزء ده من الشخص
الحل هو إنك تحمي نفسك منه
لإن الإصلاح لازم يبقى قرار واعي
من الشخص نفسه
والبيئة بعد كده بتساعده يتحسن
ركز في نفسك يا صديقي
احنا عايزين نحمي نفسنا الأول الله يبارك لك.
فن الغضب
ولازم يبقى عندك رد فعل صح تجاه الخازوق
أغلبنا بيبقى انفعاله الأول هو الغضب
وده مفهوم وطبيعي
بس احنا فاشلين في فن الغضب
الغضب لازم يتوجه صح
يتحوّل لقرار يغير طبيعة علاقاتك أو شغلك
أو يبقى رغبة لتغيير نفسك أو عاداتك
أو ممكن يبقى فرصة لإظهار أفضل ما فينا
واختبار قدرتنا على الصبر والتعافي والتسامح
خليك حبة زيتون
وفي الآخر يا صديقي
كل ما تعدي على خوازيق صعبة افتكر حبة الزيتون
بتتعصر علشان تطلّع أحسن ما فيها
وكده كده الدنيا هتعصرك
فخليك زي حبة الزيتون.. أو الليمون أي حاجة بتتعصر حبها عشان تطلع عصيرك الجميل في الظروف الصعبة.
وبس كده يا صديقي المتخزوق..
بتمنالك حياة هادية بعيدًا عن الخوازيق أو على الأقل ربنا يطلف بيك وقتها.. أصل خدها قاعدة: لن "ينتهي الخازوق أبدًا"
سلام!