القاتل الصامت ، الاحتراق النفسي
المقدمة
سنة ٢٠٢٤م، في مصر
وتحديدًا خلال أحد ماتشات كرة القدم
بينهار لاعب
اسمه أحمد رفعت
وقلبه بيقف
رغم إنه لسه شاب في ال ٣٠
معروف عنه شغفه بكرة القدم
ونشاطه واحترافيته في الملعب
وبيتمكن المسعفين من انقاذه بالفعل بعد ما الكل فقد الأمل وافتكره رحل لعالم آخر..
يمكن دي كانت رسالة أنه يقوم تاني وينبهنا لـ قد ايه الضغوط النفسية الشديدة ممكن تنهي حياة إنسان!
لكنه بعدها بفترة بيتوفى!!
وهو معندوش أي تاريخ مرضي مسبق
غريب مش كدا؟
بس الحادثة دي مش أول مرة تحصل ...
سنة ٢٠١٣ م ، بس المرادي في الولايات المتحدة الأمريكية
بينتشر خبر وفاة أرييل أولسون | Ariel olson
شابة عندها ٢٩ سنة
مرحة ولطيفة ومحبوبة
ومعروف عنها حبها لشغلها
لدرجة إن ساعات شغلها كانت بتعدي ال ٨٠ ساعة أسبوعيًا
وبفضل طموحها وتفانيها وصلت لمنصب مدير تسويق في شركة كبيرة
وهي كمان مكانش عندها تاريخ مرضي
وفي نفس السنة
بس في اليابان المرادي
الشرطة بتفتح تحقيق في حادثة وفاة
ميوا سادو| Miwa Sado
شابة عندها ٣٠ سنة
وبتشتغل صحفية
ومعروف عنها حبها لشغلها
ويقال إنه قبل وفاتها، اشتغلت ١٥٠ ساعة إضافية عن ساعات العمل الرسمية خلال شهر واحد
وميوا كمان مكانش عندها أي تاريخ مرضي
تفتكر ايه هو العامل المشترك بين التلات قصص؟ وايه جاب حادثة وفاة في أمريكا لحادثة وفاة في اليابان وكمان حادثة وفاة في مصر؟
قاتل متسلسل مثلًا؟!
يمكن.. بس قاتل من نوع آخر.. قاتل صامت بنعاني من آثاره لكن مش بناخد بالنا منه كويس..
العامل المشترك يا صديقي بين الـ 3 قصص وغيرهم هو السبب في ٢٠% من الوفيات المبكرة في الشباب
وهو كمان السبب في زيادة تعرض شخص للانتحار بنسبة ٣٠%
ومش بس كدا لا
ده كمان هو سبب ٢٥% من الخلافات العائلية وحالات الطلاق
يعني قاتل وخراب بيوت كمان!
هو ايه العامل المشترك ده بقى؟
العامل المشترك بين وفاة أحمد رفعت وأرييل وميوا هو:
الاحتراق النفسي أو burnout
فايه هو ايه الاحتراق النفسي ده؟ ايه اعراضه؟ واحمي نفسي ازاي من تأثيراته ؟
ومتنساش على ما التطبيق يتحمل تعمل سبسكرايب لقناة أخضر وتفعّل وصول كل الإشعارات ليك عشان يوصلك كل جديد أول بأول
ايه بقى موضوع الاحتراق النفسي؟!
التعريف
الاحتراق النفسي أو ال burnout
هو حالة من الإجهاد
العاطفي
والنفسي
وكمان الجسدي
بتحصل نتيجة أنك تتعرض باستمرار لضغوط عاطفية ومهنية
والضغوط دي بتكون أكبر من قدرتك على التأقلم والتعود
يعني ببساطة بتبقى حد متوتر ومستنزَف لأنك جايب آخرك..
هتقولي بسيطة، ما آخد أجازة واروح اصيف يا أخضر وكله هيتحل وهرجع فل الفل ؟!
