كيف تكتشف ذاتك
مقدمة
بيعبر الفنان عبدالباسط حمودة عن معضلة الإنسان الحديث لما غنى وقال:
"أنا مش عارفني، أنا تهت مني، أنا مش أنا"
ممكن تشوفها مبالغة فنية من أستاذ عبدالباسط حمودة، لكن بيتفق معاه رغم اختلاف الثقافات
الرئبس بينجامين فرانكلين| Benjamin Franklin بنفسه
أحد الآباء المؤسسين لأمريكا
اللي بيشوف إن أصعب 3 حاجات ممكن توصلّها
هي الفولاذ والماس ومعرفة نفسك
وأنا من مكاني هنا كأخضر
بضم صوتي لصوت الأستاذ عبدالباسط والحاج فرانكلين
بس حابب أضيف
إن رابع أصعب حاجة ممكن توصلّها
هي كرسي الحلاق يوم وقفة العيد
بس معضلة عبدالباسط حمودة ممكن تتحل
رغم صعوبة معرفة النفس
إلا إنها مش مشكلة حتمية
وحلها طبعا عند أخضر
النهاردة أنا جاي أخدك من ايدك علشان نروح رحلة لاكتشاف النفس
هقولك أشهر الأساليب والنظريات في علم النفس
اللي هتساعدك تعرف نفسك
علشان تحقق فوايد كتيرة
زي أنك تكون سعيد وحد واضح ودوغري وعندك مناعة من الضغوط.. فاهم ذاتك كويس وبتتعامل مع صراعاتك الداخلية بشكل صحي
حلو الكلام.. ازاي الواحد يكتشف ذاته بقى؟
سؤال الهوية
في أغلب الأوقات لما الواحد بيسأل
أنا مين؟
بيبقى السبب إنه مش عارف ايه اللي المفروض عليه يعمله
وده اسمه سؤال الهوية
يعني الشخص عايز يعرف هو مين
علشان يتصرف على الأساس ده، مهو لو أنا معرفش نفسي فسوري يعني ايه الفرق بيني وبين السوشي؟ مبتحبش السوشي؟! عادي ولا تشغل بالك..
بس شوف من الآخر كدا.. علشان نجاوب على سؤال الهوية صح والواحد يعرف نفسه
لازم نجاوب على سؤالين مهمين:
1- السؤال الأول هو ايه القيم اللي بنؤمن بيها؟
2- والسؤال التاني ايه هي سماتنا الشخصية؟
قيم وسمات؟! يعني ايه بردو؟
البحث عن القيم
هي يعني ايه قيم؟ لا مش عايزين كلام مجعلظ ولا حاجة، ببساطة كدا
القيم هي شوية المبادئ والقواعد اللي بتشكل رؤيتنا للحياة
وبتساعدنا ناخد القرارات المهمة.
طب ومنين بتجيلنا القيم دي؟ بنتولد بيها ولا بنتعلمها؟
الاتنين يا صديقي.. فيه قيم بنلاقيها جوانا بالفطرة كدا زي حبنا للخير والعدل والأمانة، محدش يكرههم، بس فيه قيم تانية اتعلمناها بالتجارب والمواقف زي الثقة بالنفس.
طب جميل.. ازاي بقى ندور على القيم دي جوانا؟
لازم نعمل 3 خطوات
- أول خطوة هي نحدد الأولويات، تقولي ازاي اقولك:
اسأل نفسك ايه اللي بيسعدك وبيوجعك؟
ايه المعنى اللي انت مؤمن بيه؟
طب هل اختياراتك وأفعالك متسقة مع قيمك ولا لا؟
- وتاني خطوة أنك تفهم الدافع الشعوري ورا الأولويات.. ايه اللي خلى حاجه ليها اولوية عن التانية عندك؟ إلا لو ليها قيمة ثابتة بترجع لها فهنا أنت بتحدد القيمة اللي خلت الحاجة دي يبقى لها أولوية عن غيرها.
- وتالت خطوة هي أنك تحدد الأهداف..
