ايه هو الإيذاء الجنسي للطفل؟ وايه هي الدلائل اللي تعرفني إن الطفل تعرض له؟
الإيذاء الجنسي للطفل واحد من مدى واسع من الإساءات اللي ممكن يختبرها الأطفال ويعانوا منها لسنوات عديدة.
وهو:
إجبار أو إغواء الطفل أو الشخص الصغير على المشاركة في أنشطة جنسية، سواء كان الطفل واعي باللي بيحصل أو لأ.
من شخص بينه وبين الطفل فرق في السن أو الحجم أو القوة = حيث يستخدم الطفل كأداة جنسية لإِشباع احتياجات أو رغبات الشخص دا.
وممكن تتضمن الأنشطة دي الاتصال الجسدي، بما في ذلك التصرفات اللي ممكن يحصل بيها اختراق، زي: الاغتصاب.
وممكن متكنش في الأنشطة دي أي اتصال.
وممكن كمان الايذاء الجنسي يكون في جعل الأطفال يشاركوا في النظر أو إنتاج الصور أو المواد الفاضحة، أو مشاهدة الأنشطة الجنسية، أو تشجيع الأطفال على التصرف جنسيًا بطريقة غير لائقة.
الشخص اللي بياذي الاطفال دا ممكن يكون من جوا العيلة زي الأب أو الأخ أو العم أو الخال أو الجد.
– ومن خارج العائلة: زي الشخص الأكبر سنًا من الطفل بس في محل والديه وله سلطة وقوة على الطفل = زي المربي أو المدرس أو المدرب أو القائم على رعاية الأطفال في الملاجئ.
سواء كان الشخص دا معروف للطفل أو غير معروف: زي الجيران، أو أصحاب المحلات.
أهم الدلائل اللي تعرفني إن الطفل تتعرض للأذى الجنسي:
– الانشغال الدائم بأحلام اليقظة.
– عدم النوم وكثرة الكوابيس.
– الخوف وتجنب أشخاص معينين أو أماكن أو مواضع معينة.
– تدني المستوى التعليمي وعدم المشاركة في أنشطة المدرسة.
– أي تغير واضح ومفاجئ في السلوك.
– تورط الطفل في سلوك انحرافي.
(ممكن لو الطفل بيعتدي على طفل تاني فدي إشارة إنه نفسه ممكن يكون تعرض لاعتداء) = ف وأنا بعالج الموقف: أعرف الطفل عرف دا منين؟
– عدم الثقة بالنفس وبالآخرين.
– العدوانية.
– تشويه الأعضاء التناسلية.
– القيام بتصرفات إغوائية استفزازية.
(وخصوصًا لو صغير ومش فاهم دلالة التصرفات دي) = لأن غالبًا اللي اعتدى علمها له.
أما الدلائل اللي تشير لتعرضه لإيذاء بدني أو معنوي:
– الانطواء.
– الاكتئاب.
– الخمول.
– الشرود.
– الانعزال.
– الفشل الاشتراك في اللعب، أو الاستمتاع بيه.
– جرح أو إيذاء النفس.
– ضعف.
– غموض وتضارب التعبير عن المشاعر.
– بكاء طويل ومستمر مبيخفش بالتهدئة والمواساة.
– الطفل مثبط وكتوم.
– متوتر وحاسس بالقلق.
– اعتمادي.
– سريع الغضب وعدواني.
الهدف من التعرض للأعراض والتفصيلات دي:
إن لو أنت شخص مسؤول عن طفل تكون منتبه له، ولتصرفاته.
ممكن يكون بيتعرض لأذى بأي شكل وخايف يقولك، أو مش عارف.
وممكن الأذى دا يكون مستمر.
أو تعرض وأنت شفت الآثار دي بس مكنتش عارف هو ليه بيعمل كدا؟ أو مفكرها حاجة عادية، أو مكبر دماغك.
فتحاول تصلح اللي حصل وتاخده في حضنك وتقربه منك، وتعتذر له إنك مكنتش موجود وقت ما كان محتاجك.
أو لو أذيت حد تعتذر له، وتصلح غلطك؛ لأنه أكيد منسيش اللي أنت عملته.
وما زال متأذي بسببه.
في الحلقة الجاية إن شاء الله هنكمل كلامنا عن التعرض للأذى الجنسي ونتايجه.
وبس كدا.
سلام.
الموضوع التالي