ياريتها يا سيدي كانت بالسهولة دي
اللي بيتحل بالراحة ده التعب العادي
لكن الاحتراق النفسي حالة مستمرة
يعني حتى لو الشخص اللي بيمر بيه
قرر ياخد أجازة
هيفضل متوتر برضو
وعمال يفكر في الضغوط اللي عليه
وده ممكن يوصله للموت
يا ساتر يا رب
طب ايه اللي ممكن يوصلنا لكده بس
هقولك يا صديقي
اليابانيين عندهم مصطلح اسمه كاروشي
ومعناه الحرفي
" الموت بسبب الإفراط في العمل"
وظهر المصطلح ده في الثمانينات
اللي هي فترة الازدهار الاقتصادي في اليابان
بعد ظهور حالات وفاة كتيرة انتشرت بين الموظفين وقتها
وزي ما خمنت بالظبط يا صديقي
سبب الوفاة كان الاحتراق النفسي الناتج عن الإفراط في العمل
أو الضغط الناتج من بيئة العمل
يعني عايز تقولي يا أخضر إن الشغل
ممكن يقتلني؟!
خوفت يا حبيب أخضر ولا ايه؟ لا اهدى كدا علشان لسه هديك المعلومات اللي تخوف بجد
الآثار
وتعالى نبص على آثار الاحتراق النفسي
من كذا ناحية:
أقصد يعني من ناحية الحالة الجسدية والحالة النفسية والأداء الوظيفي والعلاقات الشخصية
وهنبدأ مع
الحالة الجسدية للفرد:
- وهنا هنلاقي إن الفرد اللي بيختبر احتراق نفسي متكرر عرضة للوفاة بالسكتات الدماغية وأمراض القلب بنسبة ٢٥% أعلى من الأشخاص العاديين
- وكمان بيكون معرض لأمراض الجهاز الهضمي، زي عسر الهضم بقى واضطرابات الشهية والقولون العصبي وكمان القرحة
- وخد الكبيرة بقى، الدراسات اكتشفت إن الاحتراق النفسي بيغير في تركيبة الدماغ، وبيسبب ضعف في الأداء العقلي ومشاكل في الإدراك
- ومش بس كدا لا، كمان بيأثر على جهاز المناعة وبيخلي الشخص عرضة للأمراض اللي زي البرد المتكرر أو حتى السرطان
وعايزك تتقل كدا، لأن دي أول ناحية بس وهي الحالة الجسدية
نيجي بقى لتاني ناحية، وهي:
- الحالة النفسية للفرد:
- الأبحاث وضحت إن الشخص اللي عنده احتراق نفسي مزمن، معرض لأمراض زي القلق والاكتئاب وكمان الانتحار
- وكمان معرض لاضطرابات النوم زي الأرق المزمن بنسبة بتوصل ل ٦٠%!
أما تالت وآخر ناحية بتتأثر بالاحتراق النفسي، فهي:
- الأداء الوظيفي والعلاقات الشخصية
- بنلاحظ هنا إن رغم التوتر وساعات العمل الزيادة، فالشخص اللي بيمر باحتراق نفسي بيكون أداءه في العمل أقل من مستواه في حالته العادية وكمان أقل من زمايله.
- وكمان ببختبر حالة من العزلة والانفصال عن اللي حواليه، فبيخسر شبكة علاقاته اللي كانت بتديه دعم عاطفي ونفسي، وده بدوره بيزود المعاناة والأثر النفسي اللي اتكلمنا عنه.
- بالإضافة لتدهور علاقته مع أسرته وصحابه المقربين بسبب صعوبات التواصل وعصبيته وقلقه المستمر.