فلو حد مؤمن بقيمة الأسرة ودورها في حياته
وعرف إن دا السبب في مشاعر الارتياح والأنس والسعادة اللي بيحسها يبقى لازم ياخد قرارات مستقبلية علشان يحافظ على القيمة دي
- زي انه مثلا يشتغل قريب من البيت أو يقيم في مكان أقرب لشغله.
- أو يرفض offer شغل حتى لو فلوسه أكتر طالما هيستنزف وقته ويجي على حساب أسرته.
السمات الشخصية
تمااااااام.. دا فيما يخص سؤال القيم.. طب والسمات الشخصية؟ بيعرفوها ازاي دي؟
بص؛ فيه اختبارات ونظريات كتيرة اتعملت علشان تجاوب عليه
أشهرهم مؤشر اسمه مايرز بريجز
اللي بيقسم الناس لأربع فئات ثنائية
كل فئة جواها نمطين نفسيين متضادين
وكل نمط واخد حرف مميز
وفي الآخر مجموع الحروف هي سماتك الشخصية.. هقولك كل فئة بأنماطها المتناقضة ورموزها ولو بتشوفني على يوتيوب دلوقتي هتلاقي اسم كل نمط على الشاشة ^_^
- فأول فئة في المؤشر دا بتقيس نمط الشخصية
هل أنت اجتماعي (E) فبتاخد خبراتك من الناس وبتتواصل مع الآخرين كويس ولا انطوائي (I) فمش مركز غير مع العالم الداخلي بتاعك ومندمج فيه اوي؟
- وتاني فئة بتقيس عندك الإدراك
وجواها الاستشعار أو الحس (S) ودا يعني يخص أكتر الأشخاص اللي بتاخد المعرفة بناء على الحواس الخمسة بتاعتها أو من الآخر مش بترتاح إلا للحاجات الملموسة.. والطرف التاني في فئة الإدراك هو الحدس(N).. ودا لو الشخص بيخمن أكتر وشاطر في أنه يفكر في الاحتمالات في أي موقف.
- أما تالت فئة بتحدد طريقتك في الحكم على الأمور
سواء كنت من مدرسة المفكرين بشكل موضوعي ومحدد فنرمز لك بـ ( T) أو كنت من ألتراس المشاعرجية أو يعني اللي قلبهم هو سيد أي موقف وعندهم إحساس وإنسانيات أعلى فنقول عليك ميال للنمط (F)
- رابع فئة بقى هي أنك تكون بين طرفين مختلفين:
بين الحكم (J) وما بين الإدراك( P)
الأول دا لو بتحب تعيش حياتك بشكل منظم ومخطط وبتستمتع وأنت بتاخد قرارات محبوكة شويتين من ألف لباء.. والتاني دا لو أنت حد جدع مسلمها لله وعايش حياتك بعفوية ومش حاطط في حساباتك ترتيبات كتير بس معندكش مشكلة تتكيف مع أي وضع؛ أسد من غير حسد الله أكبر.
استنى استنى.. أنت لغاية دلوقتي معرفتش شخصيتك صح؟!
معقول أسيبك كدا بردو ^_^ سايب لك اللينك في أول كومنت لو بتشوفني على يوتيوب.. اعمل الـ Test بعد ما نخلص الحلقة وابقى قولي في كومنت شخصيتك طلعت ايه؟
INTJ بقى ولا ISTJ
أصل أنت شخصيتك هتبقى مجموعة من السمات مش سمة واحدة ولا اتنين.. بس خلي بالك
أوعى تكتبها على بايو أكونت فيسبوك أو إنستا..
أو تنضم لجروبات أنماط الشخصية وتاخد الموضوع بجد أوي
لأن مؤشر مايرز بريجز ليه 3 عيوب مهمة
- العيب الأول هو نمطية القوالب ال16.. جاهزة كدا مش مرنة يدوب من كام سؤال شخصيتك تتحدد خلاص!
- والعيب التاني هو تأثير بارنوم | Parnom
اللي هو إننا بنحب نميل ونتفق مع الكلام اللي بيتقال عننا لدرجة أننا بنقول "يا ولد هذا أنا" وحاجة في منتهي الـ "يالهوي دا أنا.. والله أنا.."
- أما العيب التالت إن مفهاش مراعاة لفكرة تضاد السمات
يعني لو أنت شخص 55% اجتماعي و45% انطوائي
فالمؤشر هيصنفك كاجتماعي
وده غلط مهو جواك فيه 45% انطوائي.. كل دا اتنسى؟
ده غير إن الشخصيات بتنمو وبتتغير حسب المزاج والظروف الخارجية يعني عادي بعد فترة شخص يتحط في بيئة شغل معزولة وسفر بعيد عن أهله فيطلع 60% انطوائي مثلًا بعد ما كان 55% اجتماعي قبل كدا.
متنسااااااش..
صحصح معايا كدا ياصديقي احنا اتكلمنا عن سؤال الهوية وازاي نعرف قيمنا و سماتنا الشخصية.. كل دا ليه؟ عشان تكتشف ذاتك
طب وايه كمان هيخليك تكتشف ذاتك؟
تعالى أما أقولك..
عبر عن نفسك بقصة
لو سألتك عملت ايه امبارح؟
هتحكي قصة علشان تجاوب
ولو قلتلك ايه هي أكتر ذكرياتك السعيدة؟
بردو هتحكي لي قصة
القصص هي طريقة إنسانية
لرؤية النفس والعالَم
والتعبير كمان عن النفس
وعلشان كده في علماء كتير اعتمدوا على الأسلوب القصصي
في مساعدة الناس إنهم يكتشفوا نفسهم
وهنتكلم على أشهر أسلوبين
- القصص السبعة
- واختبار كارل يونج
وهنبدأ بالقصص السبعة
ازاي تحكي قصتك؟
كان في دكتور اسمه برنارد هالدن | Bernard Haldn
عمل مبادرة نفسية بعد الحرب العالمية التانية
علشان يساعد الجنود إنهم يأهلوا نفسهم ويشتغلوا في وظايف
والمبادرة نجحت فعلا
وبعدها بفترة جات دكتورة كيت ويندلتون | Kate Windlton
وطورت المبادرة دي باستخدام الأسلوب القصصي وقالت لنا على 5 خطوات نعملهم ببساطة:
- الخطوة الأولى اكتب 25 إنجاز في حياتك
- وبعدين اختصرهم لأهم 7 إنجازات ودي الخطوة التانية
- أما تالت خطوة أنك تحكي قصص مرتبطة بال7 دول
احكي فيهم مشاعرك وذكرياتك ودوافعك ساعتها
- ورابع خطوة هي التحليل
وهنا هتعرف ايه القيم المهمة عندك
والحاجات اللي بتبسطك
وقدراتك وظروفك وغيره
وكمان هتظهر قدامك أهدافك المستقبلية
- وهنا جه وقت الخطوة الخامسة وهي ابتكار 100 احتمال لتحقيق الأهداف دي
كتير 100 احتمال صح؟ الورقة خلصت؟
مش لازم عدد يعني يا صديقي متحبكهاش.. اكتب على قد ما تقدر وربك كريم.
تأثير التربية والنشأة
بس للأسف زي ما بيقولو كدا.. من فات قديمه تاه!"
مش هتقدر تبني تصوّر كامل عن نفسك بكل اللي احنا بنعمله دا من غير ما تعرف ماضيك
وتفهم ازاي اتربيت ونشأت
لأن جزء كبير من شخصيتك اتبنى بالتنشئة اللاواعية في فترة الطفولة..
وفي 3 نظريات بيشرحوا تأثير الماضي على شخصياتنا
- النظرية الأولى هي نظرية ترتيب المولود
- والنظرية التانية هي نظرية التعلق
- والنظرية التالتة هي مثلث كاربمان | Karpman الدرامي
تعالى كدا أما نشوف كل نظرية بتقولنا ايه..