ها، عرفت بقى حجم المشكلة وإن الاحتراق النفسي حالة خطيرة ومؤذية للفرد؟
زمانك دلوقتي قلقان وبتسأل اعرف ازاي بقى أنا بمر بالحالة دي أصلًا ولا لا، ولو كنت بمر بيها أعالج نفسي ازاي؟ طب استقيل من شغلي اللي هيموتني ده ولا اعمل اييه، ساااعدني يا أخضررر
متقلقش يا صديقي
الحلقة دي أصلًا علشان تساعدك
فـ روّق كدا وركز معايا
وخلينا نجاوب على كل سؤال من دول لوحده
العلامات والأعراض
وهنبدأ بالسؤال الأول
وهو:
تعرف ازاي انك بتمر باحتراق نفسي؟
من خلال شوية الأعراض والعلامات
اللي هقولك عليهم حالًا
وعلشان تفتكرهم وتميزهم بسهولة
خلينا نقسمهم
لـ:
- علامات جسدية
- وعلامات نفسية
- وكمان علامات سلوكية
جميل اوي.. الكلام على ايه بقى؟
أول حاجة
هي:
العلامات الجسدية
ودي تقريبًا أهم نقطة فيهم
لأنها غالبًا أول علامات هتلاحظها على نفسك
والعلامات الجسدية عبارة
عن:
شعور مستمر بالتعب
مش بيروح بالنوم
ولا بيختفي يوم الاجازه
وبتحس إنه بقى صعب عليك تهتم بنفسك وبأكلك وهواياتك
غير أنك بتبقى zero طاقة برا الشغل
وكمان صداع متكرر وأرق أو أي اضطرابات في النوم عمومًا
يعني بتصحى من نص نومك قلقان
أو بتنام كتير على غير عادتك
وممكن الاحتراق النفسي
يظهر في شكل اضطرابات في الشهية
ودوخة وترجيع
بسبب ارتفاع مستوى هرمون الكورتيزول في الجسم
أو يظهر في شكل آلام مستمرة في العضلات
فبتحس إنك متكسر ومرهق مش قادر تتحرك
دي كدا العلامات الجسدية
ايه بقى العلامات النفسية؟
العلامات هنا بتختلف شدتها من شخص للتاني
لكنها غالبًا بتكون عبارة عن شعور مستمر بالقلق..
القلق من الشغل ومن الحياة ومن كل حاجة
وأوقات ممكن القلق ده يتطور لنوبات هلع | Panic attacks
وبيكون مصحوب بشعور بالحزن
وكمان فقدان الدافع وغياب الشعور بالإنجاز
وبتبدأ متهتمش بالحاجات اللي كنت بتحبها
زي أكلتك المفضلة
أو الفيلم اللي بتعيده كتير ومبتزهقش منه..
وكمان هواياتك اللي كانت زمان بتخفف عنك
والشعور بالفشل وفقدان الثقة بالنفس
بقى مسيطر عليك
آخر نقطة بقى في علامات الاحتراق النفسي
هي:
العلامات السلوكية
ودي عبارة عن التصرفات الجديدة عليك
وبيلاحظها الأشخاص حواليك أكتر منك
يعني مثلا:
بتغيب عن الشغل كتير بعد ما كنت ملتزم
أو بطلت تسلم شغلك في معاده
وبتلاقي صعوبة في التاسكات اللي كنت متعود تعملها
ومبقتش عارف تركز
وبتنسى كتير
وبتستهلك كافيين بزيادة
وبدأت تشرب سجاير
أو زاد معدل تدخينك لو كنت مدخن
وكمان بتبعد عن اللي حواليك
صحابك وعيلتك بيقولولك كتير إنك مختلف
وإنك بقيت بعيد ومنعزل
خلينا بقى نفترض إنك لاحظت علامات زي دي
أو حتى لو معندكش علامات لسه
بس عايز تحمي نفسك من الاحتراق النفسي
تعمل ايه بقى؟
بص يا صديقي عايزك تتعود تكون شخص منهجي كدا
يعني علشان نحل أي مشكلة
فأول خطوة في الحل
هي تحديد المشكلة وأسبابها
فقبل ما نتكلم عن الحل.. هنسأل سؤال مهم..
ايه اسباب ظاهرة الاحتراق النفسي اصلا؟!
الأسباب
أسباب الاحتراق النفسي كتير ومتنوعة
- في منها المرتبط ببيئة العمل ومكان شغلك وزمايلك
- ومنها المرتبط بصفاتك الشخصية وطبيعتك
يعني مثلًا لو هنبص على الأسباب المرتبطة ببيئة العمل
هنلاقي:
إن في مجالات الاحتراق النفسي فيها أكبر من باقي المجالات
خد عندك الطب مثلًا، نسبة الاحتراق النفسي فيه
حسب إحصائية اتعملت سنة ٢٠٢٣
وصلت لحد ٥٠% !
وكمان هنلاقي النسبة زيادة
في المجالات اللي فيها بيئة تنافسية
زي:
شركات التكنولوجيا والاستثمارات
وفيه كمان صفات معينة لبيئات العمل اللي بتسبب احتراق نفسي للموظفين
والصفات دي زي:
ساعات عمل طويلة.. يعني بيبقى ناقص تبات في الشغل
وترجع البيت تسلم عليهم كل اسبوع
وزمايلك في الشغل توكسيك
يعني كله بيحاول ينسب الفضل لنفسه
ومحدش بيساعد حد
ومفيش استراتيجيات تواصل فعالة
وكمان مفيش تاسكات ولا أدوار واضحة
كل حاجة عايمة ومحدش عارف مين بيعمل ايه
وفي الآخر ممكن تلاقيك شلت الشغل كله لوحدك
وبعد كل ده ممكن متتقدرش أصلًا
ومحدش مهتم بقى بمتابعة الشغل
أو العكس! بيتابعوا الشغل بشكل over لدرجة إنك ممكن تلاقي حد طالع من مطبخ بيتكم بيسألك عن التاسك
وبعد كل الهم والتعب ده
ممكن الـ salary ميكونش مجزي
كل الصفات دي بتساهم في خلق بيئة عمل بتسبب احتراق نفسي للموظفي……
العمل الحر مش حر
سامع صوت الضحك اللي أنا سامعه؟
اااااه ..ده صاحبنا الفريلانسر
اللي فاكر إنه دخل الحلقة بالغلط
أصل هو مدير نفسه
لا حد بيرخم عليه
ولا حد بيتحكم في وقته
ولا فيه زمايل شغل توكسيك
ولا مواصلات في الحر
قاعد رايق في بيته
فماله هو بقى ومال الاحتراق النفسي يعني
خد هنا يا فريلانسر
اياك تقفل الحلقة
وده لأني هعرّفك دلوقتي إنك أنت كمان معرض للاحتراق النفسي زي صديقنا الموظف عادي جدًا
وده لأسباب كتير
أهمها:
إن الفريلانسرز ساعات شغلهم زيادة
هو اه مفيش مدير يحددلهم ساعات
ولا حد بيحاسبهم
لكن حسب إحصائية اتعملت حديثًا
ف ٨٨% من الفريلانسرز مش بيعرفوا يحطوا حدود واضحة بين وقت الشغل ووقت الراحة
ده غير طبعًا إنه مطلوب منهم يكونوا أونلاين بشكل مستمر
إما علشان يردوا على رسايل أو يتابعوا progress الشغل
والأبحاث لقيت إن ده ممكن يسبب
حالة مستمرة من التوتر والضغط
والشعور بإن الشخص لازم يكون اونلاين ٢٤ ساعة
والحالة دي في الآخر بينتج عنها
مشاكل في التركيز
وضعف في الانتباه
ومينفعش ننسى المخاطر المتعلقة بالتعرض المستمر للشاشات
واللي منها:
الإجهاد البدني بسبب القعدة المستمرة
وكمان الإجهاد البصري اللي ممكن يسبب صداع
وجفاف في العين وحساسية
والتغيرات دي بدورها
بتأثر على جودة النوم وبتسبب الأرق
فجودة حياتهم بتقل
وبيكون صعب عليهم يهتموا بنفسهم
فبيدخلوا في حالة من الاحتراق النفسي
مش سامعك بتضحك يعني يا فريلانسر؟ هه طبعا ما خلاص أسطورة الفريلانسر الذي لا يُصاب بالاحتراق النفسي مبقتش مقنعة..