ترتيب الطفل بيأثر على شخصيته
نظرية ترتيب المولود بتاعت الدكتور ألفريد ألدر | Alfred Adler
بيدعي فيها إن ترتيب الطفل داخل العيلة
ليه أثر كبير على شخصيته ونفسيته بيصاحبه طوال فترة حياته
الراجل دا بيقول لو عندنا 3 أطفال
فالطفل الأول بيكون محط اهتمام كبير من الوالدين
وبيميل لإثبات الذات والسيطرة
وبيطلب منه يكون قدوة ومثل لإخواته الصغيرين
ولما بيخسر اهتمام الوالدين بسبب الطفل التاني
بيحاول يعوضه أو يسترجعه
أما الطفل الثاني أو الوسطاني
فبيبقى متعاون أكتر من الطفل الأول
لإن اهتمام الوالدين اتقسم عليهم
وبيبقى عنده قدرة أكبر على التكيّف
بيمتلك قدرات دبلوماسية علشان يقدر ياخد اللي هو عايزه
أما الطفل التالت والأخير هو آخر العنقود
ودا اعتمادي وأناني ومتمرد
بسبب إنه بياخد أكبر قدر ممكن من الانتباه والاهتمام
ما خلاص اخواته الكبار استقلوا ونضجوا
فبياخد هو الحلو كله
دلع بقى ورغبات مجابة
ولو في مرة اترفض له طلب
بيزعل وبيتضايق جدا
مش متعود على حد يقوله لأ.. ننوس عين مامته بقى.. يوغتي😍
نظرية التعلّق
تاني نظرية بتشرح ماضي الطفل
هي نظرية التعلّق
ودي بتاعت جون بولبي | John Bolby
وماري إينسوورث | Mary Ensoworth
ما علينا…
نظرية التعلق بتقولنا ايه؟
بتقول إن فيه أربع أشكال لأنماط علاقتنا مع الناس
ودول بيتحددوا من علاقتنا مع الوالدين في الطفولة
- وأول نمط معانا هو التعلق الآمن
وهنا الأشخاص متزنين عاطفيا
وعندهم مشاعر إيجابية وصحية عن نفسهم
بيقدروا يترجموها في تعاملاتهم مع الآخرين
بيمنحوهم الحب والحنان والتفهم والدعم
ومساحة من الاستقلال والحرية
- أما النمط التاني هو التعلق القلِق الانشغالي
الأشخاص هنا دايما قلقانين
هل الطرف التاني بيبادلهم نفس المشاعر ولا لا؟
مفيش شعور بالأمان أو الاستقرار في العلاقة
محتاجين تأكيد مستمر للحب والتقدير
مكالمات ورسايل وتواصل جسدي وبصري
وأي غلطة أو تقصير..
بتترجم بشكل سلبي علطول
- عكس النمط التالت خالص.. نمط التعلق الرافض الاجتنابي
رافض واجتنابي هيكون ايه يعني؟
أيوه..هما دول اللي بيرفضوا يرتبطوا أو يقربوا من الآخرين
وشايفين العلاقات عبء مضرّ.. مفيش مشكلة الموضوع يبدأ بـ "أنا حطيتك عكتافي ومشطت شعراتي" بس في الآخر عطيها واحدة "أنا بخاف من الكوميتمنت أنا بخاف من الكوميتمنت" وقول يا يا فكيك بقى
هما دول اللي بيحبوا يكونوا لوحدهم
ومحافظين على مسافة آمنة مع الناس
علشان ميرتبطش بيهم عاطفيا لإنه مش مستعد لتقديم تنازلات أو دفع أي تمن في العلاقة
- النمط الرابع بقى شبهه شوية هو التعلق الخائف الاجتنابي
الشخص مش عايز علاقات قريبة بردو
بس علشان هو خايف يعاني
وده راجع لصدمات الطفولة
فبيحاول يبني حاجز قدام الناس
علشان يحمي نفسه
وبيحتاج وقت كبير جدا
علشان يتطمن للعلاقة
وبيحتاج كمان مجهود أكبر من الطرف التاني
علشان يطمنه