صفات شخصية بتزود قابلية الاحتراق النفسي
نرجع لكلامنا بقى عن باقي أسباب الاحتراق الذاتي
بعد ما اتكلمنا عن الأسباب المتعلقة ببيئة العمل
فخلينا نتكلم عن:
الأسباب المتعلقة بشخصية الفرد
يعني الصفات الشخصية
اللي بتخليه معرض أكتر للاحتراق النفسي
سواء كان موظف أو فريلانسر ..:)
والصفات دي زي:
الكمال أو الـ perfectionism
يعني أنت حد عايز يوصل
ل ١٠٠% من كل حاجة
مش بيرضي بالنتايج الكويسة
لا هو بيسعى للبيرفكت
وبياخد بسبب كدا ساعات شغل زيادة
تاسكات زيادة
كله في سبيل إنه يرضي الـ perfectionism بتاعه
وكمان زي الخجل وعدم القدرة على الرفض
يعني مبتعرفش " تقول لا"
ده ممكن يعرضك للاستغلال من زمايلك
والمدير وأي حد معدي
وده لأن الشركات رأسمالية
هدفها تحقق أعلى فايدة بأقل سعر
فمش هيعملوا على مصلحتك يعني
مش عارف تقول لا؟
طب خد شغل زيادة أهو
وأخر صفة بقى ومن أكثرهم شيوعًا
هي إرضاء التوقعات
في الغالب الأسرة الكريمة
عايزين يكونوا فخورين بيك
وعايزينك تبقى أصغر مدير إقليمي
لشركة اسمها اجنبي محدش عارف ينطقه
ده غير بقى إنه ابن خالتك
اللي عنده ١٠ سنين
اتعين مدير بنك
وأنت لسه
كدا كدا هيلاقوا حد يقارنوك بيه
وبسبب كدا هتحس بالضغط
إنك لازم ترضيهم علشان تاخد الحب والقبول
ايه كل ده يا أخضر!! كل دي أسباب
شوفت بقى يا صديقي إن الاحتراق النفسي
مشكلة خطيرة فعلًا
وكلنا معرضين ليها.. ومتفتكرش نفسك بعيد عنها.. اوعي تقول دول شوية تعب.. ها.. اوعى!!
ازاي تحمي نفسك من الاحتراق النفسي؟
طيب بعد ما حددنا العلامات والأعراض بتاع الاحتراق النفسي
وكمان عرفنا الأسباب
نحمي نفسنا ازاي بقى يا عم أخضر؟
أول خطوة علشان تحمي نفسك من الاحتراق النفسي
أنت عملتها خلاص
وقبل ما تشتمني هوضحلك قصدي
أول خطوة هي إنك تعترف بوجود المشكلة
وده اللي عملته لما فتحت الحلقة دي
أنت عرفت الأسباب والأعراض
وكمان بقيت واعي للتأثيرات
فأنت دلوقتي بقيت عارف
بتتعامل مع ايه
وأدركت جدية المشكلة
تاني خطوة بقى
هي:
إنك تتعلم شوية استراتيجيات للتعامل مع الضغوط
بحيث متوصلش لحالة الاحتراق النفسي
أو تقلل من حدتها في حالة إنك بتمر بيها
والاستراتيجيات دي سهلة وبسيطة
بتتضمن تعديلات في بيئتك
أو روتينك اليومي
يعني مثلا:
- جرب تحدد أولوياتك كل يوم الصبح، يعني حدد المهم واللي محتاج إنك تخلصه، واللي مش مستعجل اوي طنشه عادي، افتكر إن راحتك وصحتك ونفسيتك هما كمان أولوية.
- وكمان اتعلم تقنيات إدارة الوقت بفعالية، يعني ممكن تجرب تقنية اسمها Pomodoro، وهي عبارة عن إنك تحدد مهمة وتظبط مؤقت ٢٥ دقيقة، ولما يخلصوا خد راحة خمس دقايق، وابعد عن مكتبك، وبعدها شغل المؤقت تاني وكرر العملية دي، وكل أربع دورات خد راحة طويلة لمدة نص ساعة، ده هيساعدك تخلص شغلك بدون ضغوط جسدية ونفسية
- الرياضة والنوم والأكل الصحي بقى مقولكش أنت عارف.. عارف ومش بتطبق أنا اعملـــــــــك اييييييييييييييييييه.. حرام عليك نفسك يا أخي
- وإياك مهما حصل تنعزل عن عيلتك وصحابك، وقتك معاهم مهم زي الوقت اللي بتديه لشغلك، ويمكن أهم كمان، لأن العلاقات دي هي اللي هتوفرلك دعم نفسي وعاطفي
- ولو في أي وقت حسيت بالضغط اتكلم مع حد مقرب منك، ولو حاسس إنك مش قادر تعمل كدا، أو ابتديت تفكر في الأذى النفسي، فياريت تكلم متخصص وتطلب المساعدة لأن حياتك أهم من وظيفتك
- ومهم جدًا تتعلم تقول " لا" وتحط حدود في شغلك، اعمل شغلك بس وحدد مهامك واولوياتك، ومتتكسفش تبلغ المدير لو حصل تعدي على حدودك من أي زميل ليك، ده مش بيخليك شخص وحش أو عصفورة المكتب
- وعلى ذكر الحدود، افصل بين الشغل والبيت، وقت الشغل للشغل ووقت البيت للبيت، يعني مجرد ما تخرج من باب الشغل افصل خالص، لا تفتح الميل، ولا ترد على رسايل، ده لو كلموك قالولك الحقنا الشركة بتنهار ومحدش غيرك هينقذها، قولهم معلش ساعات شغلي خلصت.. وبالنسبة للفريلانسر، حدد لنفسك مواعيد شغل ثابتة كل يوم، ده هيساعد عقلك يفصل، وابعد عن الاجهزة خالص برا وقت الشغل
- وياريت تتخلى عن السعي للكمال، مش بقولك قلل جودة شغلك، لكن اعمل اللي تقدر عليه ضمن حدود طاقتك ووقت الشغل، متجيش على نفسك علشان شغلك
- وأخيرًا لو بيئة العمل بتاعتك يا صديقي بتتضغط عليك جدًا وحاسس بالقهر والتعب؛ لو تقدر تسيب الشغل وتشوف غيره اعمل كدا، ولو مش قادر تسيبه في الفترة الحالية، يبقى دور على غيره وخطط إنك تسيبه قريب، وبأكد عليك لو حاسس إنك مش قادر تتحسن، فمش عيب تلجأ لمساعدة حد متخصص.. مش عيب أبدًا..
الخاتمة
ورغم كل اللي قولتهولك عن الاحتراق النفسي دا عايز أقولك إن مفيش نسبة واضحة ولا إحصائية تقولنا عدد اللي بيموتوا من الاحتراق النفسي بالظبط..
احنا منعرفش عدد
لكن نعرف اسماء
زي:
نعرف أحمد رفعت
وشذى محمد
والطبيبة مي رافع
والطبيب نبيل عادل
وأرييل وميوا اللي اتكلمنا عنهم في بداية الحلقة..
كل دول أشخاص كان عندهم أحلام وذكريات وعيلة مستنية رجوعهم للبيت وصحاب بيحبوهم
كان ليهم قصص عايزين يعيشوها
لكنهم أصبحوا ضحية للاحتراق النفسي ضمن نسبة مش معروفة بدقة
وعايز اقولك في آخر كلامنا
إنك أهم من وظيفتك
وأهم من الألقاب
نفسيتك أولوية
وحياتك مهمة
وبس كدا يا صديقي …سلام