اقعد بقى فكر في علاقاتك مع الناس
وشوف ايه النمط الغالب عليهم
وحدد ازاي تقدر تحسّن العلاقة
وتدعم كل طرف من اللي حواليك
بالحاجات اللي هو محتاجها في العلاقة
وكمان تطلب الحاجات اللي انت محتاجها
هل انت ضحية؟
النظرية التالتة في تفسير الماضي
هي نظرية مثلث كاربمان | Karpman الدرامي
كاربمان بيقول إن في أي تفاعل اجتماعي
لازم تاخد دور من ال3 دول
- دور الضحية
- دور المدعي
- دور المنقذ
الضحية بيعتبر نفسه المشكلة
وبيحس بالأسف والعجز واليأس
أما المدعي بيرمي اللوم على الآخرين
وبيعاملهم بتسلط وغضب
ودايما بيحتاج الضحية علشان يرمي كل حاجة عليها
أما المنقذ فهو حد عنده قوة وإحساس بالمسؤولية
يقدر بيهم يقف قدام المدعي ويدافع عن الضحية
فمثلا
لو أنت اتخانقت في الحضانة زمان علشان واحد خد منك ساندوتشات الجبنة الرومي
وقالك ما انت اللي غلطان
ابقى اعمل حسابي معاك بعد كده
وانت كنت غلبان وطيب في نفسك فسكتّ
ومع تكرار الموقف
صعبت على واحد زميلكم
فقرر يلعب دور المنقذ
دافع عنك وأنقذ سندوتشات الجبنة الرومي
فانت عزمت عليه بسندوتش واتصاحبتوا.
. بالهنا على قلبكم مش غرضي الجبنة الرومي خالص.. أنا بس عايز أقولك إن نظرية مثلث كاربمان على بساطتها إلا إنها بتقول إن الإنسان مش معزول عن الآخرين في جزيرة لوحده؛ دا احنا منقدرش نفهم الإنسان إلا من خلال التفاعلات الاجتماعية وصراعات سندوتشات الجبنة الرومي..
لا توجد حتمية لسمات الشخصية
بعد كل النظريات والاختبارات النفسية دي
لازم ناخد بالنا من حاجة مهما جدا
مش معنى إن عندك سمة نفسية معينة
إنك خلاص ملكش إرادة
وهتفضل تتصرف على أساس السمة دي
سواء السمة دي اتربيت عليها في طفولتك
أو اكتسبتها في تعاملاتك لما كبرت
تقدر تاخد قرار واعي علشان تحسّن نفسيتك وحياتك
لأن من أهداف وعيك بذاتك أنك تعرف عيوبك ومميزاتك علشان تاخد قراراتك بشكل أحسن
فمثلا عرفت إنك عصبي
وإن ده راجع لحاجة في طفولتك
فلازم تتصرف وتعالج النقطة دي
مش تستسلم وتقول خلاص دي طبيعة شخصيتي والناس بقى تتعود عليا وأنا مليش دعوة!
عوائق في رحلة معرفة النفس
وأنا عارف إن اكتشاف الذات رحلة طويلة وصعبة
لأنها بتقابل عوائق كتيرة زي تأثير السينما والدراما على شخصياتنا والضغوط الاجتماعية اللي بنقابلها باستمرار
ده غير العادات اليومية الغلط
وطبعا صدمات الطفولة والنشأة
ولو جيت عديت من كل ده
وبدأت تدور ازاي تعرف نفسك
هتتكعبل في عِلم مشوش
وكتب تضر ولا تنفع
ومؤثرين غير متخصصين في المجال النفسي
فحتى مصادر التعلّم
لازم تتعب علشان توصلها
بس خليني أأكدلك يا صديقي
إن كل تمن هتدفعه في رحلة معرفة النفس
هيرجعلك بفايدة
وكل مجهود مبذول
هتلاقي العائد بتاعه
بس انت اصبر بس
ومتستعجلش
وبعدين احنا ورانا ايه يعني
انا ونفسي والزمن طويل
وبس كده
سلام بقى علشان هروح أقعد مع نفسي شوية ^_